Procesi i rinumërimit të 439 vendvotimeve ka hyrë në fazën përfundimtare dhe në këtë mënyrë pritet që të përfundojë edhe i tërë procesi i shpalljes së rezultateve. Pavarësisht paralajmërimeve se një gjë e tillë mund të bëhet të enjten, në Qendrën e Numërimit të Rezultateve nuk e garantojnë një gjë të tillë për shkak të kompleksivitetit që ka procesi i rinumërimit. Koordinatori i QNR-së Burim Ahmetaj, ka arsyetuar mundësinë e mospublikimit të rezultateve përfundimtare deri ditën e enjte.

“Kryetarja e KQZ i ka paralajmëruar rezultatet përfundimtare për të enjten, mirëpo tash krejt varet prej volumit brenda kutive, pasi shumica e vendvotimeve janë me 300 apo 350 fletëvotime dhe ato marrin kohë më shumë, mirëpo kryesorja është që ne të mos e ndalim punën dhe më pas besojmë që deri të enjten do të përfundojë procesi dhe të bëhet shpallja e rezultateve përfundimtare”, ka thënë Ahmetaj. Ai ka bërë të ditur se puna do të vazhdojë pa u ndalur, ndërsa pas rinumërimit të tërësishëm të këtyre vendvotimeve do të bëhen krahasimet dhe analizat me numërimin e parë.

“Deri të premten në mbrëmje kemi rinumëruar 80 kuti, ndërsa procesi do të vazhdojë pa u ndalur. Dua të them se ende nuk i kemi bërë krahasimet nga numërimi i parë dhe rinumërimi, edhe pse KQZ i konsideron si rezultate finale votat e rinumëruara, mirëpo sidoqoftë krahasimet dhe analizat do t’i realizojmë pas rinumërimit të tërësishëm. Ne po punojmë intensivisht pa pauzë dhe puna duhet të vazhdojë”, ka thënë ai.