Beograd – Kuvendi i Serbisë ka zgjedhur të premten Qeverinë e re, e cila në katër vjetët e ardhshëm do të udhëhiqet nga socialisti Ivica Daçiq. Në favor të përbërjes së re qeveritare kanë votuar 142 deputetë, ndërsa kundër kanë qenë 72 dhe 26 të tjerë kanë munguar.

Qeveria e re ka 17 ministri dhe 19 anëtarë, ndërsa për kryerjen e punëve të rëndësishme që kanë të bëjnë me Kosovën, të drejtat e njeriut dhe të pakicave, kishën dhe bashkësitë fetare, ashtu si edhe diasporën, është thënë se do të formohen shërbime të posaçme.

Daçiq, përveç postit të kryeministrit, mban edhe atë të ministrit të Punëve të Brendshme, ndërsa në koalicion marrin pjesë Partia Përparimtare e Serbisë, Partia Socialiste e Serbisë dhe disa subjekte më të vogla politike.

Mandati i Qeverisë së re ka nisur pasi ministrat kanë dhënë betimin, me të cilin ata janë zotuar “për besnikëri ndaj Republikës së Serbisë, për respektimin e Kushtetutës dhe të ligjit, për kryerjen e detyrimeve me ndërgjegje, përgjegjësi dhe përkushtim, si dhe për ruajtjen e Kosovës brenda Republikës së Serbisë”.

Në prezantimin e tij para Kuvendit, Daçiq ka premtuar se do të përshpejtohet integrimi evropian i Serbisë, se prioritet i ekzekutivit të ri do të jetë rimëkëmbja ekonomike e vendit dhe se Serbia nuk do të njohë Kosovën, porse “do të zbatojë marrëveshjet e arritura në dialog me Prishtinën”.

Ai ka thënë se Serbia do të orientohet kah e ardhmja dhe jo e kaluara dhe se mbështet pajtimin në rajon, marrëdhëniet më të mira me fqinjët, respektimin e Marrëveshjes së Dejtonit dhe forcimin e marrëdhënieve me Republikën Serbe.

Serbia ka formuar qeverinë e re më shumë se dy muaj pas zgjedhjeve republikane, të mbajtura më 6 maj, dhe një muaj pasi lideri socialist, Ivica Daçiq, ka fituar mandatin nga presidenti Tomisllav Nikolliq.

Qeveria e Daçiqit është e 12-ta me radhë që nga viti 1990, kur në Serbi ka hyrë në fuqi sistemi shumëpartiak. Pranim-dorëzimi i përgjegjësive në mes të kryeministrit Ivica Daçiq dhe paraardhësit të tij, Mirko Cvetkoviq, pritet të bëhet pas orës 14.

Kjo është përbërja e Qeverisë serbe:
Kryeministër dhe ministër i Brendshëm Ivica Daçiq (SPS)
Zëvendëskryeministër dhe ministër i Mbrojtjes Aleksandar Vuçiq (SNS)
Zëvendëskryeministre dhe ministre pa portofol Suzana Grubjeshiq (URS)
Zëvendëskryeministër dhe ministër i Punës Jovan Kërkobabiq (PUPS)
Zëvendëskryeministër dhe ministër i Tregtisë dhe Telekomunikacioneve Rasim Lajiq (SDPS)
Ministër i Jashtëm Ivan Mërkiq
Ministër i Drejtësisë Nikola Selakoviq (SNS)
Ministre e Energjetikës Zorana Mihajloviq (SNS)
Ministër i Minierave Milan Baçeviq (SNS)
Ministër i Bujqësisë Goran Knjezheviq (SNS)
Ministër i Kulturës dhe Medias Bratislav Petkoviq (SNS)
Ministre e Sportit Alisa Mariq
Ministër i Urbanizmit Velimir Iliq (Nova Serbija)
Ministre e Shëndetësisë Slavica Gjukiç Dejanoviq (SPS)
Ministër i Transportit Milutin Mërkonjiq (SPS)
Ministër i Arsimit Zharko Obradoviq (SPS)
Ministër i Financave Mlagjan Dinkiq (URS)
Ministre e Zhvillimit Rajonal Verica Kalanoviq (URS)
Ministër pa portofol Sulejman Ugljanin. (LajmeShqip.com)