PD ka akuzuar sot vëllain e kryeministrit Rama, për pjesëmarrjen në një aktivitet privat në Izrael.

Zëdhënësja e PD-së, Laura Vorpsi, tha se Olsi Rama ishte pjesë e një grupi biznesmenësh shqiptarë që vizituan Izraelin, por sërish ngriti pikëpyetjen në çfarë cilësie ishte kryer kjo vizitë.

“Duke i vlerësuar nismat që rrisin marrëdhëniet dhe shkëmbimin mes Izraelit dhe Shqipërisë, ne kemi disa pyetje për z.Rama.

A është z.Olsi Rama, përfaqësues i ekzekutivit?

A është vëllai juaj përfaqësues i biznesit, dhe nëse po, a ka lidhje aktiviteti i tij me qeverinë dhe zyrtarët e lartë të delegacionit?

A është Olsi Rama i ftuar, turist, kureshtar i zakonshëm, apo cili është roli i tij në këtë vizitë? PD mbetet me shpresën se Kryeministri do të bëjë transparencë, ashtu siç ka premtuar”, tha Vorpsi.