Shkup – Në tubimin e djeshëm të Demokracisë së Re në komunën e Haraçinës, lideri i partisë Imer Selmani kërkoi mbështetje për programin zgjedhor, në të cilin, siç tha, ka udhëzime konkrete dhe precize.

Ai premtoi se do ta kthejë dinjitetin e shqiptarëve, diçka që nuk kanë mundur ta bëjnë paraardhësit e tij në 20 vitet e fundit.

“Ka politikanë të cilëve dielli ka filluar t’u perëndojë. Të dobët janë, jo pse  janë lodhur, por për shkak se u ka kaluar afati. Na thonë prisni edhe 20 vite do të jetë më mirë, por unë them këta djem të rinj dhe të inkurajuar nuk kanë kohë për pritje dhe më 5 qershor do ta marrin fatin në duart e tyre”, porositi Selmani.

Lideri i Demokracisë së Re premtoi se do të harxhojë një miliardë euro për rrugë dhe infrastrukturë në komunat në të cilat jetojnë shqiptarët dhe një miliardë euro për mbështetje të bizneseve të vogla nëse fiton partia e  tij.

“Fitorja më 5 qershor do të thotë kryetar shqiptar të Kuvendit të Republikës së Maqedonisë, si dhe më shumë shqiptarë në vendet  udhëheqëse”, theksoi Selmani dhe shtoi se shpreson se 150 mijë vota të cilat ia dhanë qytetarët në zgjedhjet presidenciale do të përsëriten edhe tani.

Bartësi i listës në njësinë e dytë zgjedhore Basri Bajrami tha se do të punojë për interesat e shqiptarëve edhe në parlament, njëjtë siç ka punuar edhe si kryetar komune.