Lajme Shqip Thursday, 11 August 2011 19:05

Shkodër – Sulmuesi i kombëtares, Hamdi Salihi, ish-futbollist i Vllaznisë, aktualisht pjesë e kampionatit austriak të futbollit pranë skuadrës së Rapidit të Vjenës, ka qënë padyshim heroi i ndeshjes së mbrëmshme Shqipëri-Mali i Zi, e luajtur në stadiumin “Loro Boriçi” të Shkodrës.

Ka qenë minuta e 69-të, kur pas një topi të harkuar nga distanca në adresë të tij, edhe pse me shpinë nga porta malazeze, Salihi ka bërë mrekullinë, kur me atë rrofeshatë spektakulare në hyrje të zonës së rreptësisë ka befasuar skuadrën mike dhe në veçanti portierin malazez, Mlladen Bozhoviç, i cili është shtangur kur e ka parë topin të përfundonte në rrjetën e tij duke mos i lënë asnjë shans që ai të reagonte.

Një gol, emocionet e të cilit çuan peshë një qytet të tyrë, i cili pas ndeshjes iu bashkua ultrasve “kuqezi” duke festuar deri në orët e para të mëngjesit në sheshin qëndron të qytetit.

Autori i golit është Hamdi Salihi, një djalë shkodran i talentuar që  falë cilësive që po demostron në Austri, është vënë në shënjëstër të disa klubeve të njohura europiane.

Nuk është rastësi që Salihi i shënon malazezëve, sepse një gjë të tillë ia ka bërë edhe ndeshjen paraardhëse miqësore duke i shënuar në shtëpinë e tyre, në stadiumin e Buduçnostit të Podgoricës, gol që edhe atje i dha fitoren Shqipërisë 1-0.

“Është gjithëmonë kënaqësi, të fitosh dhe të shënosh një gol në Shkodër, aty ku ke mësuar të luash futboll, ku ke gjithçka, ke familjen tënde”, tha Hamdi Salihi, pas ndeshjes.

Si e ndjetë veten në atë moment, kur rrofeshata juaj spektakulare e dërgoi topin në rrjetë, në trekëndëshin e djathtë të portjerit malazez Mlladen Bozhoviç?

“Mund të them se ishte një ëndërr e realizuar, aq më tepër në stadiumin e qytetit tim. Këtë gol dëshiroj t’ia dedikoj tifozërisë së zjarrtë shkodrane dhe familjes sime, që ka pjesen kryesore që unë të bëhesha futbollist i Vllaznisë, e më me pas në nivelet ku kam arriur sot”, shprehet Salihi.

Duke lënë pas fitoren me Malin e Zi, tashmë përpara është Franca, një tjetër beteje edhe më e fortë, aq më tepër kur luhet zyrtare për eleminateret e Europianit?

“Mendoj se do të jetë një ndeshje e vështirë, por atmosfera është shumë e mirë dhe do të luftojmë për të marrë pikë”, tha ai.

Shumë komente për merkaton e Salihit, ku emri juaj lakohet në disa skuadra europiane. Të rejat më të fundit rrethë mundësisë së transfertës suaj?

“Aktualisht jam në Viene tek Rapidi, ku kam kontratën, dhe besoj se nëse nuk do të dalë diçka shumë më e mirë, do të rri aty”, përfundon sulmuesi shkodran.

Ndërkohë duke iu rikthyer fitores së Shkodrës, statistikat tregojnë se kjo është ndeshja e tretë miqësore që Shqipëria zhvillon me Malin e Zi. E  para i takon vitit 1946 e zhvilluar në Shkodër e fituar me rezultatin e thellë 5-0, ku dy prej tyre mbajnë firmën e shkodranit Xhelal Juka. (LajmeShqip.com)

 
Lajme Shqip Thursday, 11 August 2011 12:14

Tiranë – Me fitoren e realizuar mbrëmë në stadiumin “Loro Boriçi” të Shkodrës me rezultatin 3 me 2, kombëtarja shqiptare e futbollit ka krijuar një klimë shumë pozitive për pragndeshjen Shqipëri-Francë, e vlefshme për eliminatoret e “Euro 2012”.

Tre golat e shënuar nga Bogdani, Hyka dhe Salihi, njëri më i bukur se tjetri, kanë ndezur peshë entuziasmin e tifozërisë kuqezi, jo vetëm në shkallët e stadiumit “Loro Boriçi”, por edhe jashtë tij. Me dhjetra e qindra grupe tifozësh, me flamur dhe dekorë të shumtë kuqezi mbushen sheshin qëndror të qytetit të Shkodrës, duke festuar deri në orët e vona të mesnatës suksesin e përfaqësueses sonë.

Ndërkohë, duke iu referuar deklaratave të trajnerëve të dhëna menjëherë pas ndeshjes, tekniku i Shqipërisë, Josip Kuzhe e konsideron këtë fitore shumë të rëndësishme në prag të ballafaqimit me Francën, ndërkohë që homologu i tij i Malit të Zi, Zllatko Kranjcar, edhe pse është mundur, ka dalë i kënaqur nga loja e të tijve, pasi në njëmbëdhjetëshin e parë të formacionit, ka patur disa mungesa serioze.

“Na gëzon fitorja, pasi luajtëm ndaj një kundërshtari shumë të fortë, i cili ka arritur rezultate shumë të mira në grupin europian përballë kundërshtarëve të fortë. Patëm momente me të vërtetë të mira ku meritonim të fitonim, por patëm edhe momente disi më pak të mira, ku nuk luajtëm mirë, por gjithësesi jam shumë i lumtur për këtë fitore”, u shpreh tekniku Kuzhe në konferencen e shtypit pas ndeshjes. Në vazhdim, ai shtoi se pas pësimit të golit të dytë në portën tonë, lojtarët tanë u çorientuan pak, pasi kërkonin të shënonin me çdo kusht, duke lënë pak hapësirë përpara mbrojtjes, por me kalimin e minutave filluam të organizohemi përsëri, duke marrë frenat e lojës, që na dha edhe rezultatin e dëshiruar. Kuzhe foli edhe për portjerin Ujkani, i cili edhe pse shfaqi pasiguri në disa reagime të tij në këtë ndeshje, shprehu besimin ndaj tij për të ardhmen, duke theksuar se e kemi fituar këtë portier si titullar. Ndërkohë, Kuzhe vlerësoi shumë golat e shënuar në portën malazeze me anë të Bogdanit, Hykës dhe Salihit, por që sipas tij, ndaj Francës duhet akoma më shumë për të shënuar në portën e tyre.

Në lidhje me disa kritika të adresuara ndaj tij për mos përfshirjen në kombëtare të elementit të ri me perspektive, ai tha se se “për momentin jemi të angazhuar për ndeshjet kualifikuese të Europianit, ndaj edhe kemi menduar që t’i mbarojmë këto ndeshje, dhe më pas të mendojmë për aktivizimin e tyre, sepse ato janë në vemendjen tonë, sidomos Roshi dhe Vajushi”.

Për Kuzhen, kjo fitore ishte shumë e rëndësishme, pasi krijon optimizmin e nevojshëm në momentin e duhur, pikërisht në prag të ndeshjes zyrtare të eliminatoreve të Europianit me Francën.

Ndërkohë, homologu i tij në pankinën e Malit të Zi , Zllatko Kranjcar, edhe pse e humbi ndeshjen në Shkodër, komplimentoi lojën e skuadrës së tij. “Ne luajtëm në Shkodër me disa mungesa shumë të rëndësishme të formacionit të parë, dhe zëvendësuesit e tyre i zbatuan më së miri detyrat taktike. Ishim me meritë në avantazh 2 me 1 dhe patëm mundësi ta fitonim ndeshjen, por pas ndalesës së përkohshme të ndeshjes si rezultat i reagimit të tifozëve shqiptarë, kjo ndikoi jo mirë psikologjikisht për futbollistët tanë, ndërkohë që për shqiptarët ishte e kundërta. Ata e shfrytëzuan këtë rast dhe shënuan dy herë, duke e merituar fitoren”, u shpreh Zllatko Kranjcar për median. (LajmeShqip.com)

 
Lajme Shqip Wednesday, 10 August 2011 21:57

Shkodër – Repriza ndodhi. Me një eurogol tjetër të sulmuesit shkodran, Hamdi Salihi, Shqipëria i dha vulë fitores së sontme kundër Malit të Zi, me rezultat 3-2.

Ishte kjo ndeshja e dytë miqësore brenda një viti midis Shqipërisë dhe Malit të Zi, e cila përfundoi, po ashtu, me fitoren e kuqezinjve.

Në ndeshjen tjetër miqësore, në mes të Podgoricës, vitin e kaluar Shqipëria e mposhti Malin e Zi po me golin e Hamdi Salihit, në minutën e 85-të, 1-0.

Stadiumi “Loro Boriqi” sonte kishte  festë dhe furia Kuq e Zi kishte pushtuar fushën e blertë në Shkodër.

Shqipëria avancoi e para me golin e Bogdanit, kurse Mali i Zi barazoi në minutën ’40, përmes lojtarit të Manchester City-t, Saviq. I njëjti e kaloi Malin e Zi në eprësi, në minutën ’48. Por, një eurogol i “Messit shqiptar”, Jahmir Hyka, nga një goditje e fuqishme nga distanca, barazoi shifrat.

Momenti pikant i ndeshjes ishte eurogoli me gërshërë, i Hamdi Salihit, sulmuesit shkodran të Rapidit të Vjenës, i cili e pranoi mjeshtërisht një krosim nga ish-mesfushori i Prishtinës, Debatik Curri, për ta përplasur topin në rrjetën malazeze, krejtësisht në stilin e Hugo Sachezit të dikurshëm, legjendës së Real Madridit.

Shqipëria dhe të gjithë lojtarët kuq e zi kënaqën sonte. U treguan heronj të vërtetë të në fushë, dhe shqiptarë në luftë për fitoren. Iu lumtë! Ndeshjet e tilla nuk janë gjithmonë veç miqësore. (LajmeShqip.com)

 
Lajme Shqip Wednesday, 10 August 2011 16:43

Shkodër – Një vit më parë, me një eurogol të Hamdi Salihit, kombëtarja shqiptare e kishte mposhtur atë malaziase me rezultatin 1-0, në një miqësore që u zhvillua në Podgoricë.

Ndërsa, sonte në “Loro Boriçi”, në Shkodër, ku pritet të jetë një atmosferë e zjarrtë kuq e zi, “çeta” e udhëhequr nga ylli evropian i Malit të Zi, Mirko Vuçiniç, sigurisht se do të kërkojë ta lajë turpin e një viti më parë.

Pavarësisht se rezultati nuk do të jetë shumë i rëndësishëm, dhe pavarësisht se ky takim po luhet në funksion të atyre që do të vijnë, sërish një përballje fqinjësh mbetet një derbi.
Në orën 20:00, dy skuadrat do t’i japin jetë një ndeshjeje që shpresohet të jetë e bukur dhe që është e sigurt se do të ndiqet nga shumë tifozë shkodranë.

Kombëtarja Kuq e Zi kthehet në Shkodër, në ndeshjen e tretë, aty ku përherë pati bilanc pozitiv. Më 29 mars të 8 viteve më parë, kuqezinjtë e drejtuar atëherë nga Brigel mposhtnin Rusinë me një 3-1 bindës, ku shënuan Rraklli, por edhe Altin Lala, si dhe gjigandi Igli Tare për të vulosur rezultatin përfundimtar. Një 0-0 ndaj Sllovenisë më 24 mars 2007 thjesht na thotë se në Shkodër kombëtarja nuk është mundur ende.

Këtë herë do të luhet për të përgatitur sa më mirë ndeshjet e radhës në eleminatoret e Euro 2012, Francën dhe Luksemburgun, natyrisht më shumë të parën, por edhe për të fituar. Trajneri Kuzhe e ka premtuar, madje ka deklaruar se skuadra do të luajë në sulm.
Të paktën një shkodran do të jetë në fushë dhe ky e ka emrin Hamdi Salihi, shqiptari që ndëshkoi fqinjët në ndeshjen e kaluar. (LajmeShqip.com)