Shkup – Kastriot Haxhirexha është caktuar ushtrues detyre i kryetarit të Demokracisë së Re (DR). Kjo vjen pas dorëheqjes së kreut të deritanishëm Imer Selmani, me debakllin që pësoi në zgjedhje ku partia e tij doli pa asnjë deputet.

Ky vendim është marrë në mbledhjen e mbajtur mbrëmë vonë në Këshillin Qendror të kësaj partie, ku u vlerësua rezultati dhe humbja në zgjedhjet e parakohshme parlamentare, që çoi në dorëheqjen e kreut të DR-së, Imer Selmani, që u pasua edhe me dorëhqejen e nënkryetarit Abedin Zymberi.

“Këshilli Qendror i DR-së miratoi raportin e Shtabit Qendror Zgjedhor për zgjedhjet e parakohshme parlamentare dhe konstatoi se përgjegjësia për rezultatin e arritur në këto zgjedhje është kolektive dhe jo vetëm individuale. U formua komisioni i cili do të bëjë analiza më të thella për arsyet e rezultatit të arritur”, thuhet në komunikatën e DR-së, në të cilën ish-kryetari Imer Selmani i bëri të ditura arsyet e dorëheqjes së tij.

Ndryshe, Këshilli Qendror i DR-së ka diskutuar edhe mbi aktivitetin e mëtutjeshëm politik të partisë dhe është zotuar që të nis përgatitjet për zgjedhje të brendshme partiake dhe organizim të Kongresit të jashtëzakonshëm të partisë deri në fund të vitit.