Uashington – Përfaqësuesi Special i BE-së në Kosovë, Samuel Zhbogar, tha se nuk pret ndonjë problem rreth mbajtjes së zgjedhjeve parlamentare dhe presidenciale serbe.

Zhbogar në një intervistë për Zërin e Amerikës tha se është arritur marrëveshja që zgjedhjet t’i zhvillojë OSBE-ja, se nuk do të ketë tensione dhe se njerëzit do të kenë të drejtën dhe mundësinë për të votuar të dielën.

Duke folur për zgjidhjen e çështjeve në veri të Kosovës, Zhbogar ka thënë se kjo është një çështje politike e cila duhet të diskutohet brenda Kosovës, por se edhe Serbia duhet të përfshihen në këto bisedime.

Ai shtoi se pret nga Qeveria e Kosovës që së shpejti ta paraqesë një plan për veriun e vendit. Zhbogar tha se Kosova e ka vështirë që deri në fund të vitit ta fitojë liberalizimin e vizave, porse pret që deri atëherë të përmbushen kushtet që i kanë plotësuar shtetet tjera në rajonit.

Sipas tij, vazhdimi i dialogut Kosovë-Serbi mund të ndodhë pas formimit të qeverisë së re serbe. (LajmeShqip.com)