Kumanovë – Bashkimi Demokratik për Integrim (BDI), ka mbajt tubim të martën mbrëma në sheshin e qytetit në Kumanovë, në të cilin është prezantuar bartësja e listës në njësinë zgjedhore me numër dy, Ermira Mehmeti dhe kandidatët për deputetë.

Para kumanovarëve është drejtuar edhe lideri i partisë Ali Ahmeti.

“Punojmë në realizimin e idealeve të paraardhësve tanë. Erdhëm këtu para jush, me faqe të pastër që të kërkojmë edhe një mandat. Neve nuk duhet të na shqetësojnë akuzat nga të tjerët. Për arritjet tona flasin udhërrëfyesit të shënuara në gjuhën shqipe, përdorimi i gjuhës shqipe këtu në Kumanovë në mbledhjet lokale”, ka thënë Ahmeti.

Ai theksoi se në periudhën e ardhshme nga ata pritet punë shtesë dhe se programi i BDI-së nuk është politik dhe popullistik, por bazohet në projekte konkrete.

Ahmeti kërkoi edhe një mandat që të punohet në zvogëlimin e papunësisë dhe rritjen e zhvillimit ekonomik. Para të pranishmëve është drejtuar edhe bartësja e listës zgjedhore në njësinë e dytë zgjedhore, Ermira Mehmeti, e cila potencoi se programi i BDI-së është preciz. “Kërkojmë nga ju edhe një mandat që të mundemi të ndërtojmë ujësjellës në Likovë, që të munden të rinjt tanë dhe femrat të arsimohen, që të hapim vendkalime kufitare në Stançiq, Bellanoc…” ka thënë Mehmeti. Ndryshe, në miting folën edhe kandidatët për deputetë Hajrulla Misini dhe Rexhail Ismaili.