Në kuadër të forcimit të luftës kundër korrupsionit, Prokuroria e Përgjithshme, ka vendosur shtimin e prokurorëve në disa prej Njësive të Përbashkëta Hetimore Task-Force kryesore në Shqipëri.

Duke e konsideruar luftën kundër korrupsionit si prioritet kryesor të punës së prokurorisë, Prokurori i Përgjithshëm Adriatik Llalla vlerëson të domosdoshme forcimin e Njësitë e Përbashkëta Hetimore me kapacitete njerëzore dhe infrastrukturore.

Në Njësinë e Përbashkët Hetimore Task-Force, Tiranë, shtohen dy prokurorë të komanduar, ndërsa në këtë Njësi do të ushtrojnë funksionet 10 prokurorë. Në Njësinë e Përbashkët Hetimore Durrës Task-Force, shtohen dy prokurorë të komanduar, në këtë Njësi do të ushtrojnë funksionet 5 prokurorë.

Në Njësinë e Përbashkët Hetimore Vlorë Task-Force, shtohet një prokuror i komanduar, në këtë Njësi do të ushtrojnë funksionet 3 prokurorë. Në Prokurorinë e Rrethit Gjyqësor Elbasan do të strukturohet Njësia e Përbashkët Hetimore Task-Force. Krijimi i njësisë në Elbasan është deklaruar nga Prokurori i Përgjithshëm gjatë analizës vjetore për viitn 2013, e cila u zhvillua në muajin Shkurt 2014.