Lajme Shqip Saturday, 20 April 2013 20:33

Prokuroria shqiptare ka filluar me iniciativën e saj, pas disa sinjalizimeve të UEFA-s, një hetim të gjerë për manipulimin e ndeshjeve të futbollit në kampionatin shqiptar. Duke parë se raportet e herëpashershme të UEFA-s të dërguara në adresë të FSHF rreth trukimeve kanë rënë në vesh të shurdhër dhe nuk është marrë asnjë masë konkrete ndaj manipuluesve të rezultateve, institucioni që drejton futbollin evropian ka vendosur që të dërgojë një kopje edhe në Prokurorinë e Përgjithshme të Shqipërisë, e cila është vënë menjëherë në lëvizje.

Gjatë javëve të fundit, janë siguruar përgjimet e telefonatave të drejtuesve të klubeve për ndeshjet që dyshohet si të manipuluara. Më pas, janë marrë në pyetje si vetë këto drejtues klubesh, ashtu edhe gjyqtarët e takimeve në fjalë apo edhe futbollistë.

Gjithçka është zhvilluar thuajse në fshehtësi të plotë si dhe është vendosur të anashkalohet FSHF, e cila deri tani nuk ka mbajtur një qëndrim konkret ndaj rasteve të dyshuara për manipulime.

Sipas asaj që ka publikuar sot e përditshmja sportive shqiptare “Panorama Sport”, një nga emrat që po hetohet aktualisht është ai i presidentit të Besës, Nexhat Bizhdili, nga përgjimet e telefonatave të të cilit është arritur në konkluzionin se ai kishte gisht në manipulimin e ndeshjeve. Ndonëse Bizhdili e ka hedhur poshtë këtë hipotezë, mendohet që Prokuroria e Përgjithshme ka prova të pakundërshtueshme të implikimit të tij, pasi në përgjimet telefonike në fjalë, numri 1 i skuadrës kavajase ka dhënë disa rezultate ndeshjesh, të cilat më pas janë konfirmuar saktësisht në fushën e lojës.

Nuk është bërë e ditur ende se për cilat ndeshje bëhet fjalë, por e vetmja gjë që dihet është se janë të këtij edicioni të Kategorisë Superiore. Sipas raporteve ndërkombëtare, kampionati shqiptar i futbollit mban numrin rekord të ndeshjeve të manipuluara në 3 vitet e fundit. (LajmeShqip.com)

 
Lajme Shqip Monday, 23 January 2012 15:02

Ish-trajneri i kombëtares shqiptare të futbollit, Josip Kuzhe, ka hedhur poshtë të gjitha akuzat që bëhen ndaj tij për pjesëmarrjen në trukimin e ndeshjeve të kuqezinjve.    

Kroati, i cili aktualisht është trajner në kampionatin kinez të futbollit, në një intervistë të dhënë për gazetën shqiptare “Panorama Sport” ka lënë të kuptohet se nuk ka gisht në këtë mesele dhe se nuk dyshonte që dikush tjetër ta kishte bërë një gjë të tillë.

“Më duket diçka shumë qesharake. E para, në ndeshjen me Argjentinën as që na shkonte ndër mend të merrnim rezultat. Shkuam me një skuadër të re, me lojtarë pa eksperiencë të cilët vinin nga kampionati shqiptar. Në këtë kontekst, unë nuk e di se si unë mund të kem trukuar një ndeshje të tillë, ndaj një superfuqie si Argjentina”.

“Ndeshjen me Malin e Zi e fituam. Nëse do të kishim humbur ose do të vërehej ndonjë anomali në lojë nga ana jonë, atëherë unë do të kisha qenë i pari që do të shprehja mendimin tim. Unë them jo dhe jam i sigurt 100% edhe për ekipin tim”, ishte komenti i Kuzhe ndaj akuzave që i janë bërë për trukimin e dy miqësoreve të kombëtares.

Po si është e mundur që trajneri përmendet në trukimet greke? Kroati mendon se gjithçka është sajuar për të bërë të besueshëm vendimin për të hedhur shuma të mëdha bastesh, por kjo nuk do të thotë se ai njeh ndonjë nga pjesëtarët e bandës kriminale të arrestuar në Selanik.

“Nuk e di se si ka dalë emri im aty, paçka se në të tilla raste, persona ordinerë, për të justifikuar punët e tyre, nxjerrin emra lojtarësh e trajnerësh. Por kjo nuk do të thotë se kush më përmend emrin është miku im apo unë duhet me patjetër ta njoh dhe të kem lidhje me të”, shprehej Kuzhe në intervistë. (LajmeShqip.com)

 
Lajme Shqip Saturday, 21 January 2012 13:30

Ndeshjet miqësore të kombëtares shqiptare të futbollit janë trukuar. Lajmi vjen nga Greqia ku pas arrestimit nga policia të katër bandave kriminale në Selanik, është zbuluar se ata merreshin edhe me trukime ndeshjesh të ekipeve kombëtare.

Sipas mediave greke, 53 personat e arrestuar ishin pjesë e një rrjeti që merrej me pastrim parash, huadhënie, kërcënime, mashtrim dhe shantazhe.

Por burimi kryesor i të ardhurave ishte trukimi i ndeshjeve të futbollit, ku sipas asaj që del nga zyrat e hetuesisë, bëhet fjalë për ndeshjet miqësore të kombëtares shqiptare të vitit 2011 si dhe të përfaqësueses sllovake.

Përgjimet telefonike kanë zbardhur edhe sigurinë me të cilën janë vënë bastet. Në bazë të përgjimeve, një person me nofkën “portugezi” i propozon kreut të njërit prej grupeve,  Marko Karamberit, të vënë baste të mëdha në dy ndeshjet miqësore të kombëtares shqiptare të futbollit, Shqipëri-Mali i Zi 3-2 dhe Argjentinë-Shqipëri 4-0.

Sipas këtij përgjimi, gjithçka është e sigurt dhe mund të vihej bast për cilindo rezultat që dëshirohej pasi “garancia” kishte ardhur nga vetë trajneri i kombëtares shqiptare.

Hetimi në fjalë ka bërë shumë bujë, por detaje të tjera pritet të zbulohen në ditët në vazhdim, pasi policia po vazhdon ende të marrë në pyetje personat e arrestuar. Mbetet për t’u parë roli i protagonistëve shqiptarë në këtë çështje si dhe përfshirja e ish-trajnerit të kombëtares, Josip Kuzhe, i cili u largua nga stoli i ekipit në fund të vitit 2011.

Kjo nuk është hera e parë kur përfaqësuesja shqiptare e futbollit përmendet për trukimin e ndeshjeve. Dyshimet për trukime i ka hedhur edhe ish-trajneri i kombëtares shqiptare, Oto Bariç, i cili humbjen 6-1 me Rumaninë ua faturoi lojtarëve që sipas tij kishin shitur ndeshjen. (LajmeShqip.com)