Tiranë- Kryeministri, Edi Rama organizoi dje një drekë pune me deputetët e grupit parlamentar socialist për “të raportuar” lidhur me emërimet e para të bëra nga qeveria si edhe situatën financiare në të cilën ndodhet vendi. Takimi, që ka zgjatur për rreth 3 orë është zhvilluar larg kryeqyteti, në një prej restoranteve luksozë në Linzë të komunës së Dajtit, ku kryeministri Rama bashkë me ministrat e tij kanë diskutuar me deputetët për nevojën e mbështetjes në Kuvend të nismave të qeverisë. 

Burime nga takimi i zhvilluar me dyer të mbyllura pohuan për “Gazeta Shqiptare” se gjatë kësaj dreke pune, deputetët u kanë kërkuar ministrave që të përfundojnë sa më shpejt emërimet me argumentin e presioneve që po ushtrohen ndaj tyre nga militantët për t’u punësuar në administratën publike. Po sipas burimeve mësohet se kryeministri Rama u ka rikujtuar deputetëve situatën e rëndë ekonomike që sipas tij ka lënë pas qeveria “Berisha” duke theksuar disa herë pretendimin se “e kemi gjetur pothuajse bosh arkën e shtetit”. 

Në këtë drekë pune është folur edhe mbi një sondazh të realizuar së fundimi nga strukturat e Partisë Socialiste nga ku ka rezultuar, gjithmonë sipas burimeve, se nëse zgjedhjet do të zhvilloheshin tani, mazhoranca aktuale qeverisëse do të votohej sërish nga shqiptarët në masën 56 përqind.