Tiranë – Operatorët turistikë polakë, mbas një infoturi të zhvilluar në datat 17 – 22 maj në Shqipëri e Kosovë, konkluduan se tregu turistik shqiptar ofron resurse e mundësi të pafundme turistike, si dhe parashikuan që të sjellin kontingjent të madh turistik në vendin tonë

Gjithashtu Bordi Drejtues i Dhomës së Turizmit Polak ofroi një stendë falas në Panairin e Varshavës, në shtator të këtij viti për prezantimin e turizmit shqiptar, si dhe parashikon të zhvillojë konferencën e saj vjetore, në tetor të këtij viti në Shqipëri, me 300 operatorët turistikë më të fuqishëm polakë.

Qëllimi i këtij infoturi ishte që të prezantoheshin mundësitë turistike më të mira në Shqipëri e Kosovë, në kuadër të Turizmit Rajonal, për tregun turistik polak.

Infoturi i 22 operatorëve polakë u mbështet në prezantimin e 5 komponentëve kryesorë të konsideruara si përparësi të turizmit shqiptar: prezantimi i zonës malore të Alpeve, të zonës bregdetare të Adriatikut dhe Jonit; prezantimi i objekteve kryesore historike e arkeologjike; prezantimi i infrastrukturës akomoduese në të gjitha zonat malore e bregdetare; prezantimi i traditës shqiptare të gatimit; evidentimi i mikpritjes tradicionale shqiptare.

Gjatë 6 ditëve të qëndrimit në Shqipëri e Kosovë programi përfshinte vizita turistike e historike si dhe qëndrime në Krujë, Shkodër, Lugina e Komanit, Lugina e Valbonës, Gjakova, Rahoveci, Prizreni, Durrësi, Apollonia, Vlora, Berati, Tirana, etj.

Ky infotur u zhvillua në kuadër të marrëveshjes dypalëshe të vitit 2009 mes Unionit të Operatorëve Turistikë Shqiptarë dhe Dhomës së Turizmit Polak, me qëllim prezantimin e mundësive dhe destinacioneve më të bukura turistike të vendit tonë.

Unioni i Operatorëve Turistikë Shqiptarë është një organizatë jo qeveritare turistike, që ka të anëtarësuar mbi 120 operatorë turistikë, agjenci turistike, transportues turistikë dhe OJF të profilit turistik.