Tiranë- Komisioni Qendror Zgjedhor pranoi sot që të shqyrtojë kërkesën ankimore të Dritan Prifti, i cili në zgjedhjet e 23 qershorit kandidoi si kandat i pavarur në qarkun e Fierit.
KQZ caktoi ditën e hënë (ora 11:00) që të diskutojë në lidhje me kërkesën ankimore që kandidati i pavarur në Qarku ne Fierit paraqiti pranë këtij komisioni, i cili kundërshton rezultatet përfundimtare në Qarkun e Fierit duke kërkuar rinumërim dhe rivlerësim të qendrave të votimit në të 10-të KZAZ-të e kësaj zone zgjedhore dhe ndryshim të tabelave përfundimtare për këtë qark.
Relatori Hysen Osmanaj tha se kërkesa e Priftit është brenda afateve dhe kërkesave. “Unë e kam rastin më institucional. Zoti Dritan Prifti ka kandiduar në Qarkun Fier dhe ankohet kundër vendimit të KQZ për nxjerrjen e rezultatit të zonës Fier. Ai kërkon rinumërimin dhe rivlerësimin e vota për 10 ZAZ të qarkut fier. Ankuesi është legjitim”, u shpreh Osmanaj, raporton BW.
Në ankesën e tij kandidati Prifti vë në dukje se nga ana e KZAZ-ve nuk janë lejuar vëzhguesit e ankuesit, si kandidat i mbështetur nga zgjedhësit për të hyrë dhe për të qënë prezent në ambientet e Vendeve të Numërimit të Votave për të monitoruar procesin e numërimit, duke shkelur kështu kodin zgjedhor. 
Kandidati i pavarur në qarkun e Fierit, Dritan Prifti u tërhoq nga procesi i numërimit të votave të 23 qershorit, me pretendimin se PS dhe LSI i kanë vjedhur 50% të votave. Në një prononcim për mediat, Prifti sqaroi se atij i janë vjedhur rreth 10 mijë vota.