Tiranë – Përmirësimi i klimës së biznesit mbetet boshti i orientimit të ekonomisë në ditët e sotme. Në kushtet kur rikthehet në vëmendje modeli i ri i ekonomisë, ekspertët e fushës vërejnë se aktualisht sektorët si bujqësia apo turizmi duhet të kenë mbështetjen më të madhe. Në projektet e saj qeveria ka përfshirë gjithmonë përmirësimin e klimës së biznesit dhe uljen e barrës fiskale si prioritet kryesor, për të fuqizuar motorin e zhvillimit ekonomik.

Modeli aktual i ekonomisë vlerësohet nga ekspertët si një model i vetëvendosur, kur prurjet e emigrantëve si dhe të ardhurat nga donatorët kanë rënë ndjeshëm.

Në këtë fazë, mbajtja e eksporteve në pikën më të lartë të kurbës, është edhe një nga faktorët kryesorë të zhvillimit. Në deklaratat e fundit publike të guvernatorit të Bankës së Shqipërisë është përmendur shpesh fakti i orientimit të ri të ekonomisë, që do të çonte në rritjen e prodhimit vendas dhe për rrjedhojë në rritjen e eksportit.