Prishtinë- Pikëkalimi 1 në Jarinje është hapur nga mëngjesi i sotëm për qarkullim të mallrave tregtare si pjesë e procesit të normalizimit të përgjithshëm të kontrolleve doganore në veri të Kosovës, në kufirin me Serbinë.

Pas këtyre masave, sipas njoftimit të sapodhënë nga EULEX, pikëkalimet 1 dhe 31 tani janë plotësisht funksionale për qarkullimin e mallrave komerciale dhe jo-komerciale.

Në korrik 2011, pikëkalimi 1 ishte mbyllur përkohësisht për qarkullimin komercial për shkak të incidenteve të dhunshme të cilat i lanë pas objektet e dëmtuara të cilat kishin nevojë për riparime.

Në të dyja pikëkalimet, kontrollet bëhen nga policët dhe doganierët e EULEX-it, në bashkëpunim me kolegët e tyre nga Policia dhe Dogana e Kosovës.

Zhdoganimi i mallrave komerciale bëhet në Terminalin e Mitrovicës. Importet e mallrave me akcizë, si alkooli, cigaret dhe karburanti, do të vazhdojnë të lejohen vetëm nëpërmjet pikëkalimit në Merdarë.

Ndërkohë, EULEX-i është duke zhvilluar një fushatë të informimit publik me fletushka dhe spote në radio për të informuar popullatën lokale lidhur me procedurat në këto pikëkalime. (LajmeShqip.com)