Shefja e delegacionit të Kosovës, zëvendëskryeministrja Edita Tahiri, u shpreh e bindur se më 9 dhjetor, Këshilli i BE-së do ta shpërblejë Kosovën në sajë të rolit të saj konstruktiv në bisedime me Beogradin.

Ky shpërblim, sipas Tahirit, do të jetë marrja e udhërrëfyesit për liberalizimin e vizave dhe vënia e marrëdhënieve kontraktuale me BE-në.

“Është parashikuar një pako shpërblimesh për Kosovën për procesin e antarësimit në BE. E kjo pako përmban udhërrëfyesin për liberalizimin e vizave, marrëdhëniet kontraktuale përmes nënshkrimit të marrëdhënieve të para tregtare dhe programet e tjera mbështetëse për Kosovën, pako kjo që Këshilli Evropian do t`ia konfirmojë Kosovës më 9 dhjetor”, tha Tahiri.

Por, këtë optimizëm të Tahirit e hodhi poshtë Ilir Deda, këshilltar i presidentes së Kosovës, Atifete Jahjaga. Ai tha se informacionet nga Brukseli janë se më 9 dhjetor ndoshta nuk do të hapet as marrëveshja kontraktuale e as marrëveshja për marrëdhënie tregtare.

Ndërsa për fillimin e dialogut për liberalizimin e vizave, sipas Dedës kjo nuk mund të merret si një përparim, sepse është një proces që do të duhej të kishte nisur kohë më parë, e që mundësitë janë të mos nisë as tani.

Ambasadori i Britanisë së Madhe, Ian Cliff, tha se është e rëndësishme zbatimi i marrëveshjeve të arritura dhe se kjo është ajo çfarë qeveria e Britanisë dëshiron të shohë gjatë muajve të ardhshëm.

“Ne ia kemi bërë me dije popullit të Kosovës se dialogu me të vërtetë është në interes të Kosovës”, ka theksuar Cliff.