Prishtinë – Artisi britanik Aaron Moulton, kuratorja nga Zagrebi, Janka Vukmir, dhe artisti kosovar Alban Muja, janë treshja që do të bëjë përzgjedhjen e fituesit në “Artistët e së nesërmes”.

Galeria e Arteve e Kosovës ka publikuar emrat e jurisë që ia ka besuar të vlerësojë fituesin e konkursit që shpërblen me rezidencë gjashtëjavëshe në Nju-Jork të Shteteve të Bashkuara të Amerikës (Studio Ndërkombëtare dhe Programi Kuratorial).

Ekspozita “Artistët e së nesërmes” do të hapet më 16 të këtij muaji në GAK, me punimet e finalistëve. Në mars të këtij viti, Galeria e Arteve e Kosovës kishte shpallur konkursin për çmimin “Artistët…” dhe juria në përbërje të Kaltrina Krasniqit, Vesa Sahatçiut dhe Natasa Petsin-Bachelez, në korrik ka shpallur emrat e katër finalistëve.

Brilant Pireva, Luan Bajraktari, Majlinda Hoxha dhe Yll Xhaferi janë ata që garojnë për çmimin. Përgatitjet për ekspozitën janë bërë nën përkujdesje të kuratorit Bardhi Haliti.(LajmeShqip.com)