Prokurori francez i cili po merret me ngjarjen në trenin Amsterdam-Paris, François Molins deklaroi se personi i armatosur kishte qëllime terroriste dhe se kishte qenë edhe në Shqipëri në qershor të vitit 2014.

Molins ka hedhur poshtë pretendimet e marokenit Ayoub el Khazzani, i cili ka deklaruar se kishte për qëllim vetëm të kryente një vjedhje dhe e gjithë kjo s’ka të bëjë aspak me terrorizëm.

 “Në tren, Khazzani ka shikuar në Youtube video në të cilën shfaqet një person ku iu bën thirrje besimtarëve myslimanë për të marrë armët në dorë dhe për të luftuar në emër të Profetit Muhammed”, u shpreh Molins në konferencë.

Sipas prokurorit, marokeni kishte blerë një biletë të klasit të parë që kushton 150 euro, duke refuzuar të hipte në një tren të mëparshëm, përkundër faktit se ishte edhe më i lirë. Sipas tij, kjo tregon se gjithçka ka qenë e planifikuar.

Molins deklaroi se 25-vjeçari ka shpenzuar 5 deri në 7 muaj duke qëndruar në afërsi të Parisit në fillim të vitit 2014, para se të kalonte një periudhë të shkurtër edhe në Bruksel, Këln dhe Vjenë.

Prokurori u shpreh se Khazzani shkoi në Stamboll nga Berlini më 10 maj, por kishte udhëtuar edhe nga Antakya për në Shqipëri më 4 qershor, pa specifikuar qartë se sa ditë ka qëndruar ai në vendin tonë apo për çfarë qëllimesh ka qenë.