Prishtinë – Në pikën kufitare në Merdar është arrestuar serbi Todor Milorad Doshaleviç, 1971, nga Hoça e Madhe e Rahovecit, me vendbanim në Jagodinë të Serbisë. Ai në pikën kufitare në Merdar kishte hyrë me flamurin serb, në gjatësi prej 2 metrash, që e kishte ngritur në veturën e tij të tipit “Pasat” me targa PZ 422 27, thuhet në një njoftim të policisë.

Todori pasi ishte urdhëruar nga Policia kufitare e Kosovës për të hequr flamurin serb nga vetura, ai kishte nisur të fyejë policinë dhe popullin e Kosovës, me fjalët se “këtu është Serbi e nuk njoh polici as Gjykatë të Kosovës” etj.

Dyzetvjeçarit nga Hoça e Rahovecit, pensionist invalidor pas arrestimit nga policia i janë gjetur edhe 6000 mijë euro, që dyshohet se i kishte sjellë për t’ua shpërndarë shokëve të tij në Kosovë, për të marrë pjesë në shënimin e ditës së Vidovdanit.

Todor Doshaleviç pasi është sjellë para kryetarit të Gjykatës për Kundërvajtje në Podujevë, Sabit Çitaku, ka refuzuar të japë deklaratë dhe ka kërkuar të jenë prezent KFOR-i dhe UNMIK-u. Ai së pari është dënuar për veprën kundërvajtje, me një gjobë prej 450 eurosh dhe pasi ka refuzuar aktvendimin e kryetarit të Gjykatës, ka pasuar vendimi tjetër me burg prej 30 ditësh, vendim i cili është ekzekutuar menjëherë.

Doshaleviç, në bazë të veprimeve të tij dhe si pensionit invalidor, dyshohet të ketë marrë pjesë edhe në krime monstruoze ndaj shqiptarëve gjatë luftës.