Beograd – Tridhjetë e pesë ithtarë të ish liderit ushtarak të serbëve të Bosnjës, Ratko Mlladiq, janë arrestuar mbrëmë në Beograd

Ata ishin pjesë e grupit prej rreth 50 ithtarëve të Mlladiqit, të cilët protestonin në qendër të kryeqytetit serb, pasi që ai u arrestua dje në mëngjes.

Demonstruesit u shpërndanë nga policia. Forcat policore kumtuan se ithtarët e Mlladiqit u përpoqën të organizojnë protestë, për të cilën nuk kanë pasur leje.

Rreth 500 demonstrues në Novi Sad, u përpoqën ta sulmojnë ndërtesën e Partisë demokratike serbe në pushtet.

Sipas mediumeve lokale, demonstruesit, të cilët u mblodhën për t’i shprehur mbështetje ish liderit ushtarak të serbëve të Bosnjës, kanë hedhur gurë ndaj ndërtesës dhe kanë thyer disa xhama.

Demonstruesit u shpërndanë pas ndërhyrjes së policisë, ndërsa sipas dëshmitarëve okularë dy demonstrues mbetën të shtrirë në rrugë, të cilët më pas janë dërguar me automjet të ndihmës së shpejtë.