Lajme Shqip Monday, 11 November 2013 22:10

Tiranë- Ish-kryeministri i vendit Sali Berisha e ka quajtur madhështore protestën e sotme të opozitës kundër vjedhjes së votës. Këto komente Berisha i ka bërë në rrjetin social “Facebook”, ku ka shtuar se ishte një proteste historike, pasi ka pasur mjaft përkrahës.

“Të dashur miq, sot dhjetëra e mijëra qytetarë, kishin mbushur Bulevardin “Dëshmorët e Kombit” për të protestuar kundër vjedhjes së votës në zgjedhjet për Bashkinë e Korçës nga qeveria Rama – Meta. Kjo, ishte një proteste historike, sepse kurrë ndonjëherë në një afat kohor vetëm disa javë pas zgjedhjeve, opozita nuk ka mundur të organizojë një protestë kaq madhështore, që dëshmon revoltën e qytetarëve shqiptarë ndaj vjedhjes së votës së qytetarëve nga qeveria”, theksoi Berisha, shkruan Shekulli.

“Pjesëmarrja masive e qytetarëve dëshmon rritjen e shpejtë të pakënaqësisë së tyre ndaj qeverisë Rama- Meta. Një fillim i mbarë i rrugës së Partisë Demokratike drejt fitores së sigurt. Mirënjohje qytetarëve të Tiranës dhe mbarë Shqipërisë për aktin e tyre qytetar në mbrojtje të votës së lirë. Qytetare e qytetarë ne jemi në betejë. Le ta vazhdojmë në atë për të ecur të sigurt drejt fitores ! sb”, shprehet Berisha në llogarinë e tij.