Lajme Shqip Thursday, 16 May 2013 11:10

Prishtinë – LDK-ja dhe Vetëvendosja kërkojnë që zgjedhjet lokale të mbahen në vjeshtë. Koha e përshtatshmë për zgjedhje sipas tyre është pjesa e dytë e shtatorit, apo fillimi i tetorit, në mënyrë që të evitohet vjedhja e votave si në zgjedhjet e kaluara. Pikërisht për këtë fakt LDK-ja është e bindur se i humbi zgjedhjet e kaluara.
E për Vetëvendosjen, nëse presidentja Jahjaga nuk e cakton datën e zgjedhjeve deri më 29 maj, atëherë ajo do të bëhet bashkëfajtore në procesin e vjedhjes së votave. Albulena Haxhiu ka thënë se Kushtetuta e Kosovës dhe ligjet në fuqi përcaktojnë se zgjedhjet duhet të mbahen në mënyrë periodike çdo katër vjet.
Por, shoqëria civile vlerëson se Presidentja po pret takimin e radhës mes kryeministrave Hashim Thaçi dhe Ivica Daçiq në Bruksel, për të shpallur datën e zgjedhjeve lokale. Ndërsa këshilltari i presidentes Atifetet Jahjaga, Arbër Vllahiu, i ka thënë KTV-së se presidentja do ta caktojë datën e zgjedhjeve lokale atëherë kur të përfundojnë të gjitha konsultimet me të gjithë liderët e partive politike.

 
Lajme Shqip Tuesday, 14 May 2013 15:57

Një delegacion i Lëvizjes Vetëvendosje, në përbërjen e Albin Kurtit, kryetar i saj dhe i Komisionit për Punë të Jashtme në Kuvendin e Kosovës, Shpend Ahmeti, nënkryetar i parë, Visar Ymeri, deputet dhe kryetar i Grupit Parlamentar të Vetëvendosjes në Kuvendin e Kosovës, Florin Krasniqi, deputet i kësaj lëvizjeje dhe Boiken Abazi, koordinator i sekretariateve në Lëvizje, do të qëndrojnë për një vizitë pune në Shtetet e Bashkuara të Amerikës duke filluar nga data 24 maj, u njoftua përmes një komunikate.

Gjatë qëndrimit në SHBA ky delegacion do zhvillojë takime me përfaqësues dhe organizata të shtetit dhe me komunitetin shqiptaro-amerikan në SHBA. Anëtarët e tij do t’i informojnë mikpritësit me situatën aktuale ekonomiko-politike në Kosovë.

 Sipas komunikatës, delegacioni do të qëndrojë në Washington DC, New York, Boston, Detroit, Chicago dhe Dallas.

 Albin Kurti është i ftuar në cilësinë e kryetarit të Komisionit për Punë të Jashtme të Kuvendit të Kosovës për t’i mbajtur disa ligjërata në disa organizata në SHBA, dhe po ashtu në këtë cilësi do të zhvillojë edhe takime me kongresmenë e përfaqësues të tjerë të shtetit amerikan. 

 
Lajme Shqip Sunday, 22 January 2012 16:02

Prishtinë (PLOTËSUAR, 23 Janar 02:59) – Në njoftimin e Vetëvendosjes pranohet se protesta është e dështuar dhe nuk ka sjllë rezultatet e pritura, me ç’rast edhe kanë njoftuar për përmbylljen e protestës, të dërguar në orët e para të ditës së sotme. Shpend Ahmeti iu është drejtuar protestuesve duke thënë “Duke qenë se u bë i pamundshëm qëndrimi te Dheu i Bardhë ku tashmë hynë veturat dhe maunet me mallra serbe, u vendos që tani nuk është më e arsyeshme që të bllokohet Serbia vetëm në njërën pikë kufitare. Protesta paqësore në mbrojtje të Republikës për prodhimin vendor dhe kundër Serbisë do të vazhdojë në të ardhmen edhe në forma të tjera, për çfarë  do të njoftoheni me kohë”, ka deklaruar Ahmeti.

Ndërsa njoftimi i plotë është në vijim: “Për shkak të kufizimeve që janë bërë nga policia në aspektin logjistik dhe teperaturës së ultë që po mbizotëron atje, është bërë i pamundur qëndrimi i sigurtë i protestuesve në Merdar.

Në ora 00:30 policia e Kosovës e ka arrestuar aktivistin Veton Dragusha, i cili ishte i angazhuar në bartjen e batanijeve, ushqimit, reflektorëve, e gjësendeve tjera, duke i konfiskuar ato. Këto ishin mëtuar që t’ua mundësonte protestuesve qëndrimin e sigurtë në Merdar.  Njëkohësisht policia i ka bllokuar të gjitha rrugët e kryesore për në vendin e protestës, më qëllim të bllokimit të komunikimit mes qendrave urbane dhe protestës.

Në orën 01:35, përfaqësuesit e Lëvizjes VETËVENDOSJE! e kanë mbyllur protestën e sotme në Merdar që ishte organizuar në mbrojtje të Republikës dhe prodhimeve të vendit.
Në shenjë përgjegjësie për mirëqenien e protestuesve, udhëheqësit e Lëvizjës VETËVENDOSJE! u kanë kërkuar atyre që të shpërndahen në mënyrë të qetë.

Shpend Ahmeti iu drejtua protestuesve dhe gazetarëve të pranishëm: “Duke qenë se u bë i pamundshëm qëndrimi te Dheu i Bardhë ku tashmë hynë veturat dhe maunet me mallra serbe, u vendos që tani nuk është më e arsyeshme që të bllokohet Serbia vetëm në njërën pikë kufitare. Protesta paqësore në mbrojtje të Republikës për prodhimin vendor dhe kundër Serbisë do të vazhdojë në të ardhmen edhe në forma të tjera, për çfarë  do të njoftoheni me kohë.”

Me 14 janar dhe sot nga fillimi i protestës e deri në mbylljen e saj, në Kosovë, nuk ka hyrë asnjë maune me mallra të Serbisë dhe asnjë veturë me targa të Serbisë. Pra, këto dy ditë në Kosovë u zbatua reciprociteti.

Lëvizja VETËVENDOSJE! falenderon të gjithë qytetarët që na kanë mbështetur, qoftë me prezencën fizike duke marrë pjesë masivisht në protestat tona, apo edhe përmes ndihmës së ofruar me ushqim dhe materiale të ndryshme.

Protesta paqësore e sotme e demokratizon republikën. Reciprociteti e mbron republikën dhe na i forcon kufijtë shtetëror”, thuhet në njoftimin e Vetëvendosjes.

************************

Dheu i Bardhë (PLOTËSUAR, 23 Janar 01:00) – Vetëvendosje përmes një njoftimi ka dërguar një njoftimin për ndërprerjen e protestës te Dheu i Bardhë.  Siç ka njoftuar Gazeta Express, kjo nuk duket të jetë arsye kryesore e ndërprerjes së protestës. Policia ka bërë të ditur se rreth orës 22:05 në rrugën magjistrale Gjilan-Ferizaj, gjegjësisht në fshatin Radivojcë komuna e Vitisë, në autobusin të cilin udhëtonin protestuesit e “Vetëvendosjes” të cilit ishin duke u kthyer për Prizren- Dragash, ka ndodhur një incident, ku si pasojë e incidentit një person është therur me thikë.

Sipas policisë, viktima është i lënduar në dorën e majtë dhe sipas vlerësimit të mjekëve është jashtë rrezikut për jetë. “Viktima gjendet në Emergjencën e Spitalit Regjional në Gjilan. Njësiti policor nga stacionit policor i Vitisë ka ndaluar autobusin dhe është në kërkim të personit të dyshuar si dhe është duke intervistuar disa persona ne cilësi te personave të dyshuar lidhur me rastin”, thuhet në njoftim.

Merret vesh se shkaku kryesor është se te kjo pikë kufitare ka ndodhur një incident mes vetë protestuesve. Aty ka ndodhur një rrahje masive mes protestuesve nga Gjilani dhe atyre nga Ferizaj. Shkas i kësaj është bërë ajo se kush do të hynte më parë në autobusë.

Ndërkohë që Vetëvendosje ka njoftuar se disa nga protestuesit që ishin tek Dheu i Bardhë janë nisur për t’iu bashkuar protestuesve në Merdarë. Vetëvendosje nuk e ka qartësuar nëse protesta tek Dheu i Bardhë do të vazhdon të nesërmen.

Njoftimi i plotë i Vetëvendosjes është me sa vijon: “Me 14 Janar, pushteti provoi të shtyp me dhunë protestën paqësore, derisa me 22 Janar qeveria zgjodhi metoda tjera për të pamundësuar mbarëvajtjen e protestës. Kjo luftë speciale nga qeveria e Kosovës ka vazhduar gjatë tërë ditës. Janë penguar nga policia të gjitha mjetet logjistike të cilat do t’i ndihmonin protestuesve për t’i tejkaluar temperaturat shumë të ulta, si tendat, drunjtë për ngrohjë, reflektorët, gjeneratorët, ushqimet dhe pijet.

Për shkak të kufizimeve që janë bërë nga policia në aspektin logjistik që ka pamundësuar qëndrimin e sigurtë të protestuesve te Dheu i Bardhë, përfaqësuesit e Lëvizjes VETËVENDOSJE! në mënyrë të përgjegjshme e kanë mbyllur protestën e sotme te Dheu i Bardhë. Një numër i protestuesve kanë vazhduar rrugëtimin për t’iu bashkangjitur protestës në Merdare.

Rreth orës 22.00 pas shpalljes se mbylljes se protestes ka pasur një problem mes disa protestuesve, por jo për arsye politike. Kanë qenë probleme personale dhe të izoluara. Me këto merret policia dhe kjo nuk ka lidhje me anulimin e protestës.

Sikurse tek Dheu i Bardhë, ashtu edhe në Merdare, udhëheqësit e Lëvizjes i kanë bërë vazhdimisht thirrje protestuesve që të jenë të qetë dhe të matur. Ata thanë se kushdo që nuk i përmbahet skenarit paqësor do të konsiderohet se nuk është pjesë e Lëvizjes tonë dhe se nuk janë të mireseardhur të qëndrojnë në mesin e protestuesve”, thuhet në njoftimin e dërguar më herët.

************************

Merdare (PLOTESUAR, 22 Janar 22:30) Vazhdon edhe natën protesta e Lëvizjes Vetëvendosje në dy vendkalimet kufitare me Serbinë, Merdare dhe Dheu i Bardhë.

Subjekti politik i përfaqësuar në Kuvendin kosovar me 12 deputetë deklaroi sot në mbrëmje se, “nuk ka synim t’i marrë nën kontroll pikat kufitare, por të bëj të mundur që të merren nën kontroll nga shteti i Kosovës”.

Lëvizja Vetëvendosje në njoftimet e saj të fundit thekson edhe se, sikurse tek Dheu i Bardhë, ashtu edhe në Merdare, udhëheqësit e saj, i kanë bërë vazhdimisht thirrje protestuesve që të jenë të qetë dhe të matur.

Ata thanë se “kushdo që nuk i përmbahet skenarit paqësor do të konsiderohet se nuk është pjesë e Lëvizjes dhe se nuk janë të mirëseardhur të qëndrojnë në mesin e protestuesve”.  

************************

Dheu i Bardhë (PLOTESUAR, 22 Janar 21:50) Lëvizja Vetëvendosje përmes një njoftimi për media ka thënë se tek protesta që po zhvillohet në afërsi të pikës kufitare Dheu i Bardhë, “Policia e Kosovës po e ndalon dhe pamundëson depërtimin e ushqimit dhe materialeve logjistike që janë esenciale për mirëqenien e protestuesve që po vazhdojnë të qëndrojnë atje”.

Në të njejtën kohë, thuhet në njoftimin e Vetëvendosjes, Policia e Kosovës “po ushtron presion ndaj protestuesve duke i detyruar vozitësit e autobusëve që të afrohen tek protestuesit dhe t’i mbledhin ata nga vendi i protestës. Ata iu kanë dhënë vozitësve të autobusëve afat prej 20 minutave për t’u kthyer mbrapa me apo pa protestuesit”.

Po ashtu, njofton VV, edhe “afër vendit ku po protestohet në Merdare policia ka ndaluar furgonin që bartte drunj për ngrohje duke i konfiskuar drunjtë dhe duke e përcjellë vozitësin për në stacionin e policisë”.

“Policia kësaj radhe në vend të intervenimit po privon protestuesit nga gjërat elementare, si ushqim, pije  dhe ngrohje, duke rrezikuar kështu shëndetin e të gjithë atyre që po vazhdojnë të qëndrojnë në protestë paqësore. E dënojmë këtë akt të dhunshëm”, thuhet në njoftimin e Vetëvendosjes.

Më herët, zëdhënësi i Policisë së Kosovës, Baki Kelani tha se ka informacione për konfiskimin e materialit logjistik për protestuesit afër pikës Dheu i Bardhë, por se ky informacion nuk ishte konfirmuar zyrtarisht.

 ************************

Prishtinë (PLOTESUAR 22 Janar, 21:00)-Në protestën e Lëvizjes Vetëvendosje, që ka filluar rreth mesditës, e po vazhdon edhe në mbrëmje, sipas Policisë së Kosovës, nuk janë shënuar incidente.

Situata është e qetë, ndërsa rrugët vazhdojnë të jenë të hapura në një korsi.”Përveç rastit të ndalimit të një personi, nuk ka pasur asnjë incident në vendkalimin kufitar në Merdare dhe te Dheu i Bardhë”, tha pak më parë në studion e një televizioni, Baki Kelani, zëdhënës i Policisë së Kosovës.

Sipas tij, numri i protestuesve është në rënie në orët e mbrëmjes. Nga terreni bëhet e ditur se protestuesit pranë dy vendkalimeve kufitare me Serbinë, Merdare dhe Dheu i Bardhë, kanë ndezur zjarre për t’u ngrohur në këtë mbrëmje të ftohtë dimri, ndërsa kanë paralajmëruar se do të qëndrojnë edhe natën në protestë.

************************

Merdare (PLOTESUAR 22 Janar, 20:10) Vetëvendosje ka hedhur poshtë deklaratën e Policisë së Kosovës se në pikën kufitare të Merdares kanë kaluar pesë kamionë me mallra të ndryshme si dhe tre kamionë të tjerë kanë nëpër pikëkalimin kufitar Dheu i Bardhë.

Aktivistë të Vetëvendosjes që ndodhen në të dy pikat kufitare mes Kosovës dhe Serbisë ku protesta po zhvillohet tashmë prej 7 orësh, kanë thënë për LajmeShqip.com se nuk ka kaluar asnjë kamion me mallra serbe.

Ata hedhin poshtë deklaratat e policisë duke garantuar se për kaq orë ka patur reciprocitet të plotë tregtar me Serbinë.

Ata thonë se madje vetë policia ka bllokuar kalimin e automjeteve për shkak të protestës dhe se për këtë arsye nuk ka asnjë mundësi që të kalojnë maunet me mallra serbe.

************************

Prishtinë (PLOTESUAR 22 Janar, 19:10) Qeveria e Republikës së Kosovës, në një deklaratë të dhënë pak më parë për mediat, rithekson edhe një herë faktin se e drejta për të protestuar në mënyrë paqësore është e drejtë e garantuar me Kushtetutën dhe ligjet e Republikës së Kosovës.

“Kjo e drejtë nuk do të vihet asnjëherë në pikëpyetje, por një gjë e tillë nuk mund të keqpërdoret nga askush dhe për asnjë qëllim”, thekson deklarata. Qeveria e Kosovës bën të ditur se është duke ndjekur nga afër zhvillimet e sotme që lidhen me protestën politike të Lëvizjes Vetëvendosje.

Sipas qeverisë kosovare, “kjo protestë që është krejtësisht e panevojshme dhe në kundërshtim me vendimet e Kuvendit të Republikës së Kosovës, ka shkaktuar vështirësi në qarkullimin e lirë të qytetarëve dhe mallrave, por Policia e Kosovës është përkujdesur që liria e lëvizjes të jetë e garantuar dhe që rrugët të mos bllokohen”.

Qeveria i jep mbështetje të plotë Policisë së Kosovës në zbatimin e plotë të kompetencave ligjore për mos lejimin e bllokimit të rrugëve, pengimit të lëvizjes së lirë të qytetarëve dhe të mallrave, apo marrjen nën kontroll të pikave kufitare shtetërore.

“Qeveria e Kosovës shpreh konsideratën e saj të lartë për qytetarët e Kosovës, të cilët janë distancuar nga veprime të tilla të panevojshme politike të nxitura nga Lëvizja Vetëvendosje, të cilat në mënyrë serioze e dëmtojnë imazhin e shtetit tonë”, thekson deklarata.

Qeveria siguron gjithashtu të gjithë qytetarët e Kosovës se, është shumë e përgjegjshme në respektimin e vendimeve të Kuvendit të Kosovës, të cilat janë në përputhje me aspiratat tona për integrime euro-atlantike.

“Prandaj, protestat politike të Lëvizjës Vetëvendosje nuk do të mund të lëkundin themelet e shtetit tonë demokratik, i cili është i përcaktuar për fqinjësi të mirë, për ekonomi të tregut të lirë dhe për integrime euroatlantike”, përfundon deklarata e Qeverisë së Kosovës.

 ************************

Podujevë (PLOTESUAR 22 Janar, 18:40) Protestuesit e Lëvizjes Vetëvendosje vazhdojnë të qëndrojnë edhe në mbrëmje në afërsi të dy pikave kufitare të Kosovës me Serbinë, Merdare dhe Dheu i Bardhë.

Sipas Vetëvendosjes, “protesta po realizohet në mënyrë paqësore dhe në mbrojtje të Republikës” dhe numri i protestuesve është dukshëm më i madh se më 14 janar 2011.

Edhe Policia e Kosovës ka njoftuar se, situata në të dy lokacionet ku po mbahet protesta është e qetë. Gjatë pasdites dhe në mbrëmje ka pasur raportime për komunikime mes përfaqësuesëve të Lëvizjes Vetëvendosje dhe të Policisë së Kosovës.

************************

Morinë (PLOTESUAR 22 Janar, 17:50)- Aktivistët e nisur nga Tirana, kanë arritur të kalojnë kufirin mes Shqipërisë dhe Kosovës.

Ata kanë hyrë në këmbë në pikën kufitare të Morinës, pasi policia ktheu mbrapsht autobusët me të cilët ishin nisur.

Sot nga Tirana u nisën dy autobusë me gati 100 aktivistë por tashmë kanë mbetur vetëm 50 prej tyre pasi një pjesë e mirë arritën të kalojnë fshehurazi me automjete private.

Ata kanë deklaruar për portalin LajmeShqip.com se ka qënë ndërhyrja e zyrës së avokatit të popullit të Kosovës që ka bërë të mundur kalimin e tyre.

Tani aktivistët janë në këmbë dhe po presin një autobus nga Prizreni që do ti marrë ata dhe do ti çojë drejt pikës kufitare të Merdarës.

************************

Morinë (PLOTESUAR 22 Janar, 17:00)- Aktivistët e nisur nga Tirana, vazhdojnë të qëndrojnë në kufirin mes Shqipërisë dhe Kosovës, në pritje që policia kufitare e Kosovës ti lejojë ata të futen në territorin e Kosovës.

Ata kanë deklaruar për portalin LajmeShqip.com se janë të vendosur të kalojnë kufirin dhe do të bëjnë tentativën e rradhës për të hyrë në këmbë. Por policia ka kërcënuar se do ti arrestojë në rast se bëjnë këtë përpjekje.

************************

(Podujevë 16:00) Policia ka përgënjeshtruar deklaratat e përfaqësuesve të Vetëvendosjes, se sot në Mërdare nuk ka kaluar asnjë kamion nga Serbia dhe te Dheu i Bardhë.

Sipas policisë,  gjate ditës se sotme në pike kalimin kufitare Merdare kanë kaluar pesë kamionë me mallra të ndryshme si dhe tre kamionë të tjerë kanë kaluar në pikën kalimin kufitarë Dheu i Bardhë.

Sipas policisë qarkullimi është duke u zhvilluar normalisht ne dy pike kalimet kufitare.

Ndërsa sa i përket protesëts policia thotë se nuk është lajmëruar ne Policinë e Kosovës ashtu siç e thuahet në ligjin mbi Tubimet Publike.

************************

(Dheu i Bardhë 15:50 )Lëvizja Vetëvendosje njofton se forca të shtuar të njësisë speciale të Policisë së Kosovës kanë rrethuar protestuesit te Dheu i Bardhë.

Nuk dihet nëse policia po përgatitet për t’i shpërndarë protestuesit e mbledhur në këtë pikë kufitare.

Më herët, protestuesit e Vetëvendosjes në afërsi të pikës kufitare Dheu i Bardhë kanë kthyer prapa një veturë me targa serbe të Smederevës.

Ardhja e kësaj veture ka irrituar protestuesit, të cilën e kanë shkulur njërën targë nga vetura, e cila nën mbrojtje të policisë është kthyer prapa.

Po ashtu raportohet se, te Dheu i Bardhë, një veturë me targa “GL” është kthyer mbrapsht për në Serbi nga policia, pas reagimit të protestuesve

****************

(Podujevë 15:46)- Sipas njoftimeve më të fundit, në pikëkalimin kufitar në Merdare nga ana e Serbisë në Kosovë ka kaluar një maune e Maqedonisë, ndërsa protestuesit mbajnë të hapur vetëm njërën korsi të rrugës.

Ndërsa, te Dheu i Bardhë protestuesit  pak më parë nuk kanë lejuar kalimin drejt Gjilanit të një automjeti me targa të Serbisë.

Raportohet se “kjo ka krijuar një gjendje konflikti mes Policisë së Kosovës dhe prostuesve”, por situata sërish është qetësuar. Në të dyja pikat ku po protestohet situata vazhdon të jetë e qetë.

(Podujevë 15:30)-Lideri i Lëvizjes Vetëvendosje, Albin Kurti, tha pak më parë për median në Merdare se, “në këto momente ka reciprocitet me Serbinë, pasi asnjë maune e asnjë automjet nuk ka kaluar”.

Kurti siguroi gjithashtu se protesta do vazhdojë kështu paqësore.

“Kështu do jetë, sepse kështu është e drejtë, e arsyeshme, e dobishme. Kjo është protestë paqësore që demokratizon dhe mbron Republikën”, tha Kurti.

Situata vazhdon të jetë e qetë në të dy vendet e protestës, në Merdare dhe te Dheu i Bardhë, vendkalimet kufitare me Serbinë.

***********************

Prishtinë- dy pikave kufitare me Serbinë,  në Merdare në  verilindje afër Podujevës dhe te Dheu i Bardhë në lindje afër Gjilanit, kanë arritur sot mijëra protestues të organizuar nga Lëvizja Vetëvendosje, dhe në këto memente të fillimit situata është e qetë.

“Skenari ynë është tërësisht paqësor”, tha lideri Vetëvendosjes, Albin Kurti duke shpresuar se edhe skenari i Policisë do të jetë ashtu dhe mospengues.

Policia ka njoftuar një plan për ditën e sotme për lëvizjen dhe qarkullimin e lirë, ndërsa thekson se “shpreson se protesta do të jetë në harmoni me konventat dhe ligjet, përkatësisht e qetë dhe paqësore”.

Kordoni i Policisë sot është vendosur më përtej qytetit të Podujevës, më afër pikëkalimit në Merdare.

Te Dheu i Bardhë është bllokuar nga protestuesit vetëm njëra korsi e rrugës, ku janë ulur protestuesit. (LajmeShqip.com)

 
Lajme Shqip Sunday, 18 December 2011 20:00

Prishtinë-Lëvizja Vetëvendosje i ka dhënë afat Qeverisë së Kosovës deri më 1 janar të zbatojë mocionin e miratuar në Kuvend për ndërmarrjen e masave të reciprocitetit me Serbinë.

Drejtues të kësaj lëvizjeje kanë thënë se kryeministri Hashim Thaçi duke e konsideruar vendimin e Kuvendit të Kosovës si opinion, sipas tyre, ai “praktikisht ka bërë grusht-shtet ndaj institucioneve të tjera”.

 Në një konferencë për media të dielën, kryesuesi i Këshillit të Përgjithshëm të Lëvizjes Vetëvendosje, Ismajl Kurteshi ka bërë të ditura vendimet e marra në mbledhjen e tretë të këtij këshilli.

Ai ka thënë se nëse Qeveria deri më 1 janar nuk zbaton mocionin për ndërmarrjen e masave të reciprocitetit ndaj Serbisë, atëherë 14 janari do të jetë dita kur aktivistët e kësaj lëvizjeje do të fillojnë të bllokojnë mallrat serbe në pikat kufitare te Dheu i Bardhë dhe në Merdare.

“Këshilli i Përgjithshëm i Lëvizjes Vetëvendosjes, nё mbledhjen e vet tё tretё tё mbajtur sot, mori vendim qё ta marrë në mbrojtje vendimin e Kuvendit tё Republikës sё Kosovës, dhe nёse Qeveria e Kosovës nuk e zbaton kёtё vendim deri mё 1 janar 2012, Lёvizja Vetëvendosje do tё ndërmarrë veprime konkrete pёr ta zbatuar kёtё vendim tё Kuvendit nё çdo pikё tё tij. Kështu, nga data 14 janar 2012, aktivistët e Vetëvendosjes do tё bllokojnё mallrat e Serbisё nё pikat kufitare te Dheu i Bardhё dhe nё Merdarё” , ka thënë Kurteshi.

Kryetari i Vetëvendosjes, Albin Kurti, ka thënë se kur kjo lëvizje do të vijë në pushtet atëherë do të ketë mundësi të marrë edhe vendime të rëndësishme në përputhje me interesat e vendit.

“Një ditë kur do të jemi në qeveri dhe do ta kemi pushtetin do t`i përdorim edhe mekanizmat e pushtetit në përputhje me interesat e Kosovës dhe vullnetin e popullit në mënyrë që kufirin me Serbinë njëherë e përgjithmonë ta bëjmë kufi ndërshtetëror ashtu qysh nuk po e bënë Qeveria e Kosovës”, ka theksuar ai.

Sipas Kurtit, Qeveria e Kosovës po përpiqet që Republikën parlamentare ta bëjë Republikë qeveritare, derisa kryeministri Thaçi me deklaratën e tij se kuvendi jep opinione, sipas Kurtit, po përpiqet të bëjë grusht-shtet.

“Kryeministri Thaçi me deklaratën e tij se kuvendi jep opinione, praktikisht ka bërë grusht-shtet. Ne jemi këtu që ta mbrojmë Kuvendin e Republikës së Kosovës si organ përfaqësues i popullit dhe i vullnetit të tij dhe si organi më i lartë politik në Kosovë”, ka potencuar Kurti.

 Më datën 7 dhjetor të këtij viti, Kuvendi i Republikës së Kosovës kishte miratuar mocionin e iniciuar nga Vetëvendosja që Qeveria t`i marrë masat e reciprocitetit të plotë politik, ekonomik, tregtar ndaj Serbisë. Mirëpo ky mocion nuk u konsiderua obligues nga ana e Qeveria.

 
Lajme Shqip Tuesday, 25 October 2011 09:09

Prishtinë – “Zotëri ambasador, ndoshta çizmet e policëve dhe truprojeve mbi protestuesit paqësorë janë fashizëm”. Kështu nis reagimi i Lëvizjes Vetëvendosje ndaj deklaratës së djeshme të ambasadorit francez, François Fitou, i cili i quajti fashistë aktivistët e VV-së.

Nëntë aktivistë të Lëvizjes VETËVENDOSJE!, vajza e djem, janë arrestuar teksa shprehnin ndjenjën e tyre të protestës ndaj Ministrit të Brendshëm të Kosovës, Bajram Rexhepit. Ky i fundit, thuhet në kumtesë, ishte duke mbajtur një fjalim ordiner demagogjik, ku mburrej me liberalizimin e vizave, pra me procesin e lëvizjes së lirë nëpër Europë, edhe pse Ministria e Brendshme ende nuk ka mbërritur të garantojë lëvizjen e lirë të qytetarëve brenda kufijve të Kosovës. Ministri foli për rendin në Kosovë, ndërkohë që brenda vendit janë duke vepruar struktura ilegale serbe; ai mburrej për anti-korrupsionin, edhe pse kohët e fundit policia ndërkombëtare po bastis edhe ministrinë e tij për ta gjetur korrupsionin që po e kalbë qeverisjen aktuale nga brenda.

Aktivistët e Lëvizjes VETËVENDOSJE! bënë atë që do të bënte çdo qytetar i ndërgjegjshëm në shoqëritë demokratike të botës, ata fishkëllyen kundër mashtrimeve të ulëta dhe demagogjisë së një qeverie që nuk garanton dot as lëvizjen e lirë brenda territorit të Kosovës, të një qeverie që dështon të kontrollojë kufijtë e vet, që nuk ua plotëson dot nevojën minimale qytetarëve të saj, nevojën që të ndihen të sigurt në atdheun e tyre, thotë Vetëvendosja.

Ambasadori i Republikës Franceze në Kosovë, Jean François Fitou menjëherë pas takimit, dukej që e kishte humbur arsyen, dhe u shpreh në mënyrë të nxituar e fyese për aktivistët e Lëvizjes VETËVENDOSJE!, duke i krahasuar veprimet e tyre me ato të fashistëve në 1943, të cilët nuk i lejonin të tjerët të shpreheshin. Kjo deklaratë e ofendon secilin anëtar dhe mbështetës të kësaj Lëvizjeje, e cila në historinë e saj mbartë frymëzimin e ardhur nga lufta e popullit shqiptar kundër pushtimeve, kundër tiranive, kundër fashizmit, një luftë e cila, me ç’po duket, ende s’ka përfunduar, përderisa ky popull ende nuk mund të gëzojë lirinë, sovranitetin e pavarësinë e vet sovrane, njësoj si çdo popull tjetër i Europës e i Botës. Ambasadori Jean François Fitou ka folur për fashizmin, e fashizmi ka të bëjë me ata që imponohen e dominojnë prej piedestalëve të autoritetit, duke shtypur shprehjen e tjetrit. Mirëpo, zoti ambasador duhet ta dijë që autoriteti shtypës në Kosovë nuk janë qytetarët, as aktivistët e Lëvizjes VETËVENDOSJE!. Arrestimi i protestuesve dhe dhuna policore dhe e truprojeve të ministrit Rexhepi ndaj atyre vajzave e djemve që shprehën qëndrimin e tyre legjitim qytetar e politik e tregon fare mirë se cili iu përngjan fashistëve në Kosovë. Qytetarët e Kosovës, aktivistët e Lëvizjes VETËVENDOSJE, në përpjekjen e tyre të pandërprerë për emancipim, nuk kanë ndërmend të ndalen përpara kurrfarë vështirësish e pengesash.

Po ashtu, kanë qenë ofenduese shprehjet vulgare të ministrit Rexhepi, i cili është mësuar t’i peshojë qytetarët në xhepin e tij. Mësoje, zoti ministër, qytetarët dhe qytetarinë nuk i blen paraja. Edhe pse xhepat mund t’i kesh plot, edhe pse burgjet mund t’i mbushësh me të rinjtë që protestojnë ndaj paaftësisë dhe ndaj indiferencës tënde, vlerat e vërteta të shqiptarit ti kurrë nuk do t’i kesh në xhep, për sa kohë që dukshëm nuk i ke në karakter e në shpirt.

Ndaj një Ministri të Brendshëm si Bajram Rexhepi, i cili nuk mbërrin të sigurojë as jetën e policëve, e jo më atë të qytetarëve, gjëja më e paktë që mund t’i bëhet, është të fishkëllehet. Të arrestosh ata që fishkëllejnë mashtrimet e demagogjinë e një ministri është veprim tiranik. Të shkelësh me çizme policore protestën qytetare, ndërkohë që po humbet një të pestën e territorit, sepse “i druhesh dhunës”, ky është brutaliteti dhe arroganca frikacake e këtij regjimi që përpiqet ta maskojë impotencën me despotizëm, thuhet në reagimin e Lëvizjes Vetëvendosje, pas ngjarjeve të djeshme, në ISPE, ku aktivistë të kësaj lëvizjeje u rrahën dhe arrestuan, pasi protestuan në mënyrën e tyre kundër asaj, që ata e quajtën, demagogji të ministrit Kosovar të Punëve të Brendshme. (LajmeShqip.com)

 
Lajme Shqip Monday, 24 October 2011 17:44

Prishtinë – Ambasadori i Francës në Republikën e Kosovës, Zhan Fransua Fitu, e ka quajtur fashizëm një aksion të lëvizjes Vetëvendosje derisa ai dhe ministri i Brendshëm, Bajram Rexhepi, po mbanin një ligjëratë në institutin privat ISPE.

Aktivistë të lëvizjes Vetëvendosje e kanë ndërprerë sot një ligjeratë për liberalizimin e vizave të ministrit të Brendshëm Bajram Rexhepi dhe ambasadorit të Francës, Zhan Fransua Fitu, para studentëve të Institutit për Studime Evropiane. ISPE.  Pas fjalimeve të ministrit dhe ambasadorit, një aktivist i Vetëvendosjes e ka akuzuar ministrin Rexhepi për mosprani në veri të vendit dhe më pas disa aktivistë të tjerë kanë fishkëlluar dhe hedhur pamflete në sale.

“Ti flet për veriun e vendit si spectator… ti ke thënë se një ditë do t’i vijë fundi i durimit të KFOR-it, d.m.th. t’i flet si zëdhënës i KFOR-it, d.m.th. mungesa e veprimit ty të bën si zëdhënës i KFOR-it e kurrsesi ministër”, i kanë thënë Rexhepit, aktivistë të Vetëvendosjes.

Ka reaguar menjëherë ambasadori i Francës, Zhan Fransua Fitu, duke e quajtur fashizëm veprimin e aktivistëve të Vetëvetendosjes.

“Gjëja e parë që duhet të bëni është të mos silleni si bandat fashiste. Ne jetojmë në një vend demokratik dhe mendimet e ndryshme për dialogun, për Evropën etj., pranohen. Por, të vish në një takim, ta fyesh ministrin e të flasësh banalitete, më falni, por kjo është Evropa e vitit 1943. Kjo është fashizëm. Dhe këto veprime vendi im dhe të tjerët do t’i kundërshtojnë”, ka thënë menjëherë ambasadori francez.

Ndërkaq ministri Bajram Rexhepi tha se deklaratat dhe veprimet e tilla bëhen për qëllime politike dhe se ai ka qenë disa herë i pranishëm në veri të vendit.

“Mua nuk më bëjnë shumë nervoz disa fëmijë të lazdruar që sillen rrugëve. Bash janë fëmijë të lazdruar. Se deri ku lëvizë Ministri i Punëve të Brendshme, unë i ftoj në veturën personale e jo në Suhodoll e në Lagje të Boshnjakëve, por shumë më thellë, por ata duhet të përgatiten psiqikisht, sepse mund të kenë frikë”, tha Rexhepi.

Policia e Kosovës arriti menjëherë pas incidentit.

Në një komunikatë për media, Lëvizja Vetëvendosje bën të ditur se janë 10 aktivistë të saj të arrestuar pas aksionit të sotëm. (LajmeShqip.com)

 
Lajme Shqip Monday, 24 October 2011 15:07

Prishtinë (PLOTËSUAR 16:02) – “Viu, viu, po të frynë… Veriu”, kanë qenë fjalët e Lëvizjes Vetëvendosje, të shkruara në një pankartë, ato që e kanë nervozuar ministrin Rexhepi, në debatin e organizuar sot në kolegjin ISPE, dhe që ka mjaftuar që policia, rojat e kolegjit dhe truprojat e ministrit të përdorin dhunë të shfrenuar ndaj tyre.

Gjithashtu, në fletushka të shpërndaranga aktivistë të Vetëvendosjes, thuhej se “Bajram Rexhepi është një frikacak, që nuk kujdeset për sigurinë e qytetarëve, por kujdeset vetëm për sigurinë e tij, duke angazhuar angazhuar truproja dhe duke u vozitur me xhipa”.

Po sipas Vetëvendosjes, “frikacaku Rexhepi, që nga vitit 2008, nuk ka qenë asnjëherë në Lagjen e Boshnjakëve, për t’u kujdesur për shqiptarët e pjesës veriore të Mitrovicës”. (LajmeShqip.com)

****************************

Prishtinë (15:07) – Aktivistë të Lëvizjes Vetëvendosje u ndaluan dhe ndaj tyre u përdor dhunë, derisa po mbahej konferenca me temë liberalizimin e vizave, në kolegjin ISPE, në Prishtinë.

Ata janë ndaluar dhe janë rrahur në mënyrë të vrazhdë nga policia, rojat e kolegjit dhe truprojat e ministrit të Brendshëm kosovar, Bajram Rexhepi.

Raportohet se deri më tani janë arrestuar 10 aktivistë të Vetëvendosjes, lidhur me këtë rast. (LajmeShqip.com)