Shkup – Të enjten ishte dita e fundit e kësaj përbërje parlamentare. Nga kjo datë deputetëve të përbërjes aktuale u ndërpritet mandati. Po këtë ditë deputeti i Partisë Demokratike Shqiptare (PDSH) Imer Aliu në fjalën shpërtheu me një varg akuzash në drejtim të partisë shqiptare në pushtet.

“Më në fund i erdhi edhe fundi kësaj shumice parlamentare, shumicë kjo e cila në këto tre vitet e fundit kanë përkrahur një politikë ekskluzivisht antishqiptare. Gjatë qeverisjes tre vjeçare VMRO-DPMNE dhe BDI pozita e shqiptarëve skajshmërisht është rënduar si pasojë e servilitetit të BDI-së, duke u vënë në shërbim të VMRO-DPMNE-së dhe platformës së tyre rilindja në 100 hapa”, deklaroi Aliu.

Sipas tij, kjo pozitë inferiore e BDI-së i mundësojë Gruevskit që pozita e vasalit të BDI-së ti mundësojnë Gruevskit realizimin e të gjitha projekteve me mbështetjen e BDI-së.

“Janë të shumta të dhënat që flasin për anashkalimin e shqiptarëve. Duke filluar nga ligji për përdorimin e gjuhës deri te nataliteti vetëm për nënat maqedonase, ligji për përdorimin e gjuhës i cili një kohë të gjatë u proklamua si një e arritur e madhe. Por ky ligj është në kundërshtim me Kushtetutën, pasi nuk e parasheh gjuhën shqipe si zyrtare por si gjuhë të dorës së dytë”, theksoi deputeti Imer Aliu.

Ai po ashtu kujtoi se nga kjo garniture qeveritare mbeti i pazbardhur edhe rasti i vrasjes së Harun Aliut-Komandat Kushtrimit. “Kjo shumicë parlamentare varfëroi skajshmërisht shqiptarët. Me aktin e shpërndarjes së këtij Parlamenti e dimë se hyjmë në zgjedhje pa rregulla të caktuara dhe pa konsensus. “Shumica parlamentare rrezikon shumë në rast se manipulon me votën shqiptare”, porositi Aliu.

Nga ana tjetër deputetja e Bashkimit Demokratik për Integrim (BDI), Ermira Mhemeti theksoi se kjo shumicë parlamentare dhe qeverisja e tanishme korrigjon politikat e gabuara që ka trashëguar PDSH-ja. “Dëshiroj të konstatojë një element që është konstant për këtë parti. Ata janë nacionalist sa herë që janë në opozitë, janë lojal sa herë që janë në pushtet”, akuzoi Mehmeti.