Tiranë – Sekretari për Çështjet Ligjore në Lëvizjen Socialiste për Integrim, Ylli Manjani tha në një konferencë për shtyp të dielën se “humbja në zgjedhjet e 8 majit e kryetarit të PS-së, Edi Rama në Tiranë ka nxitur drejtuesit e partisë së tij të ndërmarrin një betejë për prishjen e procesit zgjedhor.”

Lëvizja Socialiste për Integrim reagoi sot ndaj deklaratës së kryetarit të grupit parlamentar të PS-së Gramoz Ruçi, i cili theksoi se mazhoranca kërkon të manipulojë procesin dhe tejzgjatjen e tij deri në ripërsëritjen e zgjedhjeve.

“Qëllimi i Ramës dhe i drejtuesve të tjerë të PS-së është që t`i imponohet publikut teza e përsëritjes së zgjedhjeve”, theksoi Manjani.

Ai i bëri thirrje kreut të PS-së, Edi Rama të pranojë rezultatin dhe faktin që doli në opozitë dhe t`i drejtohet gjykatës nëse ka kontestime për rezultatin. Sipas Manjanit 124 786 zgjedhës të bashkisë Tiranë, kanë vendosur të nxjerrin në opozitë, për herë të parë zotin Edi Rama.

“Në rastin e bashkisë së Tiranës gjetja e fletëve të votimit në kutinë e gabuar e sqaron më së miri përrallën e mos rakordimit të shifrave, të cilën nuk e beson as vetë Rama. Është e vertetë që fletet e votimit të gjetura në kutinë e gabuar janë tepër për këtë të fundit, por është gjithashtu e vërtetë se po të njëjtat fletë janë mangut në kutinë e duhur. Por PS-së nuk i intereson kjo e fundit, sepse në fakt nuk i intereson vota e qytetarëve, por vetëm fitorja e kryetarit”, deklaroi Manjani.

Anëtarja e Asamblesë Kombëtare në PS, Megi Ajtyresa, duke reaguar ndaj kësaj deklarate tha se “ne i kemi fituar zgjedhjet në Tiranë dhe në gjithë Shqipërinë. Humbësit do përballen me popullin sovran jo vetëm si humbës, po edhe si shkelës të dhunshëm të vullnetit të popullit”.