Tel Aviv – Izraeli i ka hequr statusin VIP presidentit palestinez, Mahmud Abaz dhe i dha leje për udhëtim që vlen vetëm dy muaj, lajmëruan mbrëmë përfaqësuesit zyrtar palestinezë.

Ndaj kësaj ngjarje Abaz u ankua javën e kaluar gjatë takimit të organizatës së tij-Fatah, duke deklaruar se leja e re është e ngjashme me atë që u nevojitet punëtorëve palestinezë për hyrje në Izrael dhe është reflektim i vazhdimit të kontrollit të këtij vendi ndaj palestinezëve, duke sugjeruar se Izraeli po përpiqet ta dënojë sepse kërkoi anëtarësim të Palestinës në KB.

Zëdhënësi i agjencisë izraelite që i jep dokumentet e udhëtimit për palestinezët, majori Gaj Inbar, deklaroi se nuk ka ndryshim në politikë dhe se leja është rezultat i lëshimit teknik, që së shpejti do të mënjanohet.

Ai theksoi se liria e lëvizjes mbetet e njëjtë, siç ishte.

Leja VIP i mundësonte Abazit të udhëtojë ku të dëshirojë dhe kur të dëshirojë, kujtojnë mediat amerikane.

Përfaqësuesit zyrtar palestinezë deklaruan se leja e re nuk e pengon Abazin, i cili shpesh i viziton qytetet kryesore në botë, të dalë dhe të hyjë në Bregun perëndimor. Ai sot udhëton për në Londër, ku do të takohet me liderët britanikë.