Prishtinë- E drejta për të protestuar në mënyrë paqësore është e garantuar me Kushtetutë, nuk do të cenohet nga askush asnjëherë, thekson në një deklaratë për shtyp kryeministri i Republikës së Kosovës, Hashim Thaçi.

“Si kryeministër i Republikës së Kosovës dhe në emër të Qeverisë së Republikës së Kosovës, shpreh edhe një herë keqardhjen e thellë për protestën e dhunshme të organizuar nga Lëvizja Vetëvendosje”, shprehet ai.

“Kosova është shtet demokratik dhe e ritheksoj se e drejta për të protestuar në mënyrë paqësore është një e drejtë e garantuar me Kushtetutë. Kjo e drejtë nuk do të cënohet nga askush asnjëherë. Por, unë me vendosmëri e riktheksoj se askush nuk ka të drejtë që ta keqpërdorë të drejtën e protestës për të venë në rrezik funksionimin normal të institucioneve legjetime të shtetit tone”, thekson kryeministri Thaçi.

 Ai shton se Qeveria e Republikës së Kosovës konsideron se policia e Kosovës, si autoritet kompetent për zbatimin e rendit dhe ligjit, ka ndërmarrë të gjitha masat ligjore sipas standardeve dhe procedurave operacionale për të mbajtur situatën e qetë dhe nënkontroll gjatë protestës.

“Për më tepër, policia e Kosovës ka bërë publik me kohë gjithë planin e saj operativ lidhur me menaxhimin e protestës dhe të njëjtin plan paraprakisht ia ka sqaruar edhe atyre që kanë organizuar protestën. Për fat të keq, protestuesit kanë dështuar që të përmbahen nga bllokimi i rrugëve, dhe, për më tepër, nga përdorimi i dhunës. Kjo ka bërë të domosdoshëm ndërhyrjen e policisë në zbatim të rëndit dhe të ligjit. Si rrjedhojë, policia e Kosovës ka përdorur mjetet e lejuara sipas ligjit dhe standardeve më demokratike për shpërndarjen e protestuesve dhe zhbllokimin e rrugëve”, deklaron kryeministri Thaçi.

Ai siguron se Policia e Kosovës dhe Inspektorati Policor do të bëjnë analizën e detajuar lidhur me këtë protestë dhe do japin sqarime profesionale, të cilat duhet të saktësojnë qartë se a ka pasur tejkalim të përdorimit të mjeteve dhe metodave për zbatimin e operacionit për garantimin e lëvizjes së lirë gjatë protestës.

“Në rast se konstatohet se ka pasur shmangie nga respektimi i procedurave, keqpërdorim të autorizimeve, përdorim të tepruar të forcës policore, atëherë organet e pavarura dhe kompetente do të marrin masa përkatëse disiplinore në përputhje me ligjin dhe rregulloret në fuqi”, thekson Thaçi.

Si kryeministër, shton ai, e kam për detyrë kushtetuese që të mbështes sundimin e rendit dhe ligjit dhe me këtë rast dua të shpreh mirënjohjen time për profesionalizimin e treguar nga policia e Kosovës, e cila edhe pse e përballur me forcën e dhunës së përdorur nga protestuesit, ka mbajtur nën kontroll situatën dhe ka shmangur çdo eskalim të situatës, që do të mund të ishte me pasoja katastrofale. (LajmeShqip.com)