Indi – Babai dhe xhaxhai i një vajze 2-muajshe janë arrestuar në Pilkhuwa sepse tentuan të varrosnin të gjallë vogëlushen sipas një rituali të vjetër që thotë se kryerja e këtij veprimi të hap rrugën për një fëmijë mashkull në familje.

Historia është bërë e ditur nga një zëdhënës i policisë lokale, i cili saktësoi se alarmi është dhënë nga roja e varrezave që kishte parë burrat të hapnin një gropë.

Sipas burimeve të TGcom.it, kur policia ka mbërritur në vendngjarje ka konstatuar se gjithçka ishte gati për ritin që do të sillte “një djalë dhe prosperitet në familje”.

Vogëlushja është shtruar në spital dhe është në gjendje të rëndë nga kequshqyerja, ndërsa babai dhe xhaxhai i saj janë arrestuar.

Në shtresën e varfër të familjeve indiane është ende i ngulitur thellë mentaliteti se lindja e një vajze është fatkeqësi për ekonominë e familjes. Qeveria po mundohet t’i japë fund abortit të vajzave duke ndaluar rreptësisht mjekët që të zbulojnë gjininë e fëmijës gjatë ekografisë.