Lajme Shqip Sunday, 18 March 2012 19:36

Diego Milito ka humbur një penallti që mund t’i jepte fitoren Interit, i ndalur në një barazim pa gola përballë Atalantës në “San Siro”. Zikaltërit kanë marrë një rezultat që nuk i ndihmon në luftën për pjesëmarrjen në Kupat e Evropës në sezonin e ardhshëm dhe gabimi i argjentinasit nga pika e bardhë në minutën e 21-të mund të rezultojë vendimtar në fund të këtij edicioni zhgënjyes.

Ndërkohë, më keq ka bërë Lacio që është mundur me rezultatin 1-0 nga ekipi surprizë i sezonit, Katania, ndërsa tashmë rrezikon vendin e tretë në renditje, që çon në Ligën e Kampioneve. Skuadra e drejtuar nga Edi Reja pësoi gol 10 minuta para përfundimit të takimit, kur mbrojtësi veteran Nikola Legrotalje arriti të dërgonte topin pas krahëve të Marketit pas zhvillimit të një goditje nga këndi. Ky sukses çon Katanian në kuotën e 41 pikëve, duke e bashkuar me grupin e skuadrave që synojnë një vend në Europa League në sezonin e ardhshëm.

Ndërkohë, Samir Ujkani ka mbajtur premtimin për të ndalur Erjon Bogdanin, pasi Novara e tij ka fituar me rezultatin 2-0 në fushën e Sienës për të mbajtur gjallë shpresat e pakta që ka për mbijetesë në Serinë A. Gjithçka është vendosur në minutat e fundit të ndeshjes, kur fillimisht Rigoni e pastaj Porkari kanë gjetur rrugën e rrjetës për t’i dhënë këtë sukses të merituar skuadrës së vogël piemonteze. Novara ngjitet në kuotën e 23 pikëve pas këtij suksesi të dytë radhazi në kampionat, por është ende 8 pikë larg vendit të 17-të që siguron mbijetesën në Serinë A, i cili mbahet nga Parma. (LajmeShqip.com)

Rezultatet

Kaljari-Çezena     3-0

Inter-Atalanta    0-0

Bolonja-Kievo      2-2

Katania-Lacio      1-0

Siena-Novara      0-2

Leçe-Palermo      1-1

Renditja

Milan 60, Juventus 56, Lacio 48, Napoli 46, Udineze 46, Roma 41, Inter 41, Katania 41, Bolonja 36, Palermo 35, Kievo 35, Atalanta 34, Kaljari 34, Xhenoa 33, Siena 32, Fiorentina 32, Parma 31, Leçe 26, Novara 23, Çezena 17.

 
Lajme Shqip Saturday, 17 March 2012 23:41

Juventus ka regjistruar një fitore shumë të rëndësishme në fushën e Fiorentinës duke mundur këtë të fundit me rezultatin e thellë 5-0. Ndonëse kjo është një nga fushat më të vështira për bardhezinjtë për shkak të armiqësisë së betuar mes tifozerive, skuadra e Kontes ka ditur të dominojë që nga minuta e parë deri në të fundit, duke arritur të marrë një rezultat që i shërben si për kampionatin, ashtu edhe për të trembur Milanin para ndeshjes së mesjavës në Kupën e Italisë. 

Bardhezinjtë kanë nisur vrullshëm takimin, duke gjetur golin e avantazhit pas vetëm 15 minutash me Vuçiniç që shënon me një gjuajtje nga jashtë zonës. Vetëm 6 minuta më vonë, Fiorentina e sheh veten edhe në inferioritet numerik, pas kartonit të kuq të Çerçi i cili godet me shkelm De Çeljen dhe mbyll para kohe ndeshjen e tij. Vendasit duken të dorëzuar dhe në minutën e 28-të pësojnë golin e dytë, këtë radhë nga Vidal i cili gjen të përgjumur mbrojtjen kundërshtare duke dërguar topin në rrjetë me dy tentativa pas zhvillimit të një goditje nga këndi.

Juventus vazhdon të sulmojë furishëm dhe regjistron rast pas rasti edhe në pjesën e dytë. Vuçiniç kthehet nga shënues në pasues, e arrin të gjejë fillimisht Markizion e më pas Pirlon të cilët falënderojnë duke dërguar topin në rrjetë në minutat 55 dhe 67. Në minutën e 72-të vjen edhe goli i Padoin që mbyll ndeshjen dhe i jep këtë sukses Juventusit pas katër barazimesh radhazi që e larguan atë nga kreu i renditjes. (LajmeShqip.com) 

 
Lajme Shqip Saturday, 17 March 2012 20:51

Duke menduar për sfidën me Barcelonën në Ligën e Kampioneve, Milan po bën të pamundurën për të mbyllur sa më parë kampionatin që të jetë i qetë në këtë turne dhe të përqendrohet vetëm në sfidën me katalanasit. Kuqezinjtë e drejtuar nga Masimiliano Alegri kanë fituar 2-0 në fushën e Parmës, në një sfidë ku vendasit ia kanë thjeshtuar shumë punën ekipit mik.

Pavarësisht një fillimi të mirë për Parmën, Milani godet që në rastin e parë që i krijohet, një 11-metërsh i fituar pas ndalimit të topit me dorë të Zakardos ndaj gjuajtjes së Ibrahimoviç. Suedezi transformon saktësisht nga pika e bardhë duke i dhënë avantazhin skuadrës së tij, e cila më pas krijon disa raste radhazi para portës së vendasve të tronditur nga ky disavantazh i papritur.

Reagimi i Parmës vjen me Paleta i cili godet traversën, ndërsa vendasit mësyjnë zonën e Milanit duke kërkuar barazimin. Por në momentin më të mirë të tyre, Milani godet përsëri, këtë radhë me Emanuelson i cili shënon golin e dytë pas një sllallomi mes mbrojtjes kundërshtare.

Pavarësisht tentativave të dy skuadrave, rezultati nuk ndryshon dhe Milani merr tre pikë shumë të vlefshme në luftën për titullin kampion. Për t’u shënuar është edhe rikthimi në fushë pas shumë muajsh i mesfushorit Gatuzo, i cili duket se ka lënë përfundimisht pas krahëve problemet fizike. (LajmeShqip.com)