Tropojë –  Nën bardhësinë e dëborës, ndërrimin e viteve  në Valbonën turistike e kanë pritur me  fishekzjarrë e brohoritje  gëzimi dhe  urime mjaft turistë të huaj.

“Ndërrimin e viteve  e kanë pritur në Valbonë krahas banorëve vendas dhe mjaft të ftuar nga qyteti i Bajram Currit, si dhe 40 turistë të huaj”,  thotë kryetari i komunës së Margegajt,  Rexh Biberaj. Sipas tij, turistët e huaj kanë kaluar natën e vitit të ri bashkë me të rinjtë e fshatit e banorë të tjerë duke  festuar deri në orët e para të mëngjesit.

Prej  tre vjetësh është bërë e zakonshme  që turistë të huaj të jenë të pranishëm  për  festat e fundvitit  në pikën turistike të Valbonës.  Kjo ka bere qe te rritet vit pas viti  numri i turistëve të huaj që vizitojnë këtë pikë të njohur turistike.

Gjatë vitit të kaluar  numri i vizitorëve të huaj  që kanë qëndruar disa ditë në  këtë pikë turistike arriti në  mbi 25 mijë, nga rreth 15 mijë vizitorë që ishin në vitin 2010.  “Këtë vit parashikohet që numri i vizitorëve të huaj të arrijë në mbi 30 mijë, gjë që e vlerësojmë kryesisht nga  marrëdhëniet që kemi krijuar  me kompanitë turistike”, thotë Biberaj.