Lajme Shqip Sunday, 04 March 2012 23:06

Një gol i Militos 10 minuta para fundit të takimit i ka dhënë mundësinë Interit të dalë të paktën me një pikë nga ndeshja me Katanian pas barazimit 2-2. Zikaltërit e Ranierit çojnë në 7 numrin e takimeve radhazi pa fitore (5 humbje e 2 barazime), ndërsa janë në vendin e 7-të në renditjen e kampionatit.

Katania bën gjithçka mirë në “San Siro” duke kaluar në avantazh që në minutën e 20-të me Gomez, ndërsa në minutën e 38-të Izko dyfishon shifrat në një aksion të nisur në pozicion jashtë loje. Zikaltërit duken thuajse të dorëzuar dhe kontestohen edhe nga publiku në shkallët e stadiumit.

Por atëherë kur ndeshja dukej thuajse e mbaruar, Forlan ngjall skuadrën e tij me një predhë në minutën e 71-të, duke dërguar topin në rrjetë edhe falë bashkëpunimit të portierit Karrizo i cili gabon në grushtim. Sulmuesi uruguaian është protagonist edhe 10 minuta më vonë kur gjen të lirë Militon, ndërsa ky i fundit nuk gabon duke dërguar topin në rrjetë për barazimin përfundimtar 2-2.

Në takimet e tjera, Lacio ka arritur të fitojë 2-1 derbin ndaj Romës mes polemikave, pasi verdhekuqtë janë penalizuar nga një karton i kuq i dhënë për portierin Stekelenburg që në minutën e 7-të të takimit. Hernanes shënoi me penallti për lacialët, ndërsa Borini barazoi në minutën e 16-të. Por një gol i kapitenit Mauri në minutën e 62-të vulosi takimin, ndonëse baraspesha numrike mes skuadrave në fushë u rivendos në minutën e 86-të kur Skaloni u largua me karton të kuq.

Me këtë sukses, Lacio është ngjitur e vetme në vendin e tretë pasi ka përfituar nga barazimi 0-0 i Udinezes ndaj Atalantës. (LajmeShqip.com)

Rezultatet

Inter-Katania              2-2

Parma-Napoli              1-2

Fiorentina-Çezena      2-0

Leçe-Xhenoa               2-2

Roma-Lacio                 1-2

Siena-Kaljari                3-0

Udineze-Atalanta        0-0

Bolonja-Novara           1-0

Renditja

Milan 54, Juventus 51, Lacio 48, Udineze 46, Napoli 43, Roma 38, Inter 37, Palermo 34, Katania 34, Kievo 34, Atalanta 32, Xhenoa 32, Fiorentina 31, Kaljari 31, Bolonja 31, Siena 29, Parma 29, Leçe 25, Novara 17, Çezena 16.

 
Lajme Shqip Saturday, 03 March 2012 23:19

Juventus nuk arrin më të fitojë dhe merr barazimin e katërt në 5 ndeshjet e fundit duke treguar se ka një rënie të ndjeshme në ritëm. Skuadra e Antonio Kontes këtë radhë është ndalur në shtëpi nga Kievo dhe vazhdon të shfaqë sindromën e çuditshme të transformimit në një ekip të jashtëzakonshëm në ndeshjet e mëdha, por që nuk di të fitojë në takimet me të ashtuquajturat skuadra të vogla. 

Gjithçka filloi mirë për bardhezinjtë të cilët në pjesën e parë gjetën golin shumë shpejt me De Çeljen dhe rrezikuan disa herë të tjera portë kundërshtare me Vuçiniç. Por pasaktësia para porte e sulmuesve të Juventus si dhe rreshtimi i Kievos ka bërë që gjithçka të ndryshojë në pjesën e dytë.

Kievo rrezikon disa herë portën e  Bufon dhe në minutën e 78-të arrin të gjejë golin me anë të Drame me një gjuajtje nga jashtë zonës që përfundon në këmbët e Bonuçit e pastaj në rrjetë.

Tani Juventus është 3 pikë pas Milanit ndërsa të mërkurën do të ndeshet me Bolonjën për takimin e prapambetur për shkak të dëborës. Bardhezinjtë duhet të fitojnë medoemos nëse duan të mbajnë gjallë shpresat për titullin kampion përballë një Milani që është kthyer përsëri i frikshëm. (LajmeShqip.com)

 
Lajme Shqip Saturday, 03 March 2012 21:36

Pushimi prej 3 ndeshjesh duket se i ka bërë mirë Zlatan Ibrahimoviç i cili është kthyer më vendimtar se kurrë dhe i uritur për gola. Sulmuesi suedez i Milanit ka qenë protagonist absolut në ndeshjen e fituar 4-0 nga kuqezinjtë në fushën e Palermos, ndërsa ka mbajtur skuadrën në vendin e parë në renditjen e Serisë A. 

Ibra ka shënuar golin e avantazhit në minutën e 20-të kur Robinjo e nxjerr të vetëm para portierit kundërshtar, në një pozicion ku suedezi e ka të pamundur të gabojë.

Goli i dytë vjen pas një kundërsulmi të shpejtë të kuqezinjve, ndërsa topi përfundon përsëri në këmbët e Ibrahimoviç i cili me majën e këpucës gjuan dhe 2-0.

Goli i tretë, po nga sulmuesi suedez është një perlë, për mënyrën e ekzekutimit dhe gjenialitetin e Ibrahimoviç që sheh Vivianon jashtë kuadratit dhe e dërgon topin aty ku ky i fundit as nuk provon të arrijë.

Ndeshja duket e mbyllur që në pjesën e parë por vula vjen në pjesën e dytë të ndeshjes, kur Tiago Silva me kokë shënon golin e 4-0, që konfirmon edhe një herë formën që po kalojnë kuqezinjtë në kampionat. (LajmeShqip.com)