12
 
Lajme Shqip Wednesday, 19 September 2012 14:28

TIRANE- Kreu i Partisë Fryma e Re Demokratike, Bamir Topi reagoi sot ndaj akuzave të kryeministrit Berisha në kohën kur ai drejtonte Presidencën.

Ish-presidenti Topi ashpërsoi tonet, duke u shprehur se kryeministri u shfaq dje në një gjendje të çekuilibruar dhe kjo sipas tij, ndodh sa herë ai ndjen humbjen politike. 

“Jam këtu për të reaguar për deklaratat e kryeministrit në parlament. I jap të drejtë Mark Twenit që këshillonte për të mos debatuar asnjëherë me njerëz të tillë, se të tërheqin në nivelin e tyre, por këtë po e bëj në nderim të qytetarëve. Ai hodhi dje një lumë akuzash, shpifjesh e intrigash duke tentuar të njollosë emrin e personalitetin tim, në ish detyrën e kreut të shtetit. U shfaq në një gjendje të çekuilibruar, humbje kontrolli e një të moshuari.

I njëjti njeri ka 20 vite që baltos institucionet. Si politikan e kuptoj shumë mirë rënien e tij në nivele të tilla, sa herë ndodhet para një dështimi politik e humbet kontrollin dhe është i gatshëm të bëjë gjithçka ndaj rivalëve, përfshi kërcënimet me jetë. Ai u shfaq si një pacient në fazë të rënduar mendore”, deklaroi Topi. 

Topi e cilësoi fjalorin e përdorur nga kryeministri si të denjë për rrugën dhe jo për institucionet, ndërsa u shpreh se Berisha asnjëherë nuk ka dashur të hetojë vrasjet politike.

“Berisha e lidhi emrin tim me vrasjen e gjyqtarit Konomi, por unë di të them se ai drejton policinë dhe shërbimin sekret, ai ka akses për hetim, por nuk heton nuk zbardh të vërtetat e mëdha, vetëm shpif, për të nuk ka rëndësi e vërteta, kështu ka bërë për të gjitha vrasjet politike. Shqiptarët e dinë kush e ka çuar vendin në prag të konfliktit civil për shkak të karriges së tij, siç e dinë kush kërcënon me jetë nga foltorja e Kuvendit”, nënvizoi Topi.

“Në prag të kalimit në pension politik, ai kupton forcën që po merr FRD, hyri në politikë nga zyra e Ramiz Alisë, klani i tij mban peng politikën, Partinë Demokratike dhe institucionet e vendit, median. Kjo përbën një kërcënim për demokracinë, për shtetin e së drejtës, kërcënim për interesat madhore të vendit. Jam i motivuar dhe i vendosur për të mos lejuar që vendi të kalojë në pashallëkun e familjes së Berishës. Së bashku me kurajo e vullnet, ta largojmë nga pushteti stalinistin e fundit në Evropë”, përfundoi Topi fjalën e tij.(LajmeShqip.com)

 
Lajme Shqip Tuesday, 18 September 2012 16:05

Tiranë (PLOTESUAR 18 SHTATOR, 18:40)- Kuvendi i Shqipërisë miratoi me 130 vota pro, asnjë kundër dhe asnjë abstenim kufizimin e imunitetit për zyrtarët e lartë dhe gjyqtarët.

Po sot, Kuvendi hodhi poshtë me 60 vota pro, 63 kundër dhe 6 abstenim nismën e PS-së për ndryshimet kushtetuese. Menjëherë pas votimit, Kryetarja e Kuvendit, Jozefina Topalli tha se pas 10 viteve përpjekjesh, Kuvendi arriti të vendoste një prej standardeve evropiane të kërkuara prej kohësh.  Ajo e cilësoi ditën e sotme, si një dot të mirë, ndërsa ftoi deputetët që nesër të votojnë edhe ligjin për Gjykatën e Lartë.

Në seancën e sotme Kuvendi miratoi edhe disa ligje të tjera të rëndësishme, si ai për ratifikimin e marrëveshjes së huasë ndërmjet Shqipërisë dhe BERZH për asistencën sociale.  Disa shtesa dhe ndryshime në ligjin për kontrollin e pasurive të të zgjedhurve dhe nëpunësve, i ndryshuar. (LajmeShqip.com)

***************************************

Tiranë (PLOTESUAR 18 SHTATOR, 17:20)- Pasi falenderoi opozitën për konsensusin ndaj asaj që ai e quajti si “përpjekje shumëvjeçare” e demokratëve për të hequr barrierat për organet hetimore, pra imunitetin, kryeministri hodhi një lumë akuzash ndaj ish-presidentit Bamir Topi, ish-nënkreut të KLD-së Kreshnik Spahiu për afera korruptive gjatë kohës kur ishin në detyrë.

“Drejtësia nën drejtimin e Topi tuaj dhe ‘faqeziut’ ishte në periudhën më të errët të saj. Flisni me gjykatësit dhe do të shihni që transferimi i një gjyqtari nga Durrësi në Tiranë ishte një aferë korruptive prej 500 mijë eurosh”, deklaroi Berisha duke akuzuar më pas edhe opozitën se ka patur nën kontroll drejtësinë nëpërmjet ish-presidentit Topi dhe ish-nënkryetarit të KLD-së, Kreshnik Spahiu.

Deklaratave të kryeministrit Berisha, i replikoi kreu i grupit socialist, Gramoz Ruçi. Zoti Ruçi akuzoi kryeministrin për uzurpim të sistemit të drejtësisë dhe se paketa e tyre synon ta çlirojë këtë sistem nga politika.

Kreu i socialistëve në parlament akuzoi mazhorancën për lidhje me Ilir Xhakjan, vrasësi i cili pak ditë më parë në Shijak, ekzekutoi Komisarin e Policisë. Ruçi tha se Xhakja është shfrytëzuar për të mbledhur vota nga mazhoranca në kohë fushate.

“Ilir Xhakja, që deri dje e përdorje për të mbushur shportën elektorale, sot mundohesh t’ia faturosh opozitës. Më kot mundohesh. Ai guxoi ngriti dorë në mes të ditës ndaj uniformës së shtetit sepse ju e mbrojtët”, tha Ruçi. (LajmeShqip.com)

*****************************************************

TIRANE – Pak përpara votimit të draftit aq të rëndësishëm dhe të përfolur, për kufizimin e imunitetit të zyrtarëve, në një kohë kur PS ka rënë dakord ta votojë draftin, kryeministri Berisha e cilësoi këtë ditë si finalizimin e një lufte shumëvjeçare dhe një kapitull të ri për shqiptarët.

Sipas Berishës, mazhoranca nuk e ka humbur asnjëherë durimin për të kërkuar konsensusin e opozitës dhe ka bërë të gjitha lëshimet e nevojshme, në mënyrë që të arrihej një draft konsensual i pranuar nga të gjitha palat.

“Për mua personalisht kjo është një ditë e një rëndësie të jashtëzakonshme, është finalizimi i një beteje shumëvjeçare për realizimin e këtij akti madhor kushtetues, nga i cili theksoj nuk përfiton asnjë forcë politike, nuk mund të ketë kredibilitete individuale, nga i cili fiton qytetari, rendi kushtetues i Shqipërisë, Kushtetuta e vendit e cila bëhet një dokument më i drejtë më i barabartë për qytetarët e saj.”- u shpreh kryeministri.

Më tej shefi i qeverisë theksoi se mbetej i vendosur për ta përmbyllur çështjen e imunitetit me të gjitha mënyrat, duke përfshirë edhe zhvillimin e një referendumi, pavarësisht se do të shkonte kundër dëshirës së tij.

“Ju falënderoj jo se ju po votoni, por se dua të jem i hapur dhe i sinqertë. Referendumi, do shkoja kundër dëshirës sime, por për këtë çështje madhore unë kisha vendosur të shkonim drejt referendumit, pasi e konsideroja një çështje themelore jashtë tagrit tonë, kisha besim se shqiptarët do ta votonin. Kjo u shmang dhe për këtë ju falënderoj.”- vijoi Berisha. (LajmeShqip.com)

 
Lajme Shqip Thursday, 29 March 2012 10:00

Tiranë- Partia e re e presidentit Topi pritet të startojë në gjysmën e parë të muajit të ardhshëm, kur do bëhet publike themelimi i saj dhe do fillojë mbledhja e firmave për regjistrimin sipas ligjit në gjykatë. Deri më tani ka përfunduar statute dhe programi i partisë, ku në qendër të tij do jetë kufizimi i mandatit të kryetarit dhe të gjithë drejtuesve të tjerë në rang vendor deri në dy mandate si dhe zgjedhjet në të gjitha nivelet sipas parimit amerikan të ndërtimit të një partie të djathtë.

“Është obligimi ynë për të përfaqësuar e zbatuar misionin e dhjetorit ’90 ku nuk mendohej një parti me kryetar të përjetshëm. Normalisht kryetari do ketë vetëm dy mandate dhe çdo funksionar do të zgjidhet sipas parimit “një anëtar një votë”. Pra do të jetë një parti e modelit amerikan, një model tërësisht perëndimor”, deklaroi Aleksandër Biberaj, njëri prej drejtuesve kryesorë të parties së re. Sipas tij, ka një zhgënjim nga lidershipi i sotëm, qoftë pseudo I djathtë qoftë pseudo i majtë. “Ka 22 vjet që vijon tranzicioni dhe qytetarët do kërkojnë një zgjidhje, të cilën mendojmë dhe shpresojmë t’jua japim ne”, tha Biberaj.

Në statut është përcaktuar se zgjedhjet do të bëhen sipas parimit “Një anëtar një votë”, ndërkohë që në të do të gjejnë formë të plotë të gjitha normat demokratike, për një parti me vision tërësisht perëndimor të qendrës së djathtë. Një ndër pikat kryesore është fiksimi në statut dhe i mendimit ndryshe, apo siç quhet rëndom fraksioni, çka për grupin nismëtar do t’I jepte një dimension tjetër demokracisë së brendshme në parti.

Në programin politik të partisë së re të Topit mësohet se është fiksuar nevoja për ndryshime kushtetuese për funksionimin e shtetit ligjor, reforma në sistemin e drejtësisë, në administratë, arsim, shëndetësi, punësim, pensione, daljen nga kriza e rëndë ekonomike, lufta kundër monopolove, korrupsionit dhe kilentelizmit.

Nëpër këto piketa statutore dhe programore do të vërtitet partia e re e Topit, e cila pritet të shpallet dhe formalizohet brenda muajit prill, përmes një drejtimi nga dy figurat kryesore të grupit nismëtar, deri në momentin kur presidenti Topi të përfundojë mandatin në krye të shtetit. Biberaj nuk ka munguar të shprehet se Topi i ka dyer të hapura në këtë parti. “Pas përfundimit të mandatit, Presidenti i ka dyert e hapura te ne”, tha Biberaj. I cili nuk ka munguar të adresojë gjuhën e ashpër në drejtim të lidershipit të sotëm politik, dhe kryesisht në drejtim të kreut të PD, themelues dhe funksionar i lartë i së cilës ka qënë për vite me radhë Biberaj.

“Shqipëria drejtohet nga komunistët, kryetari ka qënë 25 vjet sekretar partie, ka mbledhur rreth vetes njerëz të ish-Sigurimit të shtetit dhe ish-komunistë. S’kam qënë kurrë bashkëpuntori më i ngushtë, kam qënë themelues i PD”, tha Biberaj. Për të cilin tashmë ka ardhur koha që qytetarët shqiptarë të ndërgjegjësohen dhe t’i kundërvihen kësaj klase politike që vjen nga sistemi i kaluar.

“Ne kemi pasur gjithnjë një lidership të tipit aventurier gjatë tërë këtyre viteve. Por me futjen në lojë të një partie të tretë gjithçka do ndryshojë”, tha Biberaj. I cili nuk ka munguar të kritikojë aleancat e majta të krijuara nga lideri i PD, Berisha vetëm e vetëm për të mbajtur pushtetin, ndërkohë që paralajmëron se partia e re që do krijohet në radhë të parë do të ketë një aleancë të fortë me qytetarët.

Duke akuzuar dy partitë kryesore në vend për ndryshimet në Kodin Zgjedhor sipas interesave të tyre, ai ka nënvizuar se “jam për një sistemmazhoritar të pastër, ku secili deputet të japë llogari në zonën e tij elektorale për punën e bërë dhe realizimin e premtimeve”.

 
Lajme Shqip Wednesday, 14 March 2012 08:00

Intervistë e Presidentit Topi për emisionin “A Show” të gazetarit Adi Krasta në Televizionin “Vizion +”. Topi i përgjigjet deklaratave të Berishës se edhe vëllai i presidentit voton për të duke thënë: “Stop! Mos u fut më tej tek familjet, sepse është bërë zakon që në të gjithë fjalorin e tij të futet nëpër familje, bën diversion midis burrit dhe gruas, midis motrave, midis vëllezërve! Pra, kjo është sjellja më e shëmtuar që është patjetër një inerci e dukshme jo thjesht e një mentaliteti komunist, por edhe e një njeriu të lidhur shpirtërisht me komunizmin, i cili në mënyrë shumë të suksesshme”

Është kënaqësi për mua dhe për hir të së vërtetës, do të duhej menjëherë t’ju bëj një pyetje që më ka bërë përshtypje në raport me performancën tuaj. Ju keni qenë një President Republike i kujdesshëm. I vetmi që ka shprehur që heshtja mund të konsiderohet presidenciale dhe është një heshtje që flet. Sa herë ka ndodhur kështu, unë për vete, përpara televizorit kam thënë: Pse nuk flet tani? Mirëpo sikur të punonte Presidenca sipas dëshirave të çdo individi, ajo do kishte qenë shumë problematike. Sidoqoftë zoti President, ju në fund fare, folët, folët hapur, folët fort. Mund të them bile që thanë, disa njerëz patën dhe një kështu që ‘më në fund!’. Pse tani?

Unë besoj që nuk është rasti i vetëm, por mesa duket, publikut i bën përshtypje ndonjë deklaratë që konsiderohet e fortë, por edhe pak e ashpër. Ndoshta, nuk ka qenë në natyrën time dhe nuk është në natyrën time, që t’i trajtoj deklaratat me ashpërsi, sepse sikurse dihet, sikurse thatë dhe ju, Institucioni i Presidentit është një institucion i të gjithë shqiptarëve, pavarësisht nëse janë të djathtë, janë të majtë, janë të qendrës, pavarësisht nëse dikush ka alergji për politikën, por unë i përfaqësoj të gjithë. Është ndërtuar në mënyrë të tillë Kushtetuta që Presidenti i përfaqëson të gjithë. Kjo është arsyeja që kur largohet nga partia, jep dorëheqjen nga të gjitha funksionet.

Më vjen mirë që kjo gjen një mbështetje. Më duket kaq e sofistikuar kjo, që të largohesh nga partia, të japësh dorëheqjen në një vend militantesk e problematik, siç është Shqipëria. Aq e vërtetë është kjo, zoti President i Republikës, sa, pikërisht nga partia juaj janë gjashtë funksionarë publikë të shtetit shqiptar që marrin rrogën praktikisht që kanë një agjendë të hapur, fare-fare pa u fshehur, që merren sistematikisht dhe ju sulmojnë fort, çka në vetvete, le të themi e vendos atë që sapo thatë në një dritë tjetër. Disa prej tyre … po…

Unë mendoj që ndonjë hall të madh duhet të kenë, sepse unë, përveç të tjerave, kam një të kaluar nga bota akademike. Kështu që jam marrë edhe me teorinë e dominantit. Kur në psiqikën e njeriut krijohet një dominant i caktuar, atëherë pa e kuptuar edhe ata vetë, fillojnë të merren pikërisht me dominantin. U takon atyre ta thonë nëse  përbën ndonjë dominant apo jo. Unë jam i bindur në këtë lloj përcaktimi.

Është kërkuar hapur kohët e fundit, në një mënyrë jo elegante, të gjithë e dinë që ju do ta mbaroni mandatin në kohën e duhur. Por tanimë kërkohet për t’ju vendosur në një pozicion të vështirë dhe për të shkaktuar dominant tek ju, kërkojnë dorëheqjen tuaj. Ju e keni thënë në një nga intervistat e shkruara kohët e fundit hapur që do të mbaroni mandatin plotësisht, por në fakt, çfarë ndjesie ju jep kjo, të qenit nën një atak të vazhdueshëm në raport me këta elementë, ndërmjet të tjerash.

Absolutisht asnjë lloj efekti. Pra, kur shkon në atë pozicion, pikë së pari duhet të largohesh nga emocionet. Duhet të bësh një punë shumë profesionale që konturohet nga Kushtetuta. Pastaj, natyrisht unë jam një njeri, i cili patjetër ndikohet nga publiku. Unë do u bëja pikërisht këtë apel, që drejtojuni sondazheve publike, për të parë se sa zëra të izoluar janë këta, që kërkojnë pikërisht këtë gjë. Kjo shihet në të gjitha sondazhet, unë dëshiroj të dal pak nga modestia, pikërisht për të vërtetuar të kundërtën e asaj që pretendojnë. Ju shikoni, unë nuk dëshiroj të flas sot për sondazhet që bëjnë të tjerët, s’i bëj unë.

Zoti President, festimet e Besëlidhjes dhe në fakt për hir të së vërtetës, festimet në vetvete, tregojnë edhe kulturën dhe finesën dhe elegancën e një kombi. Fjala vjen, Italia i zgjidhi në mënyrën më madhështore të mundshme festimet e 150-vjetorit. Kishte vetëpërmbajtje, elegancë, një organizim i shkëlqyer, skrupuloz. Njerëzit u gëzuan, pa anashkaluar ose pa e përdorur edhe atë, le të themi, për të thënë që ‘topi është i imi’ dhe në këtë rast kam …

Kam qenë pjesë e atyre festimeve dhe jam dakord absolutisht me ju, por sikurse di edhe këtë që Presidentit Napolitano, protokollin s’ia kishte bërë Kryetari i Bashkisë së Romës. Pra, 2 marsi i vitit 1444 është një datë shumë historike për shqiptarët, që lidhet me Skënderbeun, por lidhet dhe me një mision përbashkues, në një kohë kur princat shqiptarë ishin të ndarë dhe me shumë probleme. Dhe kjo datë meritonte pikërisht këtë simbolikë përbashkimi, ku aty duhet të ishin të gjithë, duhet të ishin jo thjesht për të qenë formalisht të pranishëm, por për të dhënë një mesazh publik, që jemi të gjithë së bashku, jemi së bashku për të vlerësuar që e ardhmja e Shqipërisë bëhet jo në mënyrë të izoluar, por bëhet së bashku, nga të gjitha faktorët.

Ngjarja që ndodhi, nga mënyra se si u zhvillua ngjarja, ju nuk u lejuat që të flisnit ose të paktën nuk u programua, u tha në fund, u thanë disa të vërteta, disa versione le të themi të të vërtetës, ju nuk ishit prezent. Pastaj Presidenca doli me një dokument që shpjegonte, le të themi, ngjarjen. Po ju vetë zoti Topi, nuk folët. Unë jam shumë kurioz, në një ballafaqim të fortë kur dikush ju quan gënjeshtar, ju vetë nuk keni shtysën të dilni personalisht dhe të thoni: ‘Ngjarja ndodhi 1,2,3,4, ky është versioni im i së vërtetës’?

Kurrë nuk do ta ulja pozicionin e Kreut të Shtetit për t’u marrë me zëra që, s’dëshiroj tani t’i bëj asnjë lloj etiketimi, por që publiku i vlerëson vetë. Unë bëra detyrën time, duke i cuar mesazhin shqiptarëve, e bërë nga Salla ‘Skënderbej’ e Institucionit të Presidencës, ndërkohë që ai fjalim mund të mbahej, edhe duhej të mbahej, pikërisht atje ku ishte simbolika, në Lezhë. Ndërsa pjesën e protokollit, patjetër që e trajton dikush tjetër. Unë dëshiroj t’i shfaqësoj ata që janë marrë me Protokollin e Shtetit, sepse janë djem jashtëzakonisht të mirë, janë profesionistë, por në një orkestër, sigurisht që orkestrimin e fillon dhe e përfundon dirigjenti, pavarësisht nëse ajo lojë e atyre veglave të orkestrës, përfundoi e stonuar. Gjithsesi, unë dëshiroj të them që, aty ku marrin pjesë autoritetet më të larta të shtetit, duke filluar me Presidentin, Kryetarin e Kuvendit, Kryeministrin e me radhë, pavarësisht që organizimi bëhet nga një bashki e caktuar, patjetër këtu futet në lojë Protokolli i Shtetit. Dhe loja me protokollin pastaj ishte loja për të fshehur qëllimin real të realizimit të asaj skene. që kurrsesi nuk kishte elementë përbashkimi, por për fat të keq, ndarjeje.

Kam një pyetje të shkurtër, për një përgjigje hipotetike, të shkurtër, ndoshta edhe reale. Zoti Topi, nuk ju shkoi në mendje në metrat e fundit të udhëtimit me veturë ose në kthim, që ju si Kreu i Shtetit, si President i Republikës, pavarësisht nga ajo që ndodhi me Kryetarin e Bashkisë apo dhe me Protokollin e Shtetit, ju të shkonit atje dhe të flisnit fjalimin tuaj. Do të kishte ndodhur një ngjarje e jashtëzakonshme, por nuk mund besoj që t’ju ndiqnit që andej dhe t’ju thonin: ‘Mos u futni këtu se ju nuk jeni për të tilla…’

Jo, jo. Ju nuk jeni informuar mirë, unë nuk kam dalë nga zyra. Natyrisht që janë kthyer pjesa mbështetëse e Institucionit të Presidentit. Unë natyrisht isha bërë gati për t’u nisur. Unë nuk mendoj që meriton më shumë të trajtohet kjo pjesë, se sa ajo që ka ndodhur. Dhe ajo që ka ndodhur sot është mëse e qartë, me përjashtim të atyre që i bëjnë shërbim një politike të caktuar, që sigurisht nuk është politika e bashkimit. Unë besoj që për pjesën tjetër, për shqiptarët gjithçka është e qartë.

Ne përmendëm përpara pak minutash, faktin që juve për t’u bërë President i Republikës, ju është dashur që të jepni dorëheqjen nga Partia Demokratike, sepse kjo është procedura që zhvillohet. Në fakt, ky është edhe morali zakonisht, siç ndodh, por sipas standardeve të sotme të diskutimit brenda Partisë Demokratike dhe për hir të së vërtetës, brenda çdo lloj partie, zoti Topi a e keni tradhtuar ju Partinë Demokratike siç e thotë dhe e thotë dikush vazhdimisht?

Unë mendoj që një personalitet i medias dhe i botës së spektaklit, sikurse jeni ju, duhet të patjetër të rikthejë në vëmendje gjithë retrospektivën, të gjithë historikun e marrëdhënieve. Në prillin e vitit 2008, kur ende nuk kisha mbushur gjashtë muaj në atë pozicion, menjëherë filluan të artikulohen zëra se cili do të jetë Presidenti i ardhshëm. Pikërisht në prillin e vitit 2008 ka pasur një marrëveshje, e cila sot konsiderohet nga analistët, edhe nga vetë politika, si një marrëveshje jo e ndershme e bërë nga kryetari i mazhorancës dhe nga kryetari i opozitës për ndryshime të forta kushtetuese, pa u konsultuar, pa e bërë debat me konstitucionalistë, por për hir të interesave personale të pushtetit të secilit. Secili mendonte se do të kishte të gjitha pushtetet e mundshme. Natyrisht në një marrëveshje jo të ndershme, dikush doli me të gjitha pushtetet dhe dikush i humbi të gjitha pushtetet. Presidenti, si Kryetar i Shtetit, patjetër edhe si garant i interesave të publikut, e bëri në kohë të ditur atë fenomen që po ndodhte, dhe sot, pas kaq vitesh, patjetër që vërtetohet plotësisht ajo që unë e kam thënë dhe vazhdoj ta them. Dhe nuk është aspak e vërtetë që erdhi ky moment për të folur. Unë kam folur në mënyrë konstante. Natyrisht për t’u diferencuar nga të tjerët, që kanë folur ashpër, por në substancë apeli im ka qenë i qartë.

Pra, ne jemi ballkanikë, jemi edhe mesdhetarë dhe herë pas here kemi një dobësi për melodramën apo jo?

Natyrisht, lidhet me traditën, por unë besoj se ne jetojmë sot në një moment kur Shqipëria është vend i NATO-s, kur Shqipëria dëshiron të jetë pjesë e Evropës, kur standardet e vjetra ballkanike nuk kanë pse na tërheqin. Ne patjetër duhet të orinentohemi drejt Evropës së civilizuar.

Për pak çaste dua t’i jap vlerën që ka, jo domosdoshmërisht shumë më të madhe, një shkëmbimi jo vetëm batutash. Është një shkëmbim doktrinash, është një përballje për të treguar fuqi, natyrisht mes Ekzekutivit dhe Institucionit të Presidentit të Republikës, në rastin konkret midis Kryeministrit Berisha, i cili sot paradite, në një orë të caktuar, kam përshtypjen se ishte 11.39 kur isha përballë mikrofonit dhe e pashë, hodhi një kunj nga ato që atij i pëlqejnë shumë, madje zgjoi edhe shumë të qeshura kam përshtypjen në qeveri. Me sa duket ata kënaqen shumë nga sensi i humorit në raport me fate njerëzish dhe familjarësh. Ai na tha në raport me pronën, por përpara dua t’ju pyes dhe do ta lidh kështu. Përpara disa kohësh ai tha se “Bamiri ka një hall dhe Flamuri, vëllai i vet, doktori i famshëm, do të votonte për mua.” Nuk mund ta thotë, duke e njohur zotin Kryeministër, këtë fare kot dhe rastësisht, jo aq emocionale. A ka një gjë që është diskutuar edhe mes vëllezërve Topi që ka lidhje edhe me pronën, që zgjon një kuriozitet për ta qartësuar, por unë, po të isha në vendin tuaj, do të flisja me ton tani?

Jo! Unë nga kjo studio e nderuar, do t’i bëja prapë një apel, një apel që ai me siguri s’do ta dëgjojë: Që në gazetën “Rilindja Demokratike”, aty ku për pesë numra rresht janë hedhur shpifje pa kufi, jo thjesht për Presidentin, po për familjen, ku bën pjesë edhe im vëlla, shumë i nderuar, të ketë kurajon të hapë e t’i japë hapësirë në faqen e parë të gazetës “Rilindja Demokratike” pikërisht për sqarimin me autor Flamur Topin dhe familjarët e tij, ku i nderuari vëllai im, i cili është personazh publik, i ka bërë një analizë reale, shkencore të gjitha atyre shpifjeve, që vinin pikërisht nga ajo gazetë dhe të vëna në gojën e një të moshuare, besoj të luajtur mendsh, do të thoja, më falni që unë e përdor këtë term sot, e cila, në moshën nëntëdhjetë e katër vjeçare kishte falsifikuar një dokument, që po t’i referohemi atij dokumenti, ajo sot duhet të ishte njëqind e gjashtëdhjetë e pesë vjeçare. Dhe kur një gazetë e nderuar do të thoja, që është gazetë e një partie historike sikurse është Partia Demokratike, vendos e bëhet “Parti e Hankes”, sepse kështu e ka emrin e moshuara, dhe vendos në gojën e saj falsitete për të denigruar familjen Topi, atherë nuk mendoj se mund të ketë argument tjetër për t’i thënë atij njeriu që: “Stop! Mos u fut më tej tek familjet, sepse është bërë zakon që në të gjithë fjalorin e tij të futet nëpër familje, bën diversion midis burrit dhe gruas, midis motrave, midis vëllezërve! Pra, kjo është sjellja më e shëmtuar që është patjetër një inerci e dukshme jo thjesht e një mentaliteti komunist, por edhe e një njeriu të lidhur shpirtërisht me komunizmin, i cili në mënyrë shumë të suksesshme, ka filluar ta bëjë edhe pjesë të kësaj bote të lirë e demokratike ku jetojmë sot.

Përsa i përket asaj që ju thatë, dhe natyrisht unë jam i mirëinformuar në çdo moment, do t’i thoja që nëse nuk e njeh Tiranën dhe nuk dëshiron ta njohësh Tiranën, në rast se nuk ke këshilltarë të aftë për të të orientuar në punë, atëhere do ta marr shumë miqësisht, përdore për t’i treguar se si është konfiguruar Tirana, sepse Tirana nuk është vetëm zyra e Kryeministrisë, por Tirana është shumë e madhe. Ka një popullsi, e cila sa vjen edhe rritet ku popullsia autoktone, i ka mirëpritur në vite dhe këtu është bukuria e këtij qyteti, që sot është gati një milion banorë, ku ka kultura të ndryshme përfaqësuese dhe falë këtij komunikimi qytetar, sot Tirana është një kryeqytet i jetueshëm mirë. Kjo për ta orientuar dhe për t’i thënë jo vetëm ku janë tokat e mia, të paraardhësve të mi. Dhe, unë e di që ai është bërë shumë humorist kohët e fundit, dhe padyshim që gjëja më e dhimbshme është kur të gjithë në kor fillojnë të qeshin nga shakatë, që më kujtojnë personazhin e famshëm të Revolucionit Kulturor kinez: Lej Fenin, por për t’i thënë që familjet e vjetra të Tiranës, vërtetë jetonin në qendër të Tiranës, por të gjitha me radhë kanë pasur toka bujqësore në periferi. Ka qenë një bollëk në Tiranë në atë kohë, të themi të drejtën dhe pikërisht për ta orientuar ekzaktësisht, aty ku përfundonte qyteti dhe është fjala pikërisht për Institutin e Kërkimeve Veterinare, në zonën e “Freskut”, aty fillon Komuna. Edhe sot e kësaj dite është territori administrativ i Komunës. Pra, qyteti kishte truall, ndërsa Komuna kishte tokën bujqësore. Ai e ka një shans për ta njohur terrenin, në rast se, për kaq vite me radhë, ta eliminojë udhëtimin me teleferik, që e bën çdo ditë, duke harruar që kalon në një park kombëtar, sikurse është Parku i Dajti, me shumë familje, me shumë biznese, e që ka imazhin e një rruge që sapo është bombarduar. Pra në vend që të bëjë ironi e të japë një imazh mashtrimi për shqiptarët, duhet të kuptojë që familja Topi, të gjithë paraardhësit janë në tokën e vet. Nëqoftëse dëshirion, t’ia bëjmë me dije se ku i kemi tokat, madje mund t’i dhurojmë edhe një pjesë toke. Le të vijë e të jetojë aty në paqe dhe në harmoni dhe mund t’i japim edhe leksione qytetarie, se si jetohet në harmoni pa bërë sherre.

Ne vimë në momentin e fundit dhe në pyetjen e fundit. Ju, natyrisht e keni deklaruar edhe më përpara, në mënyrë jo eksplicite, që ka shumë opsione pas përfundimit të Presidencës, por tashmë, nuk është një ngjarje e re në Tiranë që pritet të krijohet një parti në të cilën ju do të punoni e të tjera si këto. Kur e mendova se çfarë do t’ju pyes në këtë intervistë, isha me një kolegun tim, të cilin e respektoj shumë, ai bëri një pyetje që m’u duk jashtëzakonisht e mirë për t’ia marrë autorësinë. Ai tha: “Nëqoftëse në një parti të tillë do të vinin të gjithë ata, të cilët aktualisht janë të pakënaqur nga partitë ekzistuese, si do t’i kënaqë Topi ata”?

Megjithë respektin që kam për ty Adi, unë dëshiroj t’i qëndroj asaj që kam thënë publikisht deri tani: Që deri në fund të mandatit tim, që do të thotë deri në fund të këtij mandati, unë do të jem President i Republikës. Në Tiranë thuhen shumë gjëra, komentohen shumë gjëra, le t’ia lemë kohës, por e sigurtë është që deri në momentin e fundit, unë do të ushtroj të gjitha detyrimet e mia si President i Republikës. Pastaj, natyrisht unë jam njeri i lirë, kam mundësinë për të bërë zgjedhjen time, por në këtë moment unë flas si President i Republikës.

 
Lajme Shqip Tuesday, 13 March 2012 12:45

Kryeministri Sali Berisha ka sulmuar në mbledhjen e qeverisë presidentin Bamir Topi, i cili para disa ditësh kishte deklaruar se qeveria po bën një lëmsh me çështjen e pronave duke nxjerrë çdo muaj akte administrative.

Pikërisht për shkak se në mbledhje qeverie Berisha kishte në plan të nxirrte një tjetër akt administrativ për pronat, gjeti momentin të sulmojë presidentin duke thënë se ai ka mashtruar për të marrë pronat duke u hequr si kooperativist.

“Ai ka mashtruar me dokumente e pa dokumente për pronat. E ka bërë veten ish- kooperativist. Kooperativë bujqësore në qendër të Tiranës nuk ka pasur. Po çështje e pronës është një problem në shumë vende të zhvilluara. Ndaj nuk duhet të irritohet askush pse qeveria ndërmerr akte administrative, pse qeveria përditëson ligjet për pronat. Në këtë fushë po lëvizet me vendosmëri të madhe. Por kjo është një fushë e komplikuar,” tha Berisha.

Kryeministri foli edhe për problemin e legalizimeve. Ai tha se shpërngulja është fenomen konstant në kapitalizëm. “Më thoni ju se kush ka rrafshuar ndërtimet e të shpërngulurve? Shpërngulja është një fenomen konstant i sistemit që po zhvillojmë. Çdokush ka të drejtë të zgjedhë vendin ku do banojë. Natyrisht krijohen probleme sociale, por ndaj janë autoritetet, për tu dhënë përgjigje këtyre problemeve. Ndaj çështjet e pronësisë nuk janë të thjeshta. Ato zgjidhen me ligje, me platforma, alternativa,” u shpreh Berisha.

Meqë nesër është Dita e Verës, Berisha u premtoi shqiptarëve një festë të madhe në 20 vjetorin e zgjedhjeve të 22 marsit 1992. “Do bëj një festë tjetër tani, 20 vjetorin e përmbysjes së diktaturës me votë. Ky 20 vjetor vjen si kurorë e bukur në këtë 100 vjetor të pavarësisë, vjen si përpjekje e shqiptarëve për demokraci,” tha Berisha.

 
Lajme Shqip Friday, 02 March 2012 13:42

Lezhë-Qyteti i Lezhës por edhe gjithë Shqipëria ka përkujtuar sot 568-vjetorin e Kuvendit të Lezhës me një serë aktivitetesh, si një nga ngjarjet më të rëndësishme në historinë e kombit shqiptar.

Në ceremoninë përkujtimore, organizuar nga Bashkia e këtij qyteti, morën pjesë kryeministri Sali Berisha, kryetarja e Kuvendit, Jozefina Topalli, personalitete nga Kosova, Maqedonia, drejtues lokalë, qytetarë, etj.

Natyrshëm që i pranishëm duhej dhe pritej të ishte edhe presidenti i Republikës së Shqipërisë Bamir Topi, por kreut të shtetit i është mohuar e drejta e fjalës dhe për këtë arsye ai ka refuzuar pjesëmarrjen.

Në një njoftim të publikuar në faqen e presidencës sqarohet pikërisht mungesa e presidentit Topi në këtë eveniment.

 “Presidenti i Republikës, Prof. Dr. Bamir Topi ka marrë ftesën zyrtare nga Bashkia Lezhë për të marrë pjesë në ceremonitë zyrtare në përkujtim të 568-vjetorit të Kuvendit të Lezhës. Në përputhje me legjislacionin, praktikat dhe rregullat protokollare të shtetit shqiptar më datë 1 mars 2012, Presidenti i ka konfirmuar pjesëmarrjen e tij dhe fjalën përshëndetëse Drejtorisë së Protokollit të Shtetit, e cila gjithashtu është shprehur dakord me këtë praktikë”-thuhet në njoftim.

Por më tutje presidenca shpjegon se pikërisht në prag të ceremonisë, “më datë 2 mars 2012, Kabineti i Presidentit të Republikës ka marrë një njoftim të dytë nga Protokolli i Shtetit, sipas të cilit Presidentit i mohohet e drejta e fjalës dhe e përshëndetjes në këtë ceremoni”.

“Duke e konsideruar këtë akt përjashtues, si sjellje të padenjë zyrtare, si shkelje flagrante e normave të Protokollit të Shtetit, si mungesë respekti për institucionet e shtetit, për qytetarët e Lezhës si dhe për ngjarjen historike të cilën përkujtojmë sot, Presidenti nuk mund të bëhej pjesë formale e prezencës në këtë ceremoni”-thuhet në njoftim.

Më 2 Mars të vitit 1444 Gjergj Kastrioti Skënderbeu zgjodhi Lezhën për të bërë të mundur bashkimin e gjithë princave shqiptar, si nje vend i garantuar dhe i Besës.(LajmeShqip.com)

 
Lajme Shqip Monday, 26 December 2011 09:00

Tiranë- Kryeministri Sali Berisha, i pranishëm në një emision televiziv, garantoi se zgjedhja e presidentit të ri do të jetë zgjedhje kushtetuese dhe në përputhje të plotë me të. “Presidenti do të zgjidhet me Kushtetutë dhe do të jetë kandidat i maxhorancës”, tha Berisha.

Duke u shprehur se ky vend nuk mund të bëhet nëse nuk konsolidojmë kushtetutën e tij, Berisha kujtoi se  ndryshimet në Kushtetutë u bënë në marrëveshje me kreun e opozitës, Edi Rama, ku u ra dakort që presidenti të zgjidhet me formulën 50 +1.

Berisha tha se “nuk mund ta bëjmë presidentin pre të ambicieve politike dhe t’a fusim vendin në zgjedhje” dhe duke konsideruar që “politika është dallim”, vlerësoi se “Kushtetuta është demokratike dhe kjo do të respektohet”.

Kryeministri e konsideroi të vonuar deklaratën e presidentit Topi për mosrikandidim. “Ajo vjen pas dy javësh ku u bëra të qartë shqiptarëve se ai nuk do të jetë më president. Kjo deklaratë do ishte më mirë të vinte tre javë më parë, por si i thonë, më mirë vonë se kurrë”, tha Berisha.

Sipas tij, zoti Topi, gjatë presidencës së tij, ka ndërmarrë një sërë aktesh të papajtueshme me programin e Partisë Demokratike, ka shkelur disa nga parimet e mëdha programore të saj, duke përmendur ketu refuzimin e ligjit të lustracionit, implikimin në ngjarjet e 21 janarit dhe një sëri qëndrimesh të tjera, të cilat i konsideroi “absolutisht pa asnjë bazë”.

Kryeministri u shpreh se “aktualisht presidenca po deinstitucionalizon institucionin në një partiçkë të vogël, gjë që nuk ka ndodhur në historinë e ndonjë vendi”, e që e shfrytëzon duke dëmtuar thelbin e vetë funksionit të kreut të shtetit.

Kryeministri kujtoi se “de fakto dhe de jure, Këshilli i Lartë i Drejtësisë është liria e drejtësisë, ekzekutivi që emëron e shkarkon, një pushtet që duhet te jetë tërësisht i pavarur, por që sot po sundohet nga një partiçkë e vogël, që e provoi veten në regjistrim, partia faqezi, sharlatane dhe morën përgjigjen me censusin e vendit”.

Duke e konsideruar si periudhë të shkurtër kohën që institucioni i Presidencës do të vendoset në kushtetueshmëri të plotë, Berisha kritikoi përgjegjësinë që ka Presidenca për situatën ku ndodhet sistemi i Drejtësisë.

“Mendoj se përgjegjësitë për situatën aktuale të drejtësisë në këtë sistem janë para dhe mbi të gjitha të qeverisjes së drejtësisë së KLD-së. Ky institucion, sipas dokumentave ndërkombëtare, ka përgjegjësi të madhe për situtatën aktuale të sistemit të drejtësisë. Kushtetua është ligj i shkëlqyer, ligjet janë shumë të mira, por rasti është i paprecedent”, tha Berisha.

Treguesit e fundit të Censusit, Berisha i vlerësoi si “proces madhor”. Në këto 10 vjet Shqipëria ka shumëfishuar klasën e mesme mbi 6 herë dhe kjo është arritje e jashtëzakonshme.

“Ky sistem që ne ndërtojmë, bazohet tërësisht në klasën e mesme që lufton varfërinë. Shqipëria ka 740 mijë familje ku 300 mijë kanë nga më shumë se një banesë. Brenda 10 viteve janë ndërtuar 280 mijë banesa, shumë më shumë nga sa ishin ndërtuar gjatë mbretërisë dhe diktaturës të marra së bashku. Pra, njerëzit po ndërtojnë vertet një të ardhme dhe ky është censusi, se do te ketë dhe shumë tregues të tjerë”, tha Berisha. (LajmeShqip.com)

 

 

 

 
Lajme Shqip Friday, 16 December 2011 20:32

Pogradec-Presidenti i Shqipërisë Bamir Topi ka replikuar me ironi ndaj deklaratave të kryeministrit Sali Berisha, i cili tha një ditë më parë se PD kurrësesi nuk do ta rikandidonte atë në postin e kreut të shtetit dhe se madje Topi duhet të japë dorëheqjen pasi presidenca nuk mund të jetë një parti politike.

I pranishëm në ditën e në festën e hapjes së buteve të verës në Pogradec, presidenti Bamir Topi, tha se në poltikë edhe në futboll preferon të luajë në qendër.

“Jam lojtar i qendrës. Edhe kur kam luajtur futboll kam luajtur ne qendër. Të mos e ngushtojmë zonën e lojës. Ti japim jetës dimension real dhe të mos ia lëmë vetëm politikës”, është shprehur Presidenti Topi.

Kryeministri Sali Berisha deklaroi dje në mbrëmje, se “në asnjë rast dhe rrethanë maxhoranca nuk do të rikandidonte Bamir Topin në postin e Presidentit të Republikës.

Përsa i përket marrëdhënieve të Presidentit Topi me maxhorancën, Berisha tha se, “në historinë e një vendi nuk mund të ketë asgjë më rrënuese për institucionin qendror të shtetit, se sa deklarimi i Presidentit në detyrë, për të krijuar parti”.

 “Nëse flitet për dinjitet shtetëror, kjo është e rëndë, sepse Presidenti qëndron qartësisht jashtë forcave politike dhe presidenca kurrë nuk mund të jetë një parti politike në një Republikë Parlamentare. Ai ka një rrugë, të japë dorëheqjen dhe pastaj të krijojë parti politike, meqënëse maxhoranca e cila e kandidoi ka deklaruar publikisht se nuk do ta rikandidojë. Kjo është e prerë” tha Berisha.

Kryeministri Sali Berisha deklaroi se Partia Demokratike do të ketë kandidatin e vetë në zgjedhjet presidenciale të 2012″, ndërsa hodhi poshtë çdo mundësi për një kandidim të tij për këtë post.

Ai tha se Fatos Nano është lideri i së majtës dhe ai nuk mund të jetë kandidati i propozuar nga Partia Demokratike për postin e Presidentit.

Sipas tij “PD ka të drejtën të kandidoj çdo drejtues të saj për President Republike”. “PD ka një numër të madh personalitetesh që mund ti promovojë në atë post dhe nuk ka pengesë për të përzgjedhur kandidatin më të mirë që ajo mendon për postin e Presidentit”, tha Berisha. (LajmeShqip.com)

.

 

 
Lajme Shqip Friday, 16 December 2011 08:00

Tiranë- Kryeministri Sali Berisha deklaroi dje në mbrëmje, se “në asnjë rast dhe rrethanë maxhoranca nuk do të rikandidonte Bamir Topin në postin e Presidentit të Republikës.

I ftuar në një emision televiziv “Opinion” në Tv Klan, Berisha komentoi marrëdhëniet e maxhorancës me Kreun e Shtetit dhe miratimin sot në Kuvend të z. Bujar Leskaj në postin e kryetarit të Kontrollit të Lartë të Shtetit.

“Për aq kohë sa Presidenti i Republikës bëri të qartë se nuk kishte ndërmend të respektonte vendimin e fundit të Gjykatës Kushtetuese, që përcakton qartë detyrimin e konsultimeve të ndërsjellta, mbetej që ose KLSH të lihej pa kryetar deri në fund të mandatit të Topit, dhe maxhoranca i kishte votat për ta bërë këtë, ose të prevalonte institucionalizimi dhe KLSH të kishte kryetarin e saj”, tha Berisha.

Përsa i përket marrëdhënieve të Presidentit Topi me maxhorancën, Berisha tha se, “në historinë e një vendi nuk mund të ketë asgjë më rrënuese për institucionin qendror të shtetit, se sa deklarimi i Presidentit në detyrë, për të krijuar parti”.

 “Nëse flitet për dinjitet shtetëror, kjo është e rëndë, sepse Presidenti qëndron qartësisht jashtë forcave politike dhe presidenca kurrë nuk mund të jetë një parti politike në një Republikë Parlamentare. Ai ka një rrugë, të japë dorëheqjen dhe pastaj të krijojë parti politike, meqënëse maxhoranca e cila e kandidoi ka deklaruar publikisht se nuk do ta rikandidojë. Kjo është e prerë. Nuk mund të bëjë kompromise artificiale, pasi kjo do të thotë të marrësh peng presidencën. Të votosh një President për të shmangur krijimin e një partie që të bënë dëm ty, do të thotë të bësh pazare”, tha Berisha.

Berisha: PD do ketë kandidatin e vetë për president

Kryeministri Sali Berisha deklaroi se Partia Demokratike do të ketë kandidatin e vetë në zgjedhjet presidenciale të 2012″, ndërsa hodhi poshtë çdo mundësi për një kandidim të tij për këtë post.

Ai tha se Fatos Nano është lideri i së majtës dhe ai nuk mund të jetë kandidati i propozuar nga Partia Demokratike për postin e Presidentit.

“PD do të ketë kandidatin e vet dhe padiskutim që përjashtohet Fatos Nano, sepse ai është lideri politik i së majtës”, tha Berisha.

Sipas tij “PD ka të drejtën të kandidoj çdo drejtues të saj për President Republike”. “PD ka një numër të madh personalitetesh që mund ti promovojë në atë post dhe nuk ka pengesë për të përzgjedhur kandidatin më të mirë që ajo mendon për postin e Presidentit”, tha Berisha.

Kryeministri theksoi se “koalicioni i djathtë funksionon në mënyrë të përsosur dhe i ka të gjitha votat për të votuar Presidentin e Republikës, zgjedhja e të cilit do të bëhet në përputhje me Kushtetutën e vendit”.

 I pyetur nëse Jozefina Topalli mund të jetë kandidatura e PD-së për postin e Presidentit, Berisha tha se, “ajo, sikurse dhe disa drejtues të tjerë të PD-së kanë të gjitha cilësitë për të qenë në atë post, por në mënyrë absolute nuk ekziston dhe nuk do të ekzistoj as edhe një kandidaturë deri sa të filloj gara presidenciale”.

“Bamir Topi është President deri ditën që i skadon mandati dhe nuk do të ketë as edhe një emër deri në ditën që mbaron mandati i tij”, tha Berisha, ndërsa përjashtoi çdo mundësi për propozimin e një kandidature jo politike.

Sipas tij, “Presidenti i vendit është një post politik dhe nuk është post jo politik”. (LajmeShqip.com)

 
Lajme Shqip Monday, 12 December 2011 11:55

Tiranë-Spartak Ngjela, një nga përfaqësuesit më të rëndësishëm të opozitës në Shqipëri, shprehet në një intervistë për “Shqip”, se lajmi në politikën shqiptare është padyshim “fenomeni Topi”. 

Sipas Ngjelës, një parti e mundshme e Presidentit do të fitonte pikë djathtas, ndaj Berisha si kundërlëvizje mund të shpallte zgjedhjet e parakohshme parlamentare, për të mos i lënë mundësi Topit që të formësojë forcën e re politike. Por sipas politikanit të njohur, çdo lëvizje e ka një kundërpërgjigje.

“Presidenti Topi ka dalë në skenën e politikës shqiptare si një faktor i veçantë dhe unë mendoj se ka bërë shumë mirë. Nëse ai do të vijojë me këtë temp, atëherë do të gjendemi përpara “fenomenit Topi”, i cili mendoj se do t’i bënte shumë mirë politikës shqiptare në këto momente ku ngjan se gjithçka ka ngrirë në mungesë idesh dhe konceptesh për një politikë moderne”, eshte shprehur Ngjela.

“Që të analizosh duhet të mbështetesh te faktet; dhe fakti i njohur botërisht sot është vetëm prononcimi i Bamir Topit që, pas mandatit presidencial, do të vijojë të merret me politikë, ndoshta në një parti të re. Është gjithashtu tensioni që ka ngritur te “grupi i Saliut” në Partinë Demokratike, por është edhe entuziazmi që ka krijuar djathtas, dhe jo vetëm djathtas”- ka thënë Ngjela.

Sipas tij, të gjitha këto të bëjnë të mendosh se “Lëvizja Topi” do të ketë rezonancë të konsiderueshme në opinionin publik shqiptar dhe, për këtë fakt, mendoj se gjendemi përballë një fenomeni pozitiv. 

Njgela shton se sot gjendja politike në Shqipëri është e paralizuar, dhe paraliza vjen nga mungesa e ideve.

“Opinioni shqiptar që është i tejngarkuar emocionalisht kundër qeverisë së Kryeministrit Sali, nuk mund të durojë tërheqje, sepse humbet në vorbullën e pesimizmit, pasi e mendon paralizën opozitare si dobësi të opozitës dhe forcë të qeverisë”-vijon Ngjela. 

Kjo gjë sipas tij krijon një masë njerëzish, të cilët nuk gjejnë më motiv për të votuar dhe sigurisht që i krijon qeverisë së degraduar një hapësirë për të fituar zgjedhjet.

“E gjithë kjo situatë, do të elektrizohej nëse një forcë e re, me program të qartë antiqeveritar, me denoncime dhe me një verb të thekshëm demokratik dhe reformator, do të krijonte në opinionin publik një shpresë të re, por do ta shkundte edhe opozitën aktuale nga pozicionoi qesharak që ka marrë, sepse do t’i kujtonte se nuk është vetëm ajo në këtë luftë”-përfundon Ngjela.

 

 

 

12