Lajme Shqip Thursday, 26 September 2013 22:55

Drejtoria Rajonale e Tiranës për Tatimpaguesit e Mëdhenj (NJTM) pranë administratës tatimore, ka kërkuar në Gjykatën e Rrethit Gjyqësor të kryeqytetit shpalljen si të falimentuar për dy nga kompanitë më të mëdha të sektorit të hidrokarbureve këto vitet e fundit.

Të dy kompanitë deri tani kanë qenë në pronësi të biznesmenit Rezart Taçi, i cili, siç dihet, këtë vit u detyrua të shesë aktivitetet e tij, si: ARMO, etj; për shkak të borxheve të papërballueshme.

Në kontratën, e lidhur me një firmë të panjohur nga Ishujt e Virgjër Britanikë, pas së cilës dyshohet se fshihen biznese nga Azerbajxhani, Taçi angazhohej që, për pesë vjet, të mos merrte pjesë direkt në tregun e hidrokarbureve.

Padia e parë civile e ngritur nga Tatimet ka të bëjë me shpalljen e falimentit për kompaninë e tij “Taçi Oil International Trading sha”.

Kjo padi është regjistruar në Gjykatë më datë 25 shtator.

Ndërkohë, padia e dytë ka të bëjë me kërkesën për proces falimenti edhe për kompaninë e tij KUID të shitjes së produkteve hidrokarbure.

Edhe kjo padi është regjistruar në të njëjtën datë, ndërsa Gjyqtarë të çështjeve janë caktuar përkatësisht Bledar Abdullai dhe Mariana Shegani (Dedi). 

 
Lajme Shqip Saturday, 17 August 2013 12:14

 

 

 

Shqiptarja.com ka raportuar se biznesmeni Rezart Taçi ka gjetur një mënyrë të sofistikuar për të siguruar pjesëmarrjen e tij të mëtejshme në tregun e shitjes së karburanteve në vend, ndonëse në kontratën e shitjes së aksioneve që kishte tek ARMO ka pranuar që, për pesë vjet, të tërhiqet, sëbashku me motrën e tij Anika, nga çdo aktivitet që ka lidhje me hidrokarburet.

Por, pak ditë para se të nënshkruante kontratës e shitjes së aksioneve të ARMO-s, Taçi i ka kaluar në pronësi mbi 70 pika karburantesh, të shpërndara në të gjitha rrethet e vendit, njeriut të tij të besuar Irgen Selfo, bodigard i tij.

Kjo vihet re në regjistrimet e kryera në QKR. Më datë 6 gusht 2013 Taçi ka nënshkruar kontratën e shitjes së pjesës së tij tek rafineria e naftës, ndërsa më 7 gusht, 24 orë më pas, QKR-ja ka regjistruar shtimin e mbi 70 adresave të reja të biznesit (pika shitjeje me pakicë të karburantit) nga kompania Kuid, në pronësi 100% të Taçit, tek Kuarta, në pronësi 100% të Irgen Selfos. Këtë veprim është bërë referuar kontratës së shitjes së këtyre objekteve, përfunduar më 2 gusht 2013, kur Taçi kishte përfunduar praktikisht bisedimet për shitjen e ARMO-s.
Kuarta është një kompani, e krijuar më 20 maj 2012 nga vetë Taçi, ku ai ishte 100% aksioner dhe administrator. Por, më 21 maj Taçi ja le vendin si administrator Selfos, duke mbetur aksioner i vetëm. Pas gjashtë muajsh, QKR-ja e kalon kompaninë në statusin ”pezulluar”. Kjo ka zgjatur deri më 17 korrik të këtij viti, kur befas firma aktivizohet sërish dhe aksioner i vetëm bëhet Irgen Selfo. Pra, rezulton se Taçi ka vënë bodigardin e tij që të drejtojë kompaninë në emër të vet.
Kompania që vijon ta mbajë Taçi, Kuid, rezulton që nga muaji maj të heqë dorë gradualisht nga pikat e veta të karburantit, për të kryer nja largim masiv të tyre më 31 korrik 2013, pak ditë para marrëveshjes. Një numër i madh i këtyre pikave kanë kaluar në pronësi të Kuartas.
 
Por kush është Irgen Selfo?

 

Ai është i vetmi që qendroi në burg për rrahjen e gazetarit Mero Baze nga Taçi dhe një person tjetër, më 2 nëntor 2009. Por, ka patur shumë ngjarje që kanë dëshmuar se marrëdhëniet e tij me bosin kanë qenë më të thella se ato midis shefit dhe vartësit. Kështu, në një rast, sipas medias sportive, më 14 maj 2009, bodigardi i Taçit ka shpenzuar 3.700 euro për fanelën e Ronaldinjos dhe 3.100 për atë të qendërmbrojtësit të Milanit, Senderos. Në këtë mënyrë, veç familjarëve të tij, Taçi ka përfshirë në ankandin e bamirësisë, të organizuar ngë Liri Berisha, edhe truprojat e tij.
Tani ai i ka dhënë atij edhe biznesin ”e ndaluar”.