Prishtinë – Delegacionet e Prishtinës dhe të Beogradit do të bisedojnë sot në Bruksel për finalizimin e marrëveshjes në gjashtë tema të ndryshme, midis dy vendeve.

Në takimin e sotëm pritet të arrihet marrëveshje për për lirinë e lëvizjes, tregtinë e lirë, telekomunikacionin, energjinë, dokumentet katastralë dhe ata civilë.

Ekipet e Kosovës e të Serbisë në dialog duhet të kenë rrumbullakuar të gjitha modalitetet për temat që tashmë i kanë diskutuar në katër takime e mëparshme në Bruksel.

“Kosova nuk do të pranojë të diskutohet për tema të tjera, para se të arrihet pajtimi për këto që tashmë janë diskutuar”, ka thënë Visar Xani, këshilltar i udhëheqëses së delegacionit të Kosovës, zv/kryeministres Edita Tahiri.

Ndërkohë, shefi i ekipit të Serbisë në dialogun me Kosovën, Borislav Stefanoviq, ka paralajmëruar se në takimin e radhës në Bruksel do të arrihen zgjidhje për disa çështje konkrete. Ai ka thënë se zgjidhjet që do të arrihen nuk do t’i pëlqejnë opozitës në Serbi. (LajmeShqip.com)