Lajme Shqip Tuesday, 18 September 2012 16:05

Tiranë (PLOTESUAR 18 SHTATOR, 18:40)- Kuvendi i Shqipërisë miratoi me 130 vota pro, asnjë kundër dhe asnjë abstenim kufizimin e imunitetit për zyrtarët e lartë dhe gjyqtarët.

Po sot, Kuvendi hodhi poshtë me 60 vota pro, 63 kundër dhe 6 abstenim nismën e PS-së për ndryshimet kushtetuese. Menjëherë pas votimit, Kryetarja e Kuvendit, Jozefina Topalli tha se pas 10 viteve përpjekjesh, Kuvendi arriti të vendoste një prej standardeve evropiane të kërkuara prej kohësh.  Ajo e cilësoi ditën e sotme, si një dot të mirë, ndërsa ftoi deputetët që nesër të votojnë edhe ligjin për Gjykatën e Lartë.

Në seancën e sotme Kuvendi miratoi edhe disa ligje të tjera të rëndësishme, si ai për ratifikimin e marrëveshjes së huasë ndërmjet Shqipërisë dhe BERZH për asistencën sociale.  Disa shtesa dhe ndryshime në ligjin për kontrollin e pasurive të të zgjedhurve dhe nëpunësve, i ndryshuar. (LajmeShqip.com)

***************************************

Tiranë (PLOTESUAR 18 SHTATOR, 17:20)- Pasi falenderoi opozitën për konsensusin ndaj asaj që ai e quajti si “përpjekje shumëvjeçare” e demokratëve për të hequr barrierat për organet hetimore, pra imunitetin, kryeministri hodhi një lumë akuzash ndaj ish-presidentit Bamir Topi, ish-nënkreut të KLD-së Kreshnik Spahiu për afera korruptive gjatë kohës kur ishin në detyrë.

“Drejtësia nën drejtimin e Topi tuaj dhe ‘faqeziut’ ishte në periudhën më të errët të saj. Flisni me gjykatësit dhe do të shihni që transferimi i një gjyqtari nga Durrësi në Tiranë ishte një aferë korruptive prej 500 mijë eurosh”, deklaroi Berisha duke akuzuar më pas edhe opozitën se ka patur nën kontroll drejtësinë nëpërmjet ish-presidentit Topi dhe ish-nënkryetarit të KLD-së, Kreshnik Spahiu.

Deklaratave të kryeministrit Berisha, i replikoi kreu i grupit socialist, Gramoz Ruçi. Zoti Ruçi akuzoi kryeministrin për uzurpim të sistemit të drejtësisë dhe se paketa e tyre synon ta çlirojë këtë sistem nga politika.

Kreu i socialistëve në parlament akuzoi mazhorancën për lidhje me Ilir Xhakjan, vrasësi i cili pak ditë më parë në Shijak, ekzekutoi Komisarin e Policisë. Ruçi tha se Xhakja është shfrytëzuar për të mbledhur vota nga mazhoranca në kohë fushate.

“Ilir Xhakja, që deri dje e përdorje për të mbushur shportën elektorale, sot mundohesh t’ia faturosh opozitës. Më kot mundohesh. Ai guxoi ngriti dorë në mes të ditës ndaj uniformës së shtetit sepse ju e mbrojtët”, tha Ruçi. (LajmeShqip.com)

*****************************************************

TIRANE – Pak përpara votimit të draftit aq të rëndësishëm dhe të përfolur, për kufizimin e imunitetit të zyrtarëve, në një kohë kur PS ka rënë dakord ta votojë draftin, kryeministri Berisha e cilësoi këtë ditë si finalizimin e një lufte shumëvjeçare dhe një kapitull të ri për shqiptarët.

Sipas Berishës, mazhoranca nuk e ka humbur asnjëherë durimin për të kërkuar konsensusin e opozitës dhe ka bërë të gjitha lëshimet e nevojshme, në mënyrë që të arrihej një draft konsensual i pranuar nga të gjitha palat.

“Për mua personalisht kjo është një ditë e një rëndësie të jashtëzakonshme, është finalizimi i një beteje shumëvjeçare për realizimin e këtij akti madhor kushtetues, nga i cili theksoj nuk përfiton asnjë forcë politike, nuk mund të ketë kredibilitete individuale, nga i cili fiton qytetari, rendi kushtetues i Shqipërisë, Kushtetuta e vendit e cila bëhet një dokument më i drejtë më i barabartë për qytetarët e saj.”- u shpreh kryeministri.

Më tej shefi i qeverisë theksoi se mbetej i vendosur për ta përmbyllur çështjen e imunitetit me të gjitha mënyrat, duke përfshirë edhe zhvillimin e një referendumi, pavarësisht se do të shkonte kundër dëshirës së tij.

“Ju falënderoj jo se ju po votoni, por se dua të jem i hapur dhe i sinqertë. Referendumi, do shkoja kundër dëshirës sime, por për këtë çështje madhore unë kisha vendosur të shkonim drejt referendumit, pasi e konsideroja një çështje themelore jashtë tagrit tonë, kisha besim se shqiptarët do ta votonin. Kjo u shmang dhe për këtë ju falënderoj.”- vijoi Berisha. (LajmeShqip.com)

 
Lajme Shqip Thursday, 12 April 2012 18:51

Tiranë (PLOTESUAR 20:00) Kryetari i Partisë Socialiste, Edi Rama, ka reaguar lidhur me mënyrën e votimit të anëtarit të ri të Këshillit të Lartë të Drejtësisë në Kuvend, duke e cilësuar atë në kundërshtim me Rregulloren e Kuvendit.

Gjatë një konference për mediat, Rama akuzoi kryeministrin Sali Berisha për manipulim të procesit të votimit. “Sot, Saliu u fut me kokë në rolin e Ristanit, për të imponuar një standard të panjohur dhe të papranueshëm parlamentar, duke e kthyer votimin nga një proces kushtetues, mbështetur në rregullore, në praktikën parlamentare, në një proces që është shprehje flagrante e shkeljes së Kushtetutës, të rregullores së Parlamentit dhe praktikës parlamentare”, tha Rama.

Ndërkohë edhe kryetari i Grupit parlamentar të Partisë Socialiste, Gramoz Ruçi, në një prononcim për mediat pas seancës plenare ku u votua mes debatesh anëtari i ri i KLD-së, Elvis Çefa, tha se “kishim rënë dakord me kryetaren e Kuvendit për votim të fshehtë.

Por maxhoranca kërkoi që veç vulës, fleta e votimit të kishte edhe firmat e anëtarëve të komisionit që merret me procedurat e votimit. Kështu ata kërkuan që fleta e votimit të firmosej në momentin që tërhiqej nga çdo deputet. Ne nuk mund të lejonim identifikimin e fletëve të votimit. Këtu lindi konflikti dhe u bllokua votimi”.

Ruçi u shpreh se në momentin që pati këtë bllokim, ishte vetë kryeministri Berisha, i cili tentoi të votonte me fletë votimi të firmosur nga anëtarët e komisionit që merret me procedurat e votimit.

“Unë ndërhyra për të mos lejuar këtë mënyrë votimi. Berisha vërtetë ka vjedhur votat e shqiptarëve, por grupi ynë parlamentar nuk mund ta lejonte që të vidhte edhe votat tona në sallën e Kuvendit”, tha Ruçi. Sipas tij, në momentin kur Berisha e pa se nuk mund të vazhdonte të realizonte qëllimin e tij, i dha urdhër kryetares së Parlamentit që të votohej në mënyrë elektronike.

************************

Tiranë-Demokratët mundën të ruajnë një mazhorancë minimale në parlament, 71 vota, për të kaluar gati in extremis kandidaturën e Elis Çefës në Këshillin e Lartë të Drejtësisë. Përballë Elis Çefës socialistët kishin propozuar avokatin Ardian Visha, mbrojtës ligjor i Fatmir Mediut në procesin e Gërdecit. Madje avokati Visha kishte deklaruar në mes të Komisionit të Ligjeve se besonte në pafajësinë e klientit të tij, Fatmir Mediu, duke iu kundërvënë kështu hapur qendrimit të socialistëve që e konsiderojnë “Gërdecin” si një krim shtetëror.

Ndaj seanca e të enjtes paraqiste interes të veçantë edhe për të parë lëvizjet e votave. Një séance ku si rrallë ndonjëherë merrnin pjesë të tërë deputetët e Kuvendit, me përjashtim të Rudina Seserit që ka dhënë dorëheqjen. Por, votimi që për emërime të tilla është i fshehtë, shkaktoi debat pikërisht në kohën kur Sekretariati i Votimit po përgatiste kutitë për një votim manual. Duke qenë se seanca në këtë moment ishte e ndërprerë, planet që po ndiqni janë xhiruar në mënyrë amatore me celular nga një deputet i opozitës.

Gjithçka duket gati për të filluar votimin. Por, situata tensionohet pasi mazhoranca kërkon që fletët të firmosen nga Sekretariati i Votimit në momentin kur deputetët do të paraqiten për t’i tërhequr ato. Opozita, duke pasur frikë se fletët do të firmoseshin në mënyra të ndryshme që mund të identifikonin votën e deputetëve të caktuar, kërkoi ose firmosjen e njëhershme të të gjitha fletëve përpara fillimit të votimi, ose vulosjen e tyre.

Kjo nuk pranohet nga mazhoranca dhe situata tensionohet, madje mes vetë kryeministrit Berisha dhe kryetarit të grupit socialist Gramoz Ruçi. Në këto kushte, në mungesë të konsensusit dhe ndërkohë që opozita po protestonte pranë foltores, kryetarja e Kuvendit çeli seancën dhe i hodhi kandidaturat për votim në mënyrë elektronike. Një mënyrë kjo, që teknikisht është e fshehtë, por që socialistët e hodhën poshtë qysh në fillim sepse dyshojnë që kushdo që ka akses në sistemin e votimit elektronik, mund të kontrollojë votën e çdo deputeti.

Ndërkohë, duke përmendur nominalisht disa emra deputetësh, si Kastriot Islami, Ilir Meta, Lefter Koka apo Vangjel Tavo, kryetarja e Kuvendit në mos dekonspiroi votën e tyre, hodhi një hije të fortë dyshimi, pasi në fund kandidati i mazhorancës mori 71 vota pro, asnjë kundër dhe asnjë abstenim. Pra të tërë ata që morën pjesë në votim, votuan për të. Dhe sipas deputetëve të pranishëm në sallë, në votim kanë marrë pjesë edhe ish-deputeti socialist Kastriot Islami edhe deputeti Fatmir Mediu.

Burime të caktuara brenda LSI-së hedhin poshtë pjesmarrjen e Ilir Metës në votim. Por një gjë është e sigurt: mazhoranca pati rrjedhje votash. E mbetur me 73 deputetë pas largimit të Gazmend Oketës, mazhorancës në këtë seancë iu bashkua Kastriot Islami, që e çoi këtë numër në 74. Por kandidatura e demokratëve mori 71 vota, çka do të thotë se 3 deputetë, me shumë gjasë të LSI-së, nuk morën pjesë në votim.

Pas mbarimit të seancës socialistët mblodhën urgjent grupin parlamentar, kurse kryetarja e Kuvendit nga ana e saj nxori një deklaratë që dënoi ashpër atë që ajo e konsideroi “dhunë të organizuar të një grupi deputetësh të opozitës”. Në mbështetje të kësaj, kryetarja Topalli shpërndau disa plane filmike të xhiruara nga kameramani i Kuvendit, ku dëgjohet kryetari i grupit socialist, Gramoz Ruci të deklarojë se këtu vendosim ne.

Kryetarja Topalli në sqarimin e saj i referohet rregullores së Kuvendit sa i takon procedurës së votimit dhe një praktike votimit të zbatuar në 20 vjet parlamentarizëm. Kjo dhunë e organizuar dhe e qëllimshme, deklaron kryetarja Topalli, është dhunë ndaj parlamentit, parlamentarizmit dhe shtetit ligjor. I zgjedhur në këtë mënyrë si përfaqësues i parlamentit në Këshillin e Lartë të Drejtësisë, Elis Çefa do të zëvendësojë Kreshnik Spahiun. (TCH)

 
Lajme Shqip Friday, 10 February 2012 10:16

Tiranë-Nënkryetari i Këshillit të Lartë të Drejtësisë në Shqipëri, Kreshnik Spahiu ka dhënë sot dorëheqjen nga posti që mbante prej më shumë se 3 vjetësh.

Spahiu njoftoi dorëheqjen e tij në një prononcim të drejtpërdrejtë për mediat, duke thënë se shkak për vendimin e tij janë presionet e vazhdueshme të pushtetit, që kanë nisur që në vitin 2008.

“Jam sot para jush për të deklaruar se jo më larg se 3 vjet e gjysmë më parë, në korrik 2008-ës nisi udhën një konflikt i qeverisë me KLD-në. Prej 3 vitesh u bllokua reforma në drejtësi”. –tha Spahiu.

Spahiu shtoi se kjo nuk është lufta e tij personale, pasi e kishte zgjedhur të ardhmen dhe largimin nga posti i nënkryetarit të KLD-së.

Ai deklaroi më tej se kjo çështje do të hetohet nga Gjykata Kushtetuese dhe se vetë ai “largohet nga detyra për t’i hapur rrugë një vendimi të paanshëm”. “Edhe nëse ky vendim do jetë në favorin tim, nuk do të kthehem më në këtë post”, tha Spahiu më tej.

Spahiu akuzoi kryeministrin Berisha për ndërhyrje të pushtetit në drejtësi, duke thënë se ata që e kanë sulmuar prej 3 vjet e gjysmë kanë frikë të lënë karrigen e pushtetit. “Ata kanë frikë nga rruga, nga qyteti dhe publiku, dhe po kacavirren pas karriges së pushtetit, sepse ata mendojnë se do të vdesin në pushtet”-tha Spahiu. (LajmeShqip.com)

 

 

 
Lajme Shqip Thursday, 26 January 2012 10:50

Tiranë (PLOTESUAR 26 Janar, 12:40) Kuvendi i Shqipërisë miratoi sot me 73 vota pro dhe 57 kundër ngritjen e komisionit hetimor për shkarkimin nga detyra të nënkryetarit të Këshillit të Lart të Drejtësisë Kreshnik Spahiu.

Deputetët e Partisë Socialiste të opozitës kundërshtuan në Kuvend kërkesën e grupit parlamentar të Partisë Demokratike për nisjen e procedurave të shkarkimit të zv/kryetarit të KLD-së, Kreshnik Spahiu, përmes ngritjes së një komisioni hetimor.

Deputeti Fatmir Xhafaj, në emër të grupit parlamentar të Partisë Socialiste, u shpreh që në fillim se opozita “nuk do të votojë ngritjen e këtij komisioni, jo se ajo është në mbështetje të Kreshnik Spahiut, pasi nuk e vlerëson pozitivisht punën e tij në krye të KLD-së, por është kundër ngritjes së tij, pasi i mungon morali politik”.   

“Kjo është një nismë e cënueshme në frymën kushtetuese. Kërkesa dhe mënyra se si ajo  është hartuar, është e sforcuar dhe nuk i përmbush kriteret e Kushtetutës”, tha deputeti Xhafaj.

Sipas tij, “ligji për KLD-në përcakton se mbarimi i mandatit për anëtarin para afatit përcaktohet nga KLD. Dhe në rastin e shkarkimit të Spahiut, kompetencën e ka vetëm KLD dhe jo Kuvendi”.

Ndërkohë grupi Parlamentar i Partisë Demokratike i propozoi seancës së sotme plenare të Kuvendit të miratojë kërkesën për nisjen e procedurave për shkarkimin e zv/kryetarit të Këshillit të Lartë të Drejtësisë, Kreshnik Spahiu, kërkesë e cila është miratuar më parë nga Komisioni i Ligjeve.

Në seancën e sotme plenare, deputeteti demokrat, njëherësh relator i çështjes, Viktor Gumi, paraqiti relacionin, ku sqaroi dhe arsyet se pse duhet të nisë kjo procedurë.

“Komisioni i Ligjeve i ka propozuar seancës plenare që t’i përgjigjet pozitivisht kërkesës së grupit të nismëtarëve dhe të miratojë për këtë qëllim projektvendimin për ngritjen e Komsionit Hetimor dhe caktimin e objektit, përbërjes dhe afatit të komisionit  për shqyrtimin e kërkesës për nisjen e procedurës për shkarkimin nga detyra të Kreshnik Spahiut, zv.kryetar i KLD”, tha Gumi.

Deputeti Gumi sqaroi më tej se pas paraqitjes së kërkesës së deputetëve demokratë, Spahiu është lajmëruar për mundësinë që kishte për të qenë i pranishëm në seancën e Komisionit të Ligjeve, ku do të shqyrtohej kërkesa, si dhe për të paraqitur vlerësimin e tij për respekt të anës formale juridike.

“Spahiu u paraqit në mbledhjen e Komisionit, ku iu bë e ditur roli i tij, por për shkak të akteve dhe sjelljeve tendencioze, fyese dhe të papranueshme për Komisionin e Ligjeve dhe Kuvendit, mungesën e theksuar të respektit institucional dhe etikës në komunikim, vijimësinë e sjelljeve të padenja, ndonëse ato kryheshin pas paralajmërimeve, Spahiu u dëbua nga salla”, tha Gumi.

Gumi sqaroi më tej arsyet e kërkesës së paraqitur nga deputetët demokrate, si dhe procedurat e ndjekura deri tani. (LajmeShqip.com)

**************************

Tiranë (PLOTESUAR 26 Janar, 11:40) -Nënkryetari i Këshillit të Lartë të Drejtësisë kërkon që të flasë para deputetëve në Kuvend, ndërsa shqyrtohet pikërisht kërkesa e një grupi deputetësh “Për nisjen e procedurës së shkarkimit të tij nga detyra.

Spahiu i ka dërguar një letër kryetares së Kuvendit Jozefina Topalli, duke i kërkuar që të flasë në seancën e sotme ndërsa organi ligjvënës ka nisur procedurat per shkarkimin e tij.

Spahiu citon në letër se komisioni i ligjeve i ka mohuar atij të drejtën e fjalës ndërsa Kuvendi ka detyrimin kushtetues ta dëgjojë. “

“Duhet të garantoni një proces të rregullt ligjor”-shprehet në këtë letër nënkryetari i KLD-së.

Spahiu deklaron gjithashtu se kryetarja e Kuvendit Jozefina Topalli i ka kthyer përgjigje negative kësaj kërkese, duke I thënë se mund të flasë në komisionin parlamentar të ligjeve.

***************************

Tiranë- Kuvendi ka nisur punimet e seancës plenare të radhës me pr/ligjin “Për ratifikimin e konventës rajonale për rregullat preferenciale Pan-Euro-Mediteriane të origjinës”.

Pika më e rëndësishme e punimeve të sotme parlamentare është shqyrtimi i kërkesës së një grupi deputetësh “Për nisjen e procedurës së shkarkimit nga detyra të Zëvendëskryetarit të Këshillit të Lartë të Drejtësisë, Kreshnik Spahiu”.

Shqyrtimi në parlament i kësaj kërkese bëhet një javë pas miratimit të saj nga deputetët e maxhorancës në Komisionin e Ligjeve. Kërkesa parashikon ngritjen e një komisioni parlamentar që do të hetojë veprimtarinë e  zv/kryetarit të KLD-së, pas akuzave se ai ka shfrytëzuar postin për të kryer veprimtari politike.

Maxhoranca në kërkesën e saj argumenton se Spahiu ka shkelur ligjet, duke cënuar dinjitetin e institucionit që ai drejton, ndaj dhe nevojitet një komision hetimor.

Nisma e maxhorancës është kundërshtuar nga nënkryetari i KLD-së, e cila, sipas tij, nuk ka asnjë mbështetje kushtetuese.

Nga ana e saj, opozita e majtë është shprehur kundër kësaj kërkese, duke paralajmëruar se grupi parlamentar i saj do të votojë kundër sot në seancë plenare. Deputetët socialistë janë shprehur se opozita jo vetëm nuk e miraton ngritjen e një komisioni hetimor ndaj nënkryetarit të KLD-së, por ajo as nuk do të bëhet pjesë e tij. (LajmeShqip.com)

 

 
Lajme Shqip Wednesday, 18 January 2012 09:32

Tiranë (PLOTESUAR 18 janar, 11:15) Ngrihet Komisioni Hetimor për punën e nënkryetarit të Keshillit të Lartë të Drejtësisë, Kreshnik Spahiu. Kërkesa e deputetëve demokratë mori vetëm votat e maxhorancës, pasi deputetët e opozitës braktisën sallën para votimit, ndërsa punimet e sotme të Komisionit të Ligjeve u shoqeruan me debate të ashpra.

Kreu demokrat i ligjeve, Ilir Rusmali, i cili thirri mbledhjen e komisionit dy ditë pasi kërkesa e deputetëve të mazhorancës u bë e njohur nga kryeministri Sali Berisha, ka vënë në dijeni për nisjen e procedurës edhe zotin Spahiu, sepse kjo është një kërkesë e rregullores së Kuvendit, që detyron të dëgjojë anëtarin e një organi kushtetues për të cilin kërkohet shkarkimi, të dëgjohet para komisionit, përpara se ai t’i dërgojë parlamentit raportin për ngritjen ose jo të komisionit hetimor.

Sipas kërkesës së demokratëve, komisioni hetimor do të ketë tre javë kohë për të verifikuar shkeljet e nënkryetarit të Këshillit të Lartë të Drejtësisë në ushtrimin e detyrës së tij.

Kreshnik Spahiu ishte i pranishem ne mbledhje, por u largua me kerkese te kryetarit te Komisionit.

Spahiu ka deklaruar se procedura që po ndiqet për shkarkimin e tij është antikushtetuese, pasi nuk është Kuvendi që e shkarkon nënkryetarin. Në këto momente ndërhyrii kryetari i Komisionit të Ligjeve, Ilir Rusmali, i cili tha se Spahiu nuk mund të flasë për substancën, d.m.th për hetimin, por vetëm për procedurat. Rusmali i kujtoi Spahiut se atë mbledhje e drejtonte ai. Në këto momente Spahiu deklaroi se mbledhja nuk mund të drejtohet me presione. Rusmali kërkoi pesë minuta pushim për tu larguar Spahiu dhe i shkëputi mikrofonin. Ky i fundit u ngrit në këmbë dhe u largua duke thënë se askush nuk mund ta hiqte nga detyra me presion.

Kjo cështje vjen në kundërshtim me Kushtetutën dhe me ligjin për organizimin dhe funksionimin e KLD-së, ku nënkryetari nuk shkarkohet nga Kuvendi. C’lidhje ka qeveria me një institucion të pavarur? C’lidhje ka qeveria me gjyqësorin? Si mundet që në vitin 2012 qeveria të kërkojë të kontrollojë dhe godasë drejtësinë”, deklaroi Spahiu.

Saphiu e cilësoi këtë kërkesë si një sulm të pastër politik. “Klasës politike pushka top le t’i bëhet, por ta harrojë se do të kontrollojë drejtësinë. Viti 2012 konsiderohet si viti i fundit të botës, por ky do të jetë fundi i asaj klase politike që mendon se do të vendosë kontrollin dhe monopolin mbi shoqërinë shqiptare”, theksoi Spahiu. (TCH)

*******************************

Komisioni parlamentar i Ligjeve do të mblidhet paraditen e së mërkurës për të nisur procedurat për shkarkimin e nënkryetarit të Këshillit të Lartë të Drejtësisë (KLD), Kreshnik Spahiu. 
Komisioni do të mblidhet një ditë pasi kryeministri Sali Berisha bëri të ditur kërkesën e maxhorancës për ngritjen e një komisioni hetimor, që do të shqyrtojë procedurat e shkarkimit të Spahiut nga posti i nënkryetarit të KLD-së. 
Sipas kërkesës së demokratëve, Kreshnik Spahiu ka “devijuar nga funksioni kushtetues dhe e ka zëvendësuar atë me veprimtari politike të papajtueshme me detyrën, duke mos përfaqësuar interesat në funksionin e drejtësisë dhe Kuvendit të Shqipërisë, organ nga i cili është zgjedhur”.