Mitrovicë – Rrokulliste kontrabanduesi i mallrave të Serbisë në shpejtësin 120-150 km/h, pasi që tentoi t’i ikte Policisë së Kosovës. Kontrabanduesi përfundoi në spital me lëndime të lehta trupore.

Pas mesditës, njësitë e trafikut rajonal të Mitrovicës i janë përgjigjur një aksidenti në trafik, që ka rezultuar me lëndime trupore të një 21-vjeçari.

Aksidenti është raportuar të ketë ndodhur në rrugën magjistrale Mitrovicë- Prishtinë, përkatësisht në fshatin Stanovc të Vushtrrisë ka thënë policia. Aksidenti është shkaktuar nga vetë ngasësi i automjetit “Audi A4”, i cili besohej të kishte shkaktuar rrezikim të trafikut publik, duke tentuar të shmangej nga ndjekja e policisë së Kosovës për shkak të ngarkesës së mallrave të dyshuara të kontrabanduara në automjetin e tij.

Njësiti policor, anti–kontrabandë, ka identifikuar automjetin e dyshuar në rrugën magjistrale ndërsa ka filluar ndjekjen e tij, në pjesën e magjistrales te fshati Pestovë.

Ngasësi i automjetit nuk i ka përfillur urdhrat e dhëna për ndalim nga Policia e Kosovës ndërsa ka ngritur shpejtësinë e automjetit të cilin e drejtonte.

Besohet se i njëjti, ka lëvizur me shpejtësi prej 120 deri 150km/h. Me të arritur në fshatin Stanovc, ngasësi i dyshuar, me veturën e tij “Audi”, gjatë tejkalimit të një automjeti civil, prekë të njëjtin në anën e tij të majtë dhe me atë rast i njëjti humb kontrollin duke u rrokullisur jashtë rrugës.

I dyshuari D.K. (1990), banor i lagjes Bair të Mitrovicës, me lëndime trupore është dërguar në repartin emergjent në Vushtrri, për t’u transferuar në QKUK Prishtinë, për trajtim të mëtejmë. Në automjetin e dyshuar, policia ka identifikuar 104 shishe alkooli dhe 19 shishe birra të gjitha prodhim Serb.

Një sasi e mallit të paevidentuar, është dëmtuar gjatë aksidentit të shkaktuar. Automjeti i aksidentuar është tërhequr nga vendi i ngjarjes ndërsa mallrat e dyshuara të kontrabanduara i janë dorëzuar autoriteteve të doganave të Kosovës në Mitrovicë. Ndaj të dyshuarit, policia ka iniciuar rastin për rrezikim të trafikut publik dhe kontrabandim me mallra. (LajmeShqip.com)