Baronesha Joyce Anelay, në takimin e saj me presidenten e vendit Atifete Jahjaga, ka thënë se Kosova duhet ta mbajë fjalën dhe ta krijojë Gjykatën Speciale.

Ministrja e Shtetit në Ministrinë e Punëve të Jashtme të Mbretërisë së Bashkuar dhe

Ministrja e Shtetit në Ministrinë e Punëve të Jashtme të Mbretërisë së Bashkuar dhe përfaqësuesja speciale e kryeministrit për Parandalimin e Dhunës Seksuale në Konflikte, Baronesha Joyce Anelay, ka arritur për vizitë në Kosovë.

Ajo sot u takua me presidenten e vendit Atifete Jahjaga dhe me këtë rast tha se Kosova duhet ta mbajë fjalën dhe ta krijojë Gjykatën Speciale.

Baronesha Anelay ka thënë se me të gjithë krerët e shtetit që do të takohet sot do të flasë për Specialen dhe se ka ardhur në Kosovë me një mesazh të qartë.

“Mesazhi im është i qartë. Kosova ka dhënë një mesazh të qartë si shtet që dëshiron të jetë aktiv në arenën ndërkombëtare dhe komuniteti ndërkombëtar pret ta sheh që Kosova është duke e mbajtur fjalën.

Për ta mbajtur fjalën duhet ta themelojë gjykatën speciale dhe ti tregojë botës se Kosova dëshiron të pranohet në organizatat ndërkombëtare si shtet fuqiplotë dhe me të drejtat e veta”, ka thënë Baronesha Anelay.

Ndërsa presidentja Atifete Jahjaga ka thënë se çdo shtyrje për themelimin e gjykatës nuk do t’i kontribuojë proceseve zhvillimore të shtetit.

“Qëndrimi im ka qenë i qartë që nga fillimi që ne e kemi marrë një obligim ndërkombëtar që duhet ta përmbushim. Duhet njëherë e përgjithmonë ta përmbyllim këtë kapitull sado që duket i rëndë për shoqërinë tonë”, tha presidentja.