Lajme Shqip Saturday, 10 December 2011 16:30

Kukës – Reshjet e ditëve të fundit kanë nxjerrë në pah rrezikun nga rrëshqitja e tokës, një fenomen  gjithnjë e  më shumë i pranishëm  në zonën verilindore.  Edhe pse me intensitet të ulët reshjet e  shiut shfaqen fenomenin e rëshqitjes së tokës në  aksin rrugor Kukës –  Shishtavec në afërsi të fshatrave Bele  dhe Nimcë,  në aksin rrugor që kalon përmes grykës së Vanave.  Po ashtu,  fenomeni u rishfaq edhe në zonën e  Ujmishtit e në ndonjë zonë tjetër  të rrethit të Kukësit.

“Fenomeni i rrëshqitjes  së  tokës  është  duke u zgjeruar dhe ka prekur disa fshatra.  Prej këtij fenomeni janë precur   fshatra  si,  Bele, Nimcë,  Lojme, Kolosjan, Vilë, fshatrat e zonës së  Ujmishtit  etj”, thotë përgjegjësi i zyrës së emergjencës civile në prefekturën e Kukësit,  Azem Tema.

Thuajse të njëjtën gjë e pohon edhe  përgjegjësi i zyrës së urbanizim- kadastrës në komunën e Ujmishtit, Dervish Tushe.  “Zona e Ujmishtit është nga më të prekura  nga rrëshqitja e tokës. Me këtë fenomen jemi mësuar  dhe rreziku i rrëshqitjes është i përhershëm, megjithë masat që kemi marrë për minimizimin e rrezikut”, thotë  Tushe.

Rreziku nga  rrëshqitja  e  tokës  në zonën verilindore  ka ardhur duke u zgjeruar si  rrjedhojë e  dëmtimit të masiveve pyjore, të lënies djerr të tokës  e të prerjeve pa kriter të drurëve.  Është kjo arsyeja që tashmë  fenomeni  është i pranishëm  në më shumë se  15 fshatra të rrethit të Kukësit.