Brenda një dite, në zyrat e aplikimit për azil në Belgjikë janë paraqitur 50 kërkesa, që të gjitha nga zona e Shkodrës me arsyetimin se janë në gjakmarrje.

Kjo shifër është cilësuar si alarmante nga autoritetet belge, të cilat kanë dërguar në qytetin e Shkodrës drejtorin e Përgjithshëm të Emigracionit dhe Azilit. Ai ka paralajmëruar se kërkesat për azil do rrezikojnë heqjen e vizave për gjithë shtetasit shqiptarë.

Zyrtari belg ka kërkuar ndihmën e autoriteteve për të frenuar një fenomen të tillë pasi personat që kërkojnë azil paraqesin dokumenta, histori mashtrimi, raportime të cilat i marrin nga shoqata të pajtimit të gjaqeve apo pushtetit vendor dhe që janë tërësisht të pavërteta.

“Informacionet e freskëta që mora nga Brukseli vetëm sot paradite tregojnë se janë paraqitur 50 azilkërkues shqiptarë. Përse kam ardhur në Shkodër? Sepse shumica janë nga qarku i Shkodrës. Prandaj erdha këtu për një takim pune me autoritetet vendore të qarkut. Jo pa qëllim i bëra këto takime sepse njerëzit që fillojnë të projektojnë  një udhëtim për qëllime azilkërkimi në Belgjikë kanë të drejtë që të marrin informacion të saktë”, tha Freddy Roosemont, Drejtori i Pergjithshem i Emigracionit në Belgjike.

Muajt e parë të liberalizimit  të vizave nuk kishim probleme me Shqiperinë, por pas muajit gusht të këtij viti situata për shtetin belg është bërë shqetesuese.

Vetëm dy muajt e fundit ka pasur 161 kërkesa për azil nga Shqipëria, të cilat në shumicën dërrmuese të rasteve janë cilësuar si histori mashtrimi vetëm për të emigruar nga Shqipëria.