Tiranë – Këshilli i Sigurimit i Kombeve të Bashkuara diskuton të hënën për zhvillimet e fundit tremujore në Kosovë, ndërsa material bazë do të jetë raporti i Sekretarit të Përgjithshëm të OKB-së, Ban Ki-moon.

Në fillim të raportit të tij Ban Ki-Moon vlerëson se “pas konkluzioneve të suksesshme të diskutimeve për çështjet kryesore në dialog, Beogradi dhe Prishtina, i kanë avancuar planet e tyre evropiane”. Në këtë aspekt përmendet se Bashkimi Evropian i dha Serbisë statusin e kandidatit dhe se më 27 mars, Komisioneri për Zgjerimin formalisht lancoi studimin e fizibilitetit për Marrëveshjen e Stabilizim-Asociimit BE-Kosovë.

“Kjo shënon zhvillimin më pozitiv në periudhën raportuese që ka dalë nga progresi konkret në dialogun e lehtësuar nga Bashkimi Evropian”, thuhet në raport.Por, këto zhvillime kanë rënë nën hijen e “tensioneve në rritje në terren gjatë pjesës së fundit të periudhës raportuese”, theksohet në raportin e Ban Ki-moonit, duke shpjeguar se kjo i atribuohej pjesërisht “përgatitjeve për zgjedhjet serbe më 6 maj dhe kundërthëniet shoqëruese për votimin në Kosovë”.

Në raportin e gjatë të Ban Ki-moon theksohen dallimet ekzistuese “të pikëpamjeve ndërmjet palëve dhe ndërmjet komunitetit serb në të dy anët e lumit Ibër”.
Derisa “serbët e Kosovës, që marrin pjesë në institucionet e Kosovës, e hodhën poshtë nevojën e mbajtjes së zgjedhjeve lokale në Kosovë, shumë të tjerë kërkuan që ato të mbahen në harmoni të plotë me ligjin e Serbisë”.

Ban Ki-moon kujton se përfaqësuesi i tij special “kishte shkëmbyer korrespondencë me qeverinë e Serbisë, që kishte rezultuar me marrëveshje për të mos organizuar zgjedhje lokale në Kosovë në maj, por për ta rishqyrtuar këtë çështje në një datë të ardhshme”. (LajmeShqip.com)