Lajme Shqip Friday, 03 February 2012 09:09

Hamdi Salihi është një futbollist i DC Junajtid dhe që nga java e ardhshme do t’i bashkohet kësaj skuadre. Lajmi është bërë publik në orët e vona të mbrëmjes të së enjtes nga vetë klubi amerikan si dhe nga Rapidi i Vjenës që kanë konfirmuar arritjen e marrëveshjes mes palëve. 

“Jemi të lumtur që kemi gjetur marrëveshjen për të sjellë Hamdi Salihin në MLS dhe DC Junajtid”, ishin fjalët e menaxherit të klubit, Deiv Kasper. “Ai ka një prej mesatareve më të larta të shënimit dhe është i aftë të shënojë gola në çdo nivel në të cilin ka luajtur. Ne besojmë fuqimisht se ai do të bëhet një tjetër pjesë e rëndësishme për skuadrën dhe presim me padurim ta shohim atë në fushë gjatë muajit mars”.

Ashtu siç pritej, klubi ka bërë të ditur se sulmuesi shqiptar do të jetë një nga 3 lojtarët të cilët do të përfitojnë më shumë se tavani i rrogave të kampionatit pre 335 mijë dollarësh në sezon. Nuk është bërë e ditur se sa ka kushtuar transferimi i tij, por mendohet se për lojtarin janë paguar rreth 500 mijë dollarë të Rapid, me të cilin ai kishte një kontratë deri në fundin e sezonit.

Edhe klubi austriak i ka uruar suksese Salihit në eksperiencën e tij të re. “Ai ka arritur rezultate të mira për ne, ndonëse në sezonin e fundit nuk ka përjetuar një situatë të thjeshtë. I uroj atij personalisht dhe në emër të ekipit sa më shumë suksese”, ishin fjalët e trajnerit Shëtel.

Salihi pritet të udhëtojë në fillimin e javës së ardhshme drejt Uashington për të filluar eksperiencën e tij të re në kampionatin amerikan. Nuk dihet cili do të jetë impakti i këtij vendimi në karrierën me kombëtaren duke parë largësinë nga Evropa. (LajmeShqip.com)

 
Lajme Shqip Thursday, 02 February 2012 17:12

Duket e pabesueshme por spekulimet e merkatos së futbollistëve po e transferojnë Hamdi Salihin sa në një kontinent në tjetrin, por gjithnjë e më larg Evropës. Sulmuesi shkodran nuk ka arritur të gjejë një marrëveshje me klube evropiane por dëshiron të largohet nga Rapidi i Vjenës ku është kthyer në lojtar stoli.

Si rrjedhojë, ai është bërë objektiv i destinacioneve më “ekzotike” ku pas ofertës nga Kina, këtë radhë ai kërkohet edhe në SHBA.

Gazeta “Washington Examiner” ka bërë të ditur se klubi i qytetit të Uashington që merr pjesë në MLS, DC Junajtid, kërkon futbollistin për të përforcuar radhët para fillimit të sezonit të ri.

Kjo lëvizje është e mundur pasi merkatoja e futbollistëve atje vazhdon deri në fillimin e sezonit, në muajin prill. Detajet e bisedimeve nuk bëhen të ditura, por Salihi pritet të jetë një prej 3 lojtarëve të klubit për të cilët lejohet një rrogë më e madhe se tavani prej 335 mijë dollarësh në sezon.

Ndërkohë, drejtuesit e klubit të Rapidit vazhdojnë të shpresojnë te një transferim i futbollistit, ndërsa kanë bërë të ditur se do të presin oferta. Vetëm në raste se asnjë prej ofertave nga Kina apo SHBA nuk do të realizohet, atëherë Salihi do të kthehet në skuadër për pjesën e mbetur të sezonit. (LajmeShqip.com)