Tiranë – Kompania “ACR” do të marrë parasysh kërkesat themelore të minatorëve të Bulqizës. Pas një takimi të zhvilluar në një nga lokalet e Tiranës, palët duket se arritën në një mirëkuptim për zhbllokimin e situatës.

Kërkesat e minatorëve do të diskutohen në mbledhjen e radhës që administratori i kësaj kompanie, Giga Bedineishvili do të zhvillojë në Austri me bordin drejtues.

“Ishte një takim informues dhe frytdhënës me punonjësit e mi. Kërkesat e tyre do të merren në konsideratë dhe së shpejti do të njoftoheni,” tha Bedineishvili.

Arritja në parim e kërkesave konfirmohet dhe nga vetë minatorët, por që gjithsesi shprehen të pakënaqur të një rezultati konkret.

Ndërkohë një palë e tretë e minatorëve, me qëndrime më radikale, e përfaqësuar nga Kol Nikolla, kreu i Konfederatës së Sindikatave të Minatorëve u shpreh se, nuk u arrit asnjë marrëveshje dhe se do të ketë një përshkallëzim të grevës së urisë dhe se në to do të futen edhe minatorë të tjerë. (LajmeShqip.com)