Tiranë – Prodhuesit e industrisë së fasonit do të përfitojnë markën e prodhimeve të tyre “Made in Albania” si përfitim nga projekti i madh europian, “PAN-EURO-MED”.

Zv/ministri i Ekonomisë, Enno Bozdo, tha se përmes këtij programi europian, çdo prodhues i industrisë së fasonit, ku përfshihen veshjet dhe lëkurë-këpuca, të cilët marrin lëndë të para nga importi, pra nga vende të tjera, por që përpunimin e bëjnë këtu, do të përfitojnë direkt vendosjen e markës “Made in Albania” për prodhimet e tyre dhe pa tarifa doganore.

“Këto prodhime me këtë markë do të eksportohen në tregjet e huaja”, tha Bozdo.

Llogaritet që përfitimet për sektorin e prodhimit të industrisë së fasonit të jenë të mëdha dhe si rezultat, pritet një rritje e mëtejshme e zhvillimit të saj.

Gjithashtu zerimi i tarifave doganore, një masë që vendosi së fundi qeveria për këtë industri, si dhe rritja e interesit të komanive të huaja europiane që po i kthejnë sytë nga tregu shqiptar prodhues në kushtet e lëvizjeve politike në disa vende të Lindjes së Mesme, krijon mundësi të mëdha zhvillimi për këtë industri.

Në programin PAN-EURO-MED janë përfshirë një numër i madh vendesh që janë pjesë e marrëveshjeve të tregtisë së lirë CEFTA, EFTA, BE, etj.

Për firmat prodhuese shqiptare të fasonit nga marrëdhëniet tregtare me kompani nga këto vende, përfitimet pritet të jenë të konsiderueshme.