Tiranë – Kryetarja e Kuvendit, Jozefina Topalli deklaroi të hënën se maxhoranca është e angazhuar për të bashkëpunuar me opozitën për të gjitha ligjet, ndërsa theksoi se shpreson që opozita të tregojë me vepra ato që i ka shprehur me fjalë.

“Unë pres vepra pas fjalëve. Nuk kam përse të paragjykoj, ajo që unë mund të bëj si Kryetare e Parlamentit është që t’i nxis dhe inkurajoj për të bërë detyrën të gjitha forcat politike dhe dua të mendoj pozitivisht për secilin. Por, e vërteta është se bllokimi dhe bojkoti i kanë bërë shumë dëm vendit”, deklaroi Topalli, gjatë një konference për shtyp, pas takimit me deputetin e Bundestagut gjerman, Roderich Kieseëetter.

Ajo falenderoi për mbështetjen e jashtëzakonshme që Gjermania i ka dhënë Shqipërisë, duke theksuar intensifikimin e marrëdhënieve ekonomike, përmes rritjes së investimeve gjermane në vend.

Deputeti gjerman deklaroi se për statusin e vendit kandidat Shqipëria duhet të përmbushë detyrimet dhe të realizojë reformat. “Qeveria gjermane mbështet integrimin e Shqipërisë në BE. Po, për shkak të bojkotit në parlament Shqipëria ka humbur kohë të vlefshme dhe ka ardhur momenti për ta ndryshuar këtë”, theksoi deputeti Kieseëetter.

“Është në dorën e Shqipërisë që të marrë në dorë frenat dhe të gjithë ju e dini se sa shumë e dëshiron populli shqiptar hyrjen në BE. Për këtë arsye ne ju inkurajojmë për të ecuar përpara dhe për të përmbushur të gjitha detyrat që keni”, theksoi parlamentari gjerman.