Lajme Shqip Saturday, 25 August 2012 20:49

Tirana ka filluar me një fitore minimale 1-0 përballë Tomorit kampionatin e saj, duke i dhuruar një buzëqeshje trajnerit spanjoll Rubio, i cili e ka ndjekur ndeshjen nga tribuna e stadiumit të Beratit pasi nuk ka firmosur ende kontratën e re me bardheblutë.

Në një ndeshje ku ekipi vendas ka dominuar me lojën e tij, bardheblutë u janë falur një 11-metërshi të transformuar saktësisht nga Klodian Duro në minutën e 31-të të sfidës, i mjaftueshëm për të marrë tri pikë të rëndësishme për moral, në këto momente ku skuadra duket në gjendje të vështirë. Shkak është jo vetëm rinovimi i Rubios, por edhe mungesa e zhvillimit të një merkatoje të mirëfilltë nga kryeqytetasit, të cilët janë paraqitur në këtë ndeshje edhe me më pak lojtarë në stol se sa lejon rregullorja.

Në takimet e tjera, Laçi nuk ka arritur të festojë me një fitore rikthimin para tifozerisë së vet në ndeshjen kundër Beses, pas pezullimit të 9 muajve më parë të dhënë për shkak të ngjarjeve të dhunës në stadiumin e këtij qyteti. Golit të Vucajt në minutat e para të ndeshjes i është përgjigjur Kaja, që ka siguruar një barazim të rëndësishëm në transfertë për ekipin kavajas.

Në barazim 1-1 ka përfunduar edhe ndeshja mes Apolonisë dhe Kastriotit, ku skuadra fierake është shfaqur me probleme dhe pa një trajner në pankinë, duke konfirmuar mendimin e përgjithshëm se është pretendente kryesore për rënien nga kategoria në fundin e këtij sezoni. (LajmeShqip.com)

Kategoria Superiore

Java 1

24.08.2012

Vllaznia–Skënderbeu  1-3

25.08.2012

Tomori–Tirana             0-1

Laçi-Besa                          1-1

Apolonia-Kastrioti        1-1

26.08.2012

Shkumbini–Teuta

Kukësi-Luftëtari

Bylis-Flamurtari

 
Lajme Shqip Friday, 24 August 2012 20:54

Skënderbeu, kampion i Shqipërisë për dy vite radhazi në futboll, e ka filluar kampionatin me një fitore duke triumfuar 3-1 në transfertë në fushën e vështirë të Vllaznisë.

Në një ndeshje me shumë rivalitet, për shkak edhe të përforcimeve të rëndësishme të shkodranëve, duke filluar nga stoli ku ulej Shpëtim Duro, diferencën mes dy skuadrave e ka bërë sulmuesi kroat Pero Pejiç, i cili ka treguar aftësitë e tij para portës duke shënuar të tre golat për ekipin korçar.

Në fakt ka qenë skuadra shkodrane që është shfaqur më kërkuese që nga minutat e para, e mbështetur nga një publik i zjarrtë që kishte mbushur shkallët e stadiumit “Loro Boriçi”. Por Pejiç është bërë menjëherë protagonist me golat e tij, duke iu shmangur dy herë radhazi pozicionit jashtë loje të ekipit shkodran për të shënuar në portën e Vujadinoviç. Në fillimin e pjesës së dytë, ai ka plotësuar tregolëshin personal, duke vulosur praktikisht fatin e ndeshjes.

Pavarësisht tentativave të dëshpëruara të shkodranëve për të kërkuar një përmbysje, ata kanë arritur të shënojnë vetëm golin e nderit në minutën e 77-të me Smajlin, të paktën duke dhënë sinjale se në takimet e ardhshme mund të përmirësohen dhe të kërkojnë rezultate.

Sot zhvillohen një pjesë e ndeshjeve të tjera të javës së parë të Kategorisë Superiore ku bie në sy takimi Tomori-Tirana, për të parë se si do të fillojnë sezonin kryeqytetasit, të cilët në këtë edicion kanë pretendime për titull. (LajmeShqip.com)