Lajme Shqip Sunday, 05 February 2012 17:31

Java e 22-të e Serisë A ka dhuruar ndalesat e pesë skuadrave të para në renditje, duke filluar nga Juventusi kryesues që është ndalur në shtëpi në barazimin pa gola ndaj Sienës. Bardhezinjtë e Kontes kanë dominuar të gjithë takimin por nuk kanë gjetur dot rrugën e rrjetës, të ndalur nga portieri mik Pegolo me disa pritje të shkëlqyera. Të njëjtin fat e ka patur edhe Milan, që është ndalur në barazim 0-0 në shtëpi, por përballë ka patur një kundërshtar shumë më të rrezikshëm, Napolin. Megjithatë, më shumë se barazimi, kuqezinjtë i ka shqetësuar gjesti i Ibrahimoviç që është ndëshkuar me karton të kuq për një shpullë të dhënë ndaj një futbollisti kundërshtar dhe pritet të pezullohet nga komisionet e disiplinës. Me karton të kuq për protesta është ndëshkuar edhe trajneri Alegri. 

Ndërkohë, rezultati i ditës është padyshim suksesi 4-0 i Romës ndaj Interit. Kryeqytetasit kanë dominuar tërësisht ndeshjen përballë skuadrës së ish-trajnerit Ranieri, duke shënuar fillimisht me Huan e pastaj me Borinin për të mbyllur pjesën e parë në avantazh të dy golave. Sulmuesi shënon edhe golin e tretë për skuadrën e tij, ndërsa goli i katërt vjen nga Krkiç, i futur në lojë si zëvendësues. Skuadra e Luis Enrikes vazhdon të jetë shumë mbrapa në luftën për titull por ka përfituar nga humbjet e Udinezes dhe Lacios për t’iu afruar sadopak vendit të tretë që çon në Ligën e Kampioneve. (LajmeShqip.com)

Rezultatet

Xhenoa-Lacio              3-2

Milan-Napoli                0-0

Roma-Inter                  4-0

Kievo-Parma                1-2

Fiorentina-Udineze      3-2

Juventus-Siena             0-0

Leçe-Bolonja                  0-0

Novara-Kaljari               0-0

Palermo-Atalanta          2-1

Renditja

Juventus 45, Milan 44, Udineze 41, Lacio 39, Inter 36, Roma 34, Napoli 31, Palermo 31, Xhenoa 30, Fiorentina 28, Kaljari 27, Kievo 27, Parma 27, Katania 23, Atalanta 23, Bolonja 22, Siena 20, Leçe 17, Çezena 16, Novara 13.

 
Lajme Shqip Saturday, 04 February 2012 12:29

Antonio Konte ka filluar të kthehet në një personazh gjithnjë e më simpatik sa herë që shfaqet në konferencat për shtyp falë batutave të tij. Meqë Juventusi tashmë është në vendin e parë, për Konten ka ardhur koha që të hakmerret ndaj mediave të cilat nuk e vlerësonin në fillimin e sezonit.

“Falënderoj mediat pasi tani flasin për Juventusin si favorit, që do të thotë se më në fund kjo skuadër merr vlerësimin e duhur. Por unë kam një arkiv tekniko-taktik të artikujve dhe intervistave”.

“Shpesh rilexoj ato që shkruheshin në fillimin e sezonit: në gusht Juventusi ishte një skandal, nuk kishte blerë superlojtarë dhe trajneri cilësohej një taleban taktike… Në gjashtë muaj kemi kaluar nga vendi i 7-të në pretendentë, kjo është një mrekulli!”, ishin fjalët e Kontes në konferencën për shtyp para sfidës me Sienën.

Sipas tij, favoritët kryesorë për të fituar titullin mbeten kuqezinjtë e Milanit, ndërsa gjithçka do të vështirësohet për shkak të ngjeshjes së kalendarit. “Unë mendoj se Milani është favorit i dukshëm për të fituar titullin. Ne do të luajmë ndaj Sienës dhe më pas do të përballemi me ta në Kupën e Italisë”.

“Tani do të luajmë çdo tre ditë dhe për shkak të kushteve atmosferike luajmë 5 ndeshje në 13 ditë. Si rrjedhojë, mos u çuditni nëse shihni lojtarët që shënojnë dygolësha të përfundojnë ne pankinë, pasi më duhet të bëj zgjedhje për të mirën e objektivave të skuadrës”, komentoi trajneri i Juventusit. (LajmeShqip.com)