Lajme Shqip Sunday, 22 April 2012 22:03

Juventus ka hedhur një tjetër hap të sigurt drejt titullit kampion duke fituar bindshëm me rezultatin 4-0 ndaj Romës, në një ndeshje që ka folur tërësisht për bardhezinjtë. 

Që në fillimin e ndeshjes është parë sesi skuadra e drejtuar nga Antonio Konte kishte shumë më tepër dëshirë për të fituar këtë ndeshje, sidomos pas dhuratës që i bëri rivali i saj më i afërt, Milani, me barazimin ndaj Bolonjës.

Si rrjedhojë, goli i avantazhit vjen shumë shpejt, që në minutën e 4-t me Vidal, i cili harrohet i vetëm nga mbrojtja e Romës. Duhen edhe 4 minuta të tjera që kiliani të gjejë përsëri rrugën e rrjetës me një gjuajtje të fortë, për të dyfishuar rezultatin në favor të ekipit vendas.

Roma provon të reagojë por në momentin që përpiqet të dalë para, goditet nga kundërzbritja e shpejtë e bardhezinjve. Në minutën e 25-të, ndeshja praktikisht është e mbyllur, pasi Markizio fiton 11 metërsh dhe njëkohësisht është portieri Stekelenburg që ndëshkohet me karton të kuq për ndërhyrjen ndaj mesfushorit.

Portieri Kurçi, i futur në vend të Borinit, arrin të grushtojë gjuajtjen e Pirlos nga pika e bardhë, por topi përfundon përsëri te këmbët e mesfushorit që këtë radhë e dërgon në rrjetë.

Juventinët nuk duken të ngopur dhe vazhdojnë të sulmojnë, por qetësohen vetëm pas minutës së 52-të, kur Markizio shënon edhe golin e katërt.

Që nga ai moment, ndeshja është e mbyllur, pasi edhe bardhezinjtë nuk thumbojnë më portën kundërshtare deri në vërshëllimën e përfundimtare, duke mëshiruar ekipin e Luis Enrikes.

Falë kësaj fitoreje, Juventus është shkëputur 3 pikë nga Milani dhe duket se po shkon drejt titullit kampion kur kanë mbetur vetëm 5 javë deri në përfundimin e këtij sezoni. (LajmeShqip.com)

 
Lajme Shqip Sunday, 22 April 2012 17:21

Ndeshjet e pasdites të javës së 34-t të Serisë A kanë dhuruar barazimin 1-1 në shtëpi të Milanit përballë Bolonjës, me kuqezinjtë që humbin pikë të rëndësishme në luftën për titull kundër Juventusit. 

Vendasit janë dukur shumë të lodhur dhe në formë të dobët, ndaj avantazhi i miqve me Ramirez në minutën e 25-të nuk vjen i papritur. Vetëm në pjesën e dytë shihet një reagim i skuadrës kuqezi, sidomos pas hyrjes në fushën e lojës së Kasanos e Emanuelson. Anësori gabon duke mos akorduar një gol në favor të skuadrës kuqezi, duke sinjalizuar një pozicion të paqenë jashtë loje të Ibrahimoviç, i cili zgjohet vetëm në finalen e ndeshjes të cilën e kishe kaluar plotësisht në anonimitet.

Megjithatë, sulmuesi suedez arrin të shënojë golin e barazimit në minutën e 90-të, ndërsa Robinjo humb mundësinë për fitoren e bujshme në minutën e fundit shtesë kur me një gjuajtje me kokë dërgon topin jashtë.

Lufta për vendin e tretë vazhdon më e fortë se kurrë, sidomos pas barazimit të Lacios në shtëpi me Leçen, ku skuadra e Kozmit tregon edhe një herë se po bën maksimumin për të mbijetuar në Serinë A. Vendimtar goli i Bozhinov në minutën e 91-të të kësaj sfide. Ndërkohë, Interi nuk shkon më shumë se një barazim pa gola në fushën e Fiorentinës duke rrezikuar tashmë të mbetet shumë larg zonës së Ligës së Kampioneve. Zikaltërit shpëtohen nga Hulio Sezar, i cili pret një penallti të Ljajiç.

Ngjarja më e bujshme është ajo që ka ndodhur në stadiumin “Marasi”, ku tifozët kanë “marrë peng” skuadrën vendase të Xhenoas pasi kjo e fundit po mundej 4-0 në fushën e saj nga Siena. Tifozët kanë detyruar ndërprerjen e ndeshjes dhe kanë detyruar lojtarët që të heqin fanellat pasi nuk i meritonin. Pas një ndërprerje prej 50 minutash, ndeshja ka vazhduar dhe ka përfunduar 4-1 në favor të miqve, ndërsa Federata Italiane pritet të marrë masa të rrepta për skuadrën e Xhenoas që tashmë rrezikon seriozisht të bjerë nga kategoria. (LajmeShqip.com)

Rezultatet

Fiorentina-Inter         0-0

Çezena-Palermo         2-2

27′ Santana, 28′ Renela / 20′ Bertolo, 47′ Silvestre

Xhenoa-Siena              1-4

79′ (ag) Del Groso / 17′, 37′ Brienca, 19′ Destro, 49′ Xhorxhi

Lacio-Leçe                   1-1

81′ Matuzalem / 91′ Bozhinov

Milan-Bolonja              1-1

90′ Ibrahimoviç / 25′ Ramirez

Renditja

Juventus 68, Milan 68, Lacio 55, Udineze 52, Napoli 51, Roma 50, Inter 49, Katania 46, Kievo 43, Siena 42, Palermo 41, Bolonja 41, Atalanta 40, Kaljari 38, Parma 38, Fiorentina 38, Xhenoa 36, Leçe 35, Novara 25, Çezena 22.