Policia e serbe arrestoi një shtetas të Kosovës, Haxhi Kastratin, i cili po udhëtonte nga Austria për në vendlindjen e tij në Rahovec.

Familjarët e Haxhi Kastratit, shprehen se 34 vjeçari u ndalua ditën e enjten, menjëherë sapo ai kishte hyrë në territorin serb.

Vëllai i të arrestuarit Bedri Kastrati, tha nëpërmjet telefonit për media kosovare se vëllai i tij, kishte disa vite që udhëtonte  përmes Serbisë, mirëpo asnjëherë nuk është penguar apo ndaluar nga autoritetet e atjeshme. Sipas tij, Haxhiu përmes një mesazhi telefonik i ka informuar ata se gjendet i transferuar në burgun e Krushevcit.

“Ai po vinte në vendlindje për të vizituar nënën e cila ka probleme shëndetësore. Gjithçka ka pasur në rregull, si me lëvizjen e lirë ashtu edhe me dokumentacionin, por mbrëmë na u lajmëru përmes një mesazhi telefoni se e kanë arrestuar dhe e kanë transferu në burgun e Krushevcit. Planifikojmë që të hënën të angazhojmë një avokat për të ndihmuar vëllain”, ka thënë Kastrati.

Ndërkaq, zëdhënësi i Policisë së Kosovës, Brahim Sadriu, deklaroi se Policia e Kosovës nuk ka asnjë informatë në lidhje me rastin.

“Deri në këto momente nuk kemi asnjë informacion për arrestimin e ndonjë shtetasi të Kosovës nga ana e Serbisë”, ka thënë Sadriu. I arrestuari Haxh Kastrati është nga fshatit Zatriq i Komunës së Rahovecit. (LajmeShqip.com)