Korçë – Studentë, pedagogë , shkrimtarë nga Korça e mysafirë nga Kosova e Maqedonia, nderuan veprën e Petro Nini Luarasit, me rastin e 100-vjetorit të vdekjes, duke promovuar në Universitetin “Fan Noli” të Korçës librin kushtuar jetës dhe veprës së tij, përgatitur nga prof. Alfred Uçi.

Në  këtë veprimtari përkujtimore u vu në dukje se, këtij mendimtari, pedagogu, letrari, poeti dhe luftëtari i lirisë e pavarsisë, i janë kushtuar shkrime e studime të panumërta.

Por,  libri “Petro Nini Luarasi, Mendimtari Martir i Rilindjes Kombëtare” e sjell atë para lexuesit të plotë me jetën dhe veprën e tij, duke vlerësuar aspekte të ndryshme të trashëgimisë kulturore të tij për  shkollën shqipe  dhe si një figurë  madhështore të historisë dhe kulturës shqiptare.