Lajme Shqip Thursday, 11 October 2012 15:19

TIRANË – Kryetari i Prezencës së OSBE-së në Shqipëri, Ambasadori Eugen Wollfarth, mirëpriti zgjedhjen e Komisionit Qendror të Zgjedhjeve nga ana e Kuvendit të Shqipërisë, ditën e sotme.

“Zgjedhja e sotme e anëtarëve të Komisionit Qendror të Zgjedhjeve, përfshirë kreun e institucionit, është një hap i parë i rëndësishëm drejt zbatimit të Kodit të ri Zgjedhor”, tha ai.

“Unë i nxis të gjithë aktorët të punojnë së bashku dhe të dëshmojnë vullnetin e kërkuar politik për të zbatuar më tej Kodin e ri Zgjedhor, plotësisht dhe në frymë të mirë. Kjo nevojitet për të krijuar besim në të gjitha nivelet – mes votuesve, komisionerëve zgjedhorë dhe politikanëve, duke ofruar njëkohësisht, një fushë loje të drejtë dhe të barabartë për të gjithë”, tha Ambasadori Wollfarth.

Wollfarth përsëriti gatishmërinë e Prezencës së OSBE-së në Shqipëri për të ndihmuar Komisionin Qendror të Zgjedhjeve dhe të gjithë aktorët e tjerë në zbatimin e legjislacionit zgjedhor.(LajmeShqip.com)

 
Lajme Shqip Wednesday, 03 October 2012 17:05

Tiranë – Vlerësimi i vjeshtës i Komisionit Evropian karakterizohet nga një gjuhë mjaft pozitive për Shqipërinë, veçanërisht lidhur me rezultatet e dialogut politik pozitë-opozitë për votimin në Parlament të disa reformave. Por nuk lihet mënjanë nënvizimi i sfidave me të cilat përballet vendi, për gjyqësorin, korrupsionin, administratën publike, pronat apo pavarësinë e institucioneve. Ndërsa zgjedhjet e ardhshme vlerësohen si një test i rëndësishëm.

Një javë para publikimit, Top Channel siguroi projekt-dokumentin e brendshëm të Komisionit: përmbledhjen e përvitshme të raport-progreseve që hartohet për vendet anëtare dhe Parlamentin Europian nën titullin ‘Strategjia e Zgjerimit’.

“Marrëveshja politike e nëntorit 2011 mes shumicës qeverisëse dhe opozitës shënoi fundin e një periudhe të gjatë ngërçi politik që rridhte nga zgjedhjet parlamentare të vitit 2009. Kjo marrëveshje u bë për adresimin e reformave parlamentare dhe zgjedhore dhe për krijimin e klimës politike me përpjekje të përbashkëta për reforma në fusha të tjera. Si rezultat, bashkëpunimi dhe dialogu politik është përmirësuar shumë duke mundësuar progres në fushat e reformave kryesore. Zgjedhjet presidenciale u zhvilluan në përputhje me Kushtetutën, por procesi politik që mbështolli zgjedhjet nuk i ndihmoi dialogut ndër-partiak pozitiv që kishte nisur në nëntor. Pavarësisht nga episodet e shkurtra të retorikës konfrontuese mes qeverisë nga njëra anë, dhe opozitës dhe institucioneve të shtetit nga ana tjetër, si dhe pas një ngadalësimi të përkohshëm të reformave, marrëveshja politike është zbatuar plotësisht”, thuhet në dokument.

‘Strategjia e Zgjerimit’ është ende një projekt-dokument dhe formulimet nuk janë përfundimtare. Në përmbledhjen për ecurinë e Shqipërisë, vërehen pjesë reformash ku nënvizohet që “priten për t’u konfirmuar”, para se të përfshihen apo jo në vlerësimin zyrtar të 10 tetorit.

“Shqipëria ka shënuar progres të mirë drejt përmbushjes së kritereve politike për anëtarësim në BE, duke dorëzuar një numër reformash lidhur me prioritetet kyçe të Opinionit të Komisionit. Në përgjithësi, Shqipëria ka vijuar të zbatojë pa pengesa Marrëveshjen e Stabilizim-Asociimit dhe të luajë një rol konstruktiv në rajon. Dialogu ndërpartiak mundësoi arritjen e një progresi të mirë në fushën e reformave kyçe politike, si miratimi i ligjeve me shumicë të cilësuar, emërimi i Avokatit të Popullit dhe procesi i dëgjimit dhe votimit në Parlament për emërimet në gjykatat e larta, duke çuar në përmbushjen e prioriteteve kyçe përkatëse. Koordinimi i mirë i procesit të integrimit të BEsë nga qeveria dhe bashkëpunimi efektiv i opozitës mundësuan një farë progresi në zbatimin e reformës në drejtësi, duke reformuar sistemin e imuniteteve të zyrtarëve publikë dhe të gjykatësve dhe me futjen e reformave për Gjykatën e Lartë. Progres u arrit gjithashtu në luftën kundër krimit të organizuar, politikave anti-diskriminim, përmirësimit të trajtimit të të paraburgosurve, si edhe për reformën e pronave dhe për të drejtat e gruas”, thuhet më tej.

Pas vlerësimeve pozitive, në pjesën përmbledhëse të projekt-dokumentit të brendshëm të Komisionit, vijojnë sfidat e detyrimet për vendin.

“Shqipëria duhet të ndërtojë mbi këtë progres duke patur parasysh sfidat e rëndësishme që ka përpara, të shpejtojë reformën e gjyqësorit dhe luftën kundër korrupsionit dhe të ndërmarrë hapa konkretë në lidhje me përfundimin e reformës së administratës publike dhe të reformës për pronat, si dhe për forcimin e institucioneve të pavarura. Vëmendje më e madhe për zbatimin kërkohet ende, veçanërisht sa i përket kushteve të jetesës së komunitetit rom. Vazhdimi i dialogut politik për reformat mbetet i nevojshëm për funksionimin e qetë dhe për forcimin e mëtejshëm të institucioneve demokratike të vendit. Zgjedhjet parlamentare të vitit 2013 do të përbëjnë një test të rëndësishëm të Kodit të ri Zgjedhor dhe të angazhimit të vazhdueshëm ndërpartiak për reforma. Ruajtja e ritmit të reformave, me fokus të veçantë mbi zbatimin e ligjeve dhe të politikave në fushën e shtetit të së drejtës, do të jetë thelbësore”, thuhet në pjesën përmbledhëse.

Projekt-dokumenti nuk përmban ende asnjë formulim mbi rekomandimin përfundimtar të Komisionit për dhënien apo jo të statusit kandidat për Shqipërinë. Ai është objekt ndryshimi deri në momentin e publikimit zyrtar. ‘Strategjia e Zgjerimit’ publikohet më 10 tetor, e shoqëruar nga raport-progreset individuale për vendet e përfshira në procesin e zgjerimit të Bashkimit Evropian. (T.Ch)

 
Lajme Shqip Saturday, 08 September 2012 13:12

Bruksel – Në muajin tetor Shqipëria do të përballet për të tretën herë me publikimin e raport-progresit të Komisionit Evropian, i cili do të shprehet nëse vendi i ka përmbushur 12 prioritetet kyçe në kuadër të anëtarësimit në BE. Peter Stano, zedhenes i eurokomisionerit Stefan Fule ne nje interviste per Deutsche Welle thekson se KE po ndjek me vemendje cdo hap te progresit dhe reformat qe po behen ne vend ne kuader te integrimit.

Z.Stano, a do ta marrë Shqipëria statusin e vendit kandidat për anëtarësimin në Bashkimin Evropian?

Peter Stano: Në njëfarë pike Shqipëria do ta marrë statusin, kur të përmbushë prioritetet dhe kriteret që kërkohen. Pyetja nuk është nëse Shqipëria do ta marrë atë, por kur do ta marrë. Dhe në këtë moment, nuk mund t´ju them diçka më të saktë, vetëm se në momentin kur kushtet të plotësohen, kriteret të përmbushen, kur Shqipëria të dorëzojë të gjithë prioritetet kyçe, vetëm atëherë Komisioni Evropian do të jetë në gjendje të rekomandojë statusin kandidat për Shqipërinë.

A janë përmbushur kriteret e kërkuara nga Komisioni Evropian një vit më parë, apo do të jetë sërish një shans i humbur?

Peter Stano: Muajin e ardhshëm Komisioni Evropian do të publikojë raportin vjetor. Progres-raportet janë shumë të mira, objektive dhe një vlerësim shumë i ndershëm për secilin shtet që është në këtë proces, të performancës së secilit shtet që do të jetë pjesë e Bashkimit Evropian. Këtu bën pjesë edhe Shqipëria, kështu që muajin e ardhshëm ne do të japim vlerësimin tonë se si ka ecur Shqipëria në përmbushjen e kritereve të nevojshme, si është punuar për realizimin e 12 prioriteteve kyçe të dhëna nga Komisioni Evropian herën e fundit.

Cili është mendimi juaj për çështjen e kufizimit të imunitetit për deputetët dhe zyrtarët e lartë? Komisioni Evropian kërkoi heqjen e tij. A e vonon mosmarrjen e statusit mosmiratimi i tij në Parlament?

Peter Stano: Në lidhje me rëndësinë e çështjes së imunitetit unë mund t´i referohem asaj çka Komisioneri Stefan Fyle diskutoi me ministrin e ri të Jashtëm shqiptar Panariti gjatë vizitës së tij të fundit në Bruksel. Komisonieri tha se rishikimi i sistemit të imunitetit do të ishte një hap i rëndësishëm, në drejtimin e duhur.

Në këtë takim, z.Fyle ka përmendur nevojën për dialog konstruktiv për reformën parlamentare, e cila nuk është realizuar ende, edhe pse ishte pjesë e marrëveshjes së nëntorit. A mendoni se në Shqipëri ka një vullnet politik për bashkëpunim?

Peter Stano: Nuk ka lidhje me atë se çka besojmë ne, por ka lidhje me atë që politikanët në vend janë në gjendje të arrijnë. Dhe Komisioni Evropian, Komisioneri Fyle vazhdon t´u përsërisë partnerëve shqiptarë se ajo që është e rëndësishme dhe që Brukseli do të shohë është zbatimi i plotë i marrëvëshjes politike të arritur në nëntor 2011. Kjo do të thotë që të vijohet konsensusi, dialogu dhe puna politike e të gjitha partive politike në axhendën evropiane në mënyrë konsensuale dhe kjo është shumë e rëndësishme. Dhe siç tha edhe Komisionieri (Fyle) Shqipëria ka një perspektivë të vërtetë për progres drejt Evropës, duke i ofruar vendit dorëzimin e prioriteteve kyçe. Pra, një nga gjërat më të rëndësishme është se si po vihet në jetë marrëveshja politike e nëntorit dhe sigurisht që nga Shqipëria pritet zbatimi i plotë. Sepse kjo nuk është diçka që i duhet Brukselit. Kjo është shumë e rëndësishme për vendin, për progresin e vendit dhe nga i cili nuk do të përfitojë Brukseli por Shqipëria, dhe mbi të gjitha, që të përfitojnë qytetarët shqiptarë.

Lufta kundër korrupsionit është një ndër prioritetet kyçe të kërkuara nga Komisioni Evropian. Si e vlerësoni punën e bërë deri tani në këtë drejtim?

Peter Stano: Siç ju thashë, Komisioni Evropian do të paraqesë raport-progresin e bërë nga Shqipëria në të gjitha fushat. Në këtë progres-raport do të vlerësohet se çfarë po bëhet, çfarë është bërë, çfarë është bërë shumë mirë, çfarë është bërë në mënyrë të tillë që ka hapësira për të bërë përmirësime. Komisioni Evropian po shikon me shumë vëmendje çdo hap që është bërë në këtë drejtim, sepse ju e dini që sundimi i ligjit, pavarësia e sistemit gjyqësor, lufta kundër krimit të organizuar, lufta kundër korrupsionit janë shumë të rëndësishme për Bashkimin Evropian. Prandaj ne shikojmë rezultatet në vendet që duan të anëtarësohen dhe kjo është arsyeja se pse ne e kemi vënë kaq shumë theksin në këtë fushë, që është pjesë e procesit të negociimit në kapitujt 23 dhe 24. Çka do të thotë që shtetet që aspirojnë të bëhen vende kandidate dhe të nisin negociatat duhet të jenëi gati ta trajtojnë këtë çështje shumë thellë që nga nisja e procesit. Komisioni po i ndjek shumë nga afër dhe me vëmendje të madhe se çfarë po bën Shqipëria në këtë fushë e më pas do t´i publikojmë mendimet tona në progres-raportin e muajit të ardhshëm.

Së fundmi z. Stano, duhet të presim për një raport pozitiv apo negativ të Shqipërisë në tetor?

Peter Stano: Unë nuk mund të shprehem para se të dalë progres-raporti. Unë mendoj se qytetarët shqiptarë po e shohin se çfarë po bëjnë përfaqësuesit e tyre politikë. Qytetarët shqiptarë e dinë se çfarë pret Bashkimi Evropian nga liderët kryesorë politikë, dhe qytetarët shqiptarë e dinë se çfarë presin ata vetë nga liderët politikë. E kam fjalën, që qytetarët shqiptarë jetojnë atje, po i votojnë dhe po i ndjekin nga afër çdo ditë dhe unë mendoj se ata e kanë ndjesinë se si po performojnë liderët e tyre. Por siç thashë, muajin e ardhshëm publikohet raporti vjetor dhe progres-raporti është shumë objektiv dhe jep një vlerësim të ndershëm se çfarë është bërë, çfarë është bërë mirë, ku ka mangësira. Ne do të themi qartësisht se ku ka nevojë për t´u bërë më shumë. Nuk dua të flas para kohe, para publikimit të progres-raportit. Dua të inkurajoj çdo njeri që të presë për të, dhe në tetor gjithkush mund ta lexojë atë dhe se si i sheh Brukseli përpjekjet e bëra, në mënyrë që të përmbushet perspektiva evropiane. Sepse siç e thashë, është në të mirë të qytetarëve shqiptarë dhe në interes të politikanëve shqiptarë që të dorëzojnë sa më shpejt që të jetë e mundur të gjithë kriteret e nevojshme, si dhe plotësimin e 12 prioriteteve kyçe!

Peter Stano është zëdhënësi i komisionerit për zgjerimin, Stefan Fyle.(LajmeShqip.com)

 
Lajme Shqip Thursday, 19 July 2012 18:06

Tiranë – Komisioneri Evropian për Zgjerimin dhe Fqinjësinë e mirë, Stefan Fyle përshëndet miratimin e Reformës Zgjedhore me konsensus sot në Kuvendin e Shqipërisë.

Me anë të një deklarate, zëdhënësi i Fyle, Peter Stano shprehet, “Përshëndesim miratimin e amendimeve të Kodit Zgjedhor, në vijim të marrëveshjes ndër-partiake të arritur javën e kaluar në komisionin e posaçëm parlamentar. Si maxhoranca qeverisëse dhe opozita duhet të përgëzohen për punën e mirë të përfunduar dhe për bashkëpunimin konstruktiv në këtë fushë.

Arritja e kësaj marrëveshje të rëndësishme përbën një hap domethënës përpara në përmbushjen e marrëveshjes politike të Nëntorit 2011 si dhe drejt arritjes së një prioriteti kyç të Opinionit. Megjithatë reforma zgjedhore nuk është vetëm një nga prioritetet kyçe të Opinionit, por është esenciale në lidhje me zgjedhjet parlamentare të 2013-ës”, thuhet në deklaratë. 

Komisionieri i BE i ka bërë thirrje forcave politike të vazhdojnë edhe reformat e tjera të rëndësishme, duke e vënë theksin fillimisht tek heqja e imunitetit. Fye tha se këto reforma të rëndësishme për integrimin, duhet të përmbyllen brenda shtatorit.

“Ne i bëjmë thirrje si maxhorancës qeverisëse dhe opozitës të ndërtojnë mbi këtë zhvillim pozitiv dhe të përkrahin më tej dialogun politik konstruktiv dhe bashkëpunimin për plotësimin e punës në vazhdim për priotitetet e tjera kyçe të Opinionit si dhe për të arritur një numër të madh rezultatesh brenda shtatorit.

Reformat për drejtësinë përbëjnë një faktor kyç drejt rrugë së integrimit në BE. Lidhur me këtë, votimi për reformën e sistemit të imuniteteve dhe për Gjykatën e Lartë, në përputhje me standartet Evropiane do të ishte një hap i rëndësishëm në drejtimin e duhur”, theksohet më tej në deklaratë. 

“Ne inkurajojmë të gjitha palët të kontribojnë drejt përpjekjeve të mëtejshme intensive në këtë kontekst si dhe të tregojnë një sjellje konstruktive. Kjo është thelbësore për Shqipërinë për të avancuar në rrugën drejt BE-së gjatë këtij viti”, përfundon mesazhi. (LajmeShqip.com)

 
Lajme Shqip Thursday, 19 July 2012 13:30

Tiranë – Kuvendi miratoi sot me konsensus kodin e ri elektoral, me 127 vota pro, 2 kundër dhe 3 abstenime. Votën e tyre kundër e kanë shprehur ministri Mediu dhe deputeti Oketa, ndërsa kanë abstenuar 3 deputetët e LSI, Nasip Naco, Vangjel Tavo, Lefter Koka.

Drafti i saj u miratua me konsesus më 11 korrik nga dy forcat më të mëdha politike në vend, PD e PS. Pas shumë debatesh palët politike arritën kompromisin dhe për tre çështjet e mbetura pezull të reformës zgjedhore: riformatimi i KQZ-së, procesi ankimor dhe teknologjia e numërimit të votave në zgjedhjet e ardhshme. 

Kodi i ri zgjedhor do të aplikohet në zgjedhjet e përgjithshme të vitit 2013, ndërsa zbatimi i tij do të nisë në shtator me formatimin e KQZ-së. Kreu prezencës së OSBE-së në Tiranë, Eugen Wollfarth, ambasadori i SHBA-së Alexandër Arvizu,ai i BE-së Etore Sequi marrin pjesë në seancën plenare. 

BERISHA: I VONUAR, POR NGA LIGJI NUK KA TË HUMBUR
Kryeministri Sali Berisha përgëzoi sot nga foltorja e Kuvendit konsensusin e arritur mes palëve për ndryshimet në Kodin zgjedhor. Ai deklaroi se sot “votohet me konsensus një nga ligjet më me rëndësi, ligji i zgjedhjeve, ligji elektoral. Ligj i cili adreson dhe i’u jep përgjigje një serie problemesh të evidentuara në testimin e ligjit të mëparshëm, edhe ai konsensual. Në dy provat e mëdha zgjedhore u evituan problematika që duheshin përsosur. Ky ligj adreson të gjitha rekomandimet e ekspertëve të shkëlqyer që punuan mbi këtë ligj”, tha ai.

Berisha u shpreh se, “Ligji është pak i vonuar, por më mirë vonë se sa kurrë. Miratimi mdodh10 muaj para zgjedhjeve të ardhshme. Me këtë ligj nuk ka të humbur, fitojnë të gjitha palët”, shtoi kryeministri. Berisha ftoi më tej palët të heqin dorë nga qëndrimet “ose e tëra ose asgjë”, sic tha ai.

BERISHA: NDAJ ALEATËVE DO JEM BESNIK
Berisha ka deklaruar më tej se i garanton aleatëve të tij politikë besnikëri, duke i udhëhequr drejt një fitore tjetër, sic tha ai.
“Po të kisha qenë në vendin e tyre ju garantoj se ligjërata po kaq të forta do mbaja ndaj Saliut e Ramës, por të gjithë ata që duan të lexojnë histori dashurie dhe tradhtie si në romane apo novela le të lexojnë historitë e Ramës me aleatët dhe pastaj të kthehen tek besnikëria e Berishës për aleatët”, tha ai.

GJIKNURI: TANI NË DORË E KA BERISHA
Bashkëkryetari socialist më komisionin parlamentar të reformës zgjedhore, Daminan Gjiknuri vlerësoi se ligjvënësit shqiptarë hedhin një hap pozitiv me miratimin e kodit zgjedhor, në organizimin e zgjedhjeve të lira dhe të ndershme.

Gjiknuri duke bërë një rezyme të tensionit dhe dhunës që shkaktuan zgjedhjet e mëparshme në vend, theksoi se opozita nuk i arriti të gjithë kërkesat e saj, por më ndryshimet e reja tashmë ka shpresë për përmirësim. 

“Sot shënohet hapi i parë që krijon shpresë, por nuk siguron triumf, shtrohet pyetja a kemi fituar më shumë me ketë ligj, unë them po. Adresuam pikat më të rëndësishme të rekomandimeve të OSBE. Opozita nuk i arriti të gjithë kërkesat e saj. I dhamë jetë një organi të ri, organit të administrimit të zgjedhjeve, që ajo që ndodhi mos të përsëritet dhe një trupë e re të ketë mundësi të përgatisë zgjedhjet. Kemi garantuar pjesëmarrjen në listat e zgjedhësve, duke zhdukur listat e manipuluara. Kemi arritur që rezultati të dalë në kohë. Kemi përmirësuar procesin ankimor, që cdo shkelës të mendojë mirë. Kemi llogaritur teknologjinë. Pyetja shtrohet a është gjtihcka që kërkoi opozita, jo pasi disa cështje mbeten varur”,- deklaroi Gjinknuri.

Sipas Gjiknurit, pika kyce tashmë mbetet tek një nga kriteret e Kopenhagenit, që është roli neutral i qeverisë, duke nënvizuar se dilema i takon kryeministrit nëse do ketë vullnet për të organizuar zgjedhje të lira dhe të ndershme. “Dilema e madhe është, a do ketë vullnet Sali Berisha për të organizuar zgjedhje të lira dhe të ndershme. Berisha ka të drejtë kur thotë se qeveria do garantojë zgjedhje të lira dhe të ndershme, por ai këtë nuk e thotë në aspketin politik. Vetëm nga zgjedhjet, shqiptarët do gjejnë zgjidhje. Sistemi mund të ketë padrejtësi, por për ne si opozitë nje ligj i mirë zgjedhor krijon premisa më të mira. Vendi ka nevojë për një ligj më të mirë dhe atë po e bëjmë sot. Pa zgjedhje të lira dhe të drejta vendi nuk do gjëjë paqe dhe progres”,- theksoi Gjiknuri.

MEDIU: KJO MARRËVESHJE PD-PS, DO VOTOJ KUNDËR
Kreu i PR-së, Fatmir Mediu deklaroi sot në Kuvend se Reforma Zgjedhore e sjellë për votim në Kuvend është një marrëveshje mes dy forcave kryesore politike dhe jo një reformë që garanton barazinë e votës. “Kjo është e 16-ta reformë zgjedhore në Shqipëri, e 16-ta marrëveshje PD-PS për të krijuar monopol në zgjedhje. Ajo duhet të garantojë pjesëmarrjen e qytetarëve në zgjedhje, por nuk e bën, prandaj unë deklaroj votën time kundër”, tha Mediu.

Kjo marrëveshje, tha ai më tej, “ nuk i jep të drejtë qytetarëve të vendosin për të ardhmen, nuk ka barazi në votë. Vota e qytetarit në Konispol nuk është e barabartë me votën e qytetarit në Tiranë apo Fier”, shtoi ai. 

DULE: PRO, POR KA HUMBUR BESIMI SE QEVERIA NDËRROHET ME VOTË
Kreu i PBDNJ, Vangjel Dule duke deklaruar nga foltorja e Kuvendit votën pro ndryshimeve në kodin zgjedhor, vuri në dukje se ndryshimet nuk garantojnë barazinë e votës dhe përsërisin historinë e vjedhjes. Dule bëri thirrje për hartimin dhe rishikimit në të ardhmen të të gjithë kodit.

“E shikoj që skenari është planifikuar festiv. Për të mos qënë dhe unë mes atyre do them se do votoj pro ndryshimeve në kodin zgjedhor, do përshëndes kolegët e mij në komisionin e reformës, të cilët në një klimë kontraditore dhe konfliktuale arritën konsensus. DASH thotë se nuk ka shpresa që qeveria mund të ndërrohet me votë. A ka dikë që mund të na japë garanci që në Shqipëri qytetari me votën e tij mund të ndryshojë qeverinë? Kam një pyetje, skenarin festiv kush do e organizojë pas zgjedhjeve? Zgjedhjet mund të jenë në të gjitha aspektet të drejta të barabarta, por nga produkti i tyre prodhojnë pabarazi. Marrëveshja e arritur është kompromis, por larg stadarteve të zgjedhjeve të lira dhe të barabarta. Më thoni a nuk e zgjodhëm Ristanin me konsensus, a nuk votuam me konsesnsu ndryshimet e 2009, por përjetuam të njëjtën atmosferë? Nuk ka garanci që zgjedhjet e ardhshme do të jenë të njëjta. Kreu i PS i priste nga kryeministri, ndaj është momenti ta mbyllim propozimet që na sjell komisioni, por nuk do kemi bërë asgjë nëse me sinqeritein më të madh nuk i hymë një reforme zgjedhore të mirëfilltë që garanton votën”,- deklaroi Dule. (LajmeShqip.com)

 
Lajme Shqip Saturday, 14 July 2012 15:15

Tiranë -Kryeministri Sali Berisha ka mbajtur sot një bashkëbisedim me gazetarët ku ka komentuar cështje të shumta të aktualitetit.

Kreu i qeverisë u pyet mbi tema të nxehta që po debatohen nga politika në media sic janë Reforma Zgjedhore, Imuniteti, Ekonomia, Historia. Berisha aq sa ftoi kreun e PS të reflektojë dhe të votojë pa mëdyshje heqjen e imunitetit, aq dhe e akuzoi numrin 1 të PS, se me deklaratat kundërshtuese që bën, i shton pikë qeverisjes së djathtë. “Opozita shndërrohet në aleat të jetëgjatësisë së këtij pushteti. Rama deklaron për taksa marksiste, për vende imagjinare pune. Zoti na ruajtë nga kjo opozitë”.

Për ta sqaruar më tej këtë shprehje Berisha në vijim të deklaratës së gjatë tha se kjo shpjegohet më saktë nga deklaratat më të fundit të Ramës që kundërshton heqjen e imunitetit. “Lodhja nga qeverisja, sa i përket lodhjes apo clodhjes mos harroni një gjë, janë fenomen normal, por pasioni nuk njeh as lodhje as clodhje. Rama më tha miliarderët i ke në qeveri, në klubin e këshillit të ministrave, atëhere, pse i mban në qeveri, voto pra heqjen e imunitetit” .

Imuniteti 
Kryeministri Sali Berisha theksoi sot se drafti për heqjen e imunitetit është i hartuar nga ekspertët europianë dhe EURALIUS. Ai ftoi kreun e PS të votojë këtë nismë që vjen nga Europa. “Lidhur me imunitetin, unë nuk di cili është qëndrimi përfundimtar i PS, por do theksoj këto gjera, ligji që ne theksuam në parlament, dhe ligji për organizimin e drejtësisë në cdo gërmë, nen për nen, pikë për pikë është ai që kanë paraqitur ekspertët e Europës dhe EURALIUS. Unë kam lexuar dhe t’u them të vërtetën e kam gjetur atë një ligj të mrekullueshëm. E ftoj z Rama të mos rrimë por të pranojmë këtë standard të shkëlqyer dhe të falenderojmë ata ekspertë të cilët vërtet kanë sjellë për mendimin tim një nga variantet më të shkëlqyera. Mos harrojmë që ka vende në Europë ku ka zero imunitet për cdo gjë”.

Kreu i qeveria theksoi se pretendimet e Ramës për ngutje në ndryshimet e Kushtetutës nuk qëndrojnë. Berisha garantoi se ndryshimet nuk e zhbëjnë Kushtetutën. Por megjithatë, sipas Berishës, imuniteti është i tepërt për dokumentin e Kushtetutës. “Rama është Haxhi pishmani, ai pendohet si në 2008, kur bëj gabim mbaj përgjegjësi, kurse ai prapë thotë u nguta. Nuk u ngute mor, nuk është i sinqertë, u punua 4 muaj me grupet e mirëbesimit. Është dokumenti më i shkëlqyer ligjor. Ne të drejtën ta zhbëjmë kushtetutën si vepren e Penelopës nuk e kemi, atë nuk mund ta bëj. E kam deklaruar se imuniteti është standard i tepër në kushtetutën tonë, Pse? Imuniteti ka ardhur duke u hequr. Progresivisht sot ka vende që kanë zero imunitet. Ndaj të kërkosh tani, për ta shpërbërë, kushtetutën mbi bazën e pendesës që ta induktojnë të tjerë, kjo nuk mund të bëhet. Ai ka qenë një akt shumë i mirë i medituar”

Sipas Berishës asnjë politikan nuk duhet të deklarohet pro imunitetit. ‘Në vleësimin tim nuk mund të ketë asnjë politikan që të mund të dalë para qytetarëve dhe t’u thotë, jo unë do rri me imunitet. Më falni se unë kam pak dorë, njëlloj kështu thuhet. Po pse do rrish me imunitet ti, pse e do për cfarë të duhet’.

Duke e vlerësuar si një ligj ndër më të mirët, Berisha theksoi se sërish deputeti ka dallim nga qytetari. “Nuk dua t’a shqiptarizoj dokumentin, le të rrijë sic është sjellë. Është jashtëzakonisht i bazuar në doktrinë. Cfarë është imuniteti, tjetër punë si konceptohet, nuk ka të bëjë me personat, ka të bëjë me mbrojtjen pushtetit nga njëri-tjetrit.
Ekspertë të Europës i kanë bërë zgjidhje të shkëlqyer, deputeti i barabartë me qytetarin, por ka dallim. Se qytetarit i duhet nga Gjykata e Faktit të drejtohet tek Gjykata e Lartë, kurse deputetit dhe ministrit i njihet e drejta të hetohet nga Gjykata e Lartë”.

Armët
Kreu i qeverise i pyetur se opozita e ka akuzuar qeverinë se trafikon në mënyrë ilegale armë, u përgjigj se akuzat e PS janë shpifje dhe teatër. Ai tha se qeveria nuk pengon asnjë nisme hetimore, por shton se PS nuk ka drejtuar asnje kerkese per hetim parlamentar. “Shqiptarët duhet ta dinë se në protokollin e parlamentit nuk është dorëzuar asnjë kërkesë e vetme nga opozita për një komision hetimor parlamentar. Garantoj se kjo mazhorancë nuk pengon dhe një nismë të vetme të parlamentit. Është i qartë si kristali, por këtyre zotërinjve nuk u intereson hetimi, por teatraliteti, të nxijnë dhe damkosin një nga institucion nga më të respektuarit për shqiptarët, sic eshte Ministria e Mbrojtjes. Këtyre nuk u intereson të sjellin projekte nga komisioni parlamentar dhe nuk mund të ketë mëdyshje por u intereson të akuzojnë dhe shpifin pa baza se po bëhet trafik armësh. Në mënyrë absolute kategorike nuk ekziston qoftë dhe një fishek i trafikuar nga ky vend. Procedurat e tregtisë së armëve janë plotësisht transparente. Opozita nuk kërkon kontroll parlamentar, por teatralitet para mediave” .

Sipas Kryeministrit akuzat per pergjim vjen dhe si pasojë e sindomës së kryetarit të saj.
‘A mund të udhëhiqet një parti nga obsebsione të tilla? Ushtria shqiptare ka zbatuar dhe zbaton rregullat e saj si një institucion i depolitizuar. Këto vinë nga një njeri që cdo ditë kthen kolltuqet se mos i kanë vënë ndonjë përgjues, bashkëpunëtorët e tij dhe jo të tjerët’. Berisha mohoi të kishte çdo lloj praktike përgjimi, ndërsa shtoi, se Shqipëria në përputhje me ligjet e vendit dhe ndërkombëtare ka edhe eksporte minimale të fishekëve, gëzhojave, dhe kjo nuk duhet tu serviret shqiptarëve si një veprimtari trafiku.

Rishikimi i Historise 
I pyetur se është akuzuar për revansh, sidomos me deklaratat e bëra me rastin e festimeve të 100-vjetorit të pavarësisë, kryeministri tha se ai i qëndron qëndrimit se historia duhet rishikuar. “Festimet për 100 vjetorin. Synoj ta shndërrojmë këtë 100-vjetor në një piedestal. Kemi ardhur në këtë 100-vjetor si një komb me histori të falsifikuar. Une kam thene se historia duhet rishikuar, nderkohe më atribuojnë disa gjëra që nuk i kam thënë kurrë”.

Sipas Berishes, ky 100 -vjetor duhet te sherbeje per analiza te thella. ‘Duhet të jetë një 100 vjetor analize, ideja se Berisha po nxjerr në pah figura nga veriu dhe Kosova, këto janë qëndrime antikombëtare. Enver Hoxha nuk e përjashtoi Ahmet Zogun se ishte nga Mati, por sepse cdo ditë ia errësonte pushtetin e tij. Historia duhet të gjykohet në kontekstin e kohës dhe të rrethanave. Kanë dalë debate për numrin e dëshmorëve, nuk e di sa është por di që shqiptarët kanë luftuar, është e patolerueshme të shpallësh dëshmorë ata që nuk janë” .

Ekonomia
‘Për ekonominë shqiptare preferoj të flas me të dhënat e institucioneve ndërkombëtare. Ekonomia shqiptare ka patur një rritje, sipas Komisionit Europian, katër herë më të madhe sesa mesatarja e vendeve të rajonit dhe kjo në sajë të modelit tonë të qëndrueshëm ekonomik. Rama shprehet ndryshe. Kërkon të risjellë taksat marksiste. Zoti na ruajtë nga kjo opozitë”, ishin disa nga komentet e Berishës bërë për këtë cështje.

Pavarësisht problemeve dhe papunësisë arritjet e ekonomisë shqiptare nuk mund të përmbysen, tha kryeministri Berisha. “Jo se nuk e di që janë disa të papunë, dhe se ata robtohen në hallet dhe dertet e tyre me dhimbje të pandërprera. Jo se nuk e di se ka biznese që falimentojnë. Jam i vetëdijshëm që ka biznese që përballen me arbitraritete administrative. Por të gjitha këto nuk mund të përmbysin se ekonomia shqiptare ka patur një rritje.

Reforma Zgjedhore
‘Jam shumë i kënaqur që reforma zgjedhore do të votohet. Po ashtu jam i kënaqur për të gjitha koncesionet që ne ofruam në këtë proces. Është në detyrimin e qeverisë të bëjë koncesionet maksimale të mundshme opozitës në ligjin e zgjedhjeve”, tha Berisha. 

Nëse humb në vitin 2013
I pyetur se cfarë veprimi do të ndërmerrte si politikan nëse do të humbte zgjedhjet në vitin 2013, Berisha tha “Nëse humb zgjedhjet në vitin 2013? Do marr vendime që do më diktojë sovrani dhe do i marr sic do të mi diktojë sovrani. (LajmeShqip.com)

 
Lajme Shqip Friday, 13 July 2012 13:02

Bruksel- Komisioneri Europian i Zgjerimit Stefan Fyle përshëndet marrëveshjen e arritur të mërkurën për Reformën Elektorale. Përmes një njoftimi nga zyra për shtyp e komisionerit Fyle bën të ditur se marrëveshja ndërpartiake për Kodin Elektoral në Komisionin Parlamentar për Reformën Elektorale është një zhvillim i mirëpritur.

”Qoftë mazhoranca dhe opozita duhen vlerësuar për këtë marrëveshje, ashtu si dhe puna e mirë teknike e përfunduar. Nëse Kodi Elektoral miratohet javën e ardhshme sic është planifikuar kjo do të përbënte një hap të rëndësishëm përpara për përfundimin e marrëveshjes politike të nëntorit.

Reforma elektorale nuk është vetëm një nga prioritetet kyce të opinionit të KE, por është edhe esenciale në kuadër të zgjedhjeve parlamentare të 2013”-thuhet në këtë deklaratë.

“Mazhoranca qeverisëse dhe opozita duhet të ndërtojnë mbi këtë zhvillim të mirë dhe të thellojnë më tej dialogun politik dhe bashkepunimin për të përfunduar punën e nisur në prioritetet e tjera kyçe të opinionit të Komisionit Europian dhe të arrijnë një masë të konsiderueshme rezultatesh brenda vjeshtës. Reformat ne sundimin e ligjit përbëjnë një faktor kyc për të ecur përpara në rrugën e integrimit në BE.

Në këtë kuadër votimi për heqjen e imuniteteve në përputhje me standartet europiane do të ishte një element i rëndësishëm në drejtimin e duhur. Inkurajojmë të gjitha palët që të kontribuojnë për të intensifikuar përpjekjet në këtë drejtim dhe të tregojnë një qëndrim konsotruktiv”-përfundon deklarata. (LajmeShqip.com)

 
Lajme Shqip Wednesday, 11 July 2012 12:10

Tiranë (PLOTESUAR 19:35)- Komisioni i i posaçëm parlamentarë miratoi sot me konsensus draftin final të Reformës Zgjedhore duke përfshirë nje pjesë të mirë të propozimeve të Partisë Socialiste.

Përfaqësuesi i PS-së, Damian Gjiknuri tha se kjo reformë zgjedhore i jep opozitës shqiptare garanci shumë më të mëdha se ç’ka pasur ndonjëherë. Duke e konsideruar këtë një proces që ka patur tërheqjen e të dyja palëve, Gjiknuri tha se nuk është se janë realizuar të gjitha propozimet e PS-së, kjo edhe për shkak të rekomandimit të ODIHR, siç ishte përdorimi i teknologjisë në zgjedhje.

Lidhur me riformatimin e KQZ-së, Gjiknuri tha se misioni i kësaj KQZ-je kishte mbaruar, dhe riformatimi do të shërbejë për t’i kthyer besimin votuesve shqiptarë. Ndërkaq, përfaqësuesi i PD-së, Oerd Bylykbashi u shpreh se Komisioni përmbylli me sukses punën, duke përfshirë në reformë të gjitha rekomandimet e OSBE/ ODIHR. Ai u shpreh optimist për punën e bërë.

Lidhur me draftin e partive të vogla për korrektimin e sistemit, të dy përfaqësuesit partiak thanë se kanë rënë dakord që Kuvendi mund të gjejë zgjidhjen më të mirë të mundshme. (LajmeShqip.com)

*********************************************

Tiranë – Në limitet e skadimit të afatit të komisionit të posaçëm parlamentar për reformën elektorale, mazhoranca dhe opozita kanë arritur konsensusin për një ndër reformat më të rëndësishme për vendin.

Mësohet se palët kanë rënë dakord për disa nga çështjet të cilat mbanin të bllokuar përmbylljen e Reformës Zgjedhore, siç janë riformatimi i KQZ-së, ankimimi dhe teknologjia e numërimit.

Për sa i përket çështjes së KQZ-së, duket se mazhoranca ka pranuar kërkesën e PS-së për riformatimin e plotë të Komisionit Qendror të Zgjedhjeve, gjë që pritet të bëhet në muajin shtator, pas përfundimit të mandatit të komisionit aktual.

Burime të portalit bëjnë të ditur se palët kanë rënë dakord edhe për zgjedhjen me konkurs të kreut të Komisionit Qendror të Zgjedhjeve si dhe për kontrollin elektronik të kartave të identitetit për Tiranën. Tjetër pikë e rëndësishme është dakordësimi për çështjen e animimeve. Palët kanë rënë dakord që 2 anëtarë të KQZ-së të kenë të drejtë të kërkojnë transparencën.

Drafti përfundimtar pritet të përfundohet dhe të zbardhet pasditen e sotme, rreth orës 17:00, në mbledhjen e fundit të komisionit parlamentar të Reformës Zgjedhore. 12 korriku ishte përcaktuar si afati zyrtar i mandatit të punës së komisionit të Reformës Zgjedhore, i caktuar nga Kuvendi. (LajmeShqip.com)

 
Lajme Shqip Monday, 02 July 2012 18:00

Tiranë –Në dy dekadat e fundit Shqipëria ka vuajtur nga mospranimi i rezultatit të zgjedhjeve, një emërues i përbashkët ky për te dyja forcat kryesore politike.

Mungesa e nje vlerësimi ndërkombëtar se zgjedhjet përmbushën standardet më të larta demokratike është një nga arsyet kryesore përse Këshilli i Europës mban ende nën monitorim Shqipërinë. Ajo qe duhet arritur eshte qe vendi te kete standarde elektorale në lartesine e Kodit të Praktikave të Mira për Çeshtjet Zgjedhore të Komisionit të Venecias. Një dokument të cilit politika shqiptare i referohet sa herë ka probleme me zgjedhjet.

Dhe sot, kur Shqiperia mban presidencen e Komitetit te Ministrave te Keshillit te Europes, qe perkon edhe me 10-vjetorin e miratimit te ketij dokumenti, reforma e pambyllur zgjedhore ishte pika kryesore e diskutimeve.

Kryetarja e Kuvendit Jozefina Topalli dhe ambasadori i OSBE-së Eugen Wollfarth folen qe te dy per domosdoshmerinë e mberritjes ne vijen e finishit, duke i lidhur reformat ende te pambyllura, me te ardhmen europiane te vendit.

“Në Komisionin e Reformës Zgjedhore është bërë një punë e madhe dhe sigurisht e vlerësueshme. Tani është finishi dhe kjo punë duhet të mbyllet. Nuk ka kohë për të humbur më tej.Shfrytëzoj këtë rast dhe të ftoj njerëzisht që ajo çka ka mbetur, të përfundohet shpejt.Eshtë koha tani. Shqiptarët duan statusin dhe ata e meritojnë. Shqiptaret nuk e falin bllokimin dhe këtë e kane treguar”, tha Topalli.

“Vija e finishit është afër, por vetëm për ata me vullnet politik.Një përfundim në kohë i reformës nevojitet edhe që Komisioni Qendror i Zgjedhjeve të ketë kohë të mjaftueshme për të bërë përgatitjet e duhura në mënyrë të efektshme. Përmbushja e kësaj detyre kërkon, mbi të gjitha, që udhëheqësit politikë t’i lënë mënjanë interesat partiake vetjake dhe të vënë në plan të parë vendin e të nderojnë besimin, që u kanë dhënë qytetarët shqiptarë”, tha Wollfarth.

Ajo që ndërkombëtarët presin për permbushjen e standardeve me te larta elektorale eshte vetem se partite politike duhet te tregojne vullnet politik ne zbatimin e ligjit zgjedhor, çka përbën edhe rekomandimin numer një dhe të pandryeshueshëm të OSBE/ODIHR për zgjedhjet.

“Na mbetet ende të shohim nëse udhëheqësit politikë të këtij vendi do të udhëhiqen nga një ndjenjë më e lartë përgjegjësie kundrejt qytetarëve dhe mirëqenies së tërë vendit. Sa gjatë mund të presë Shqipëria? Unë jam i bindur se qytetarët e këtij vendi janë në gjendje t’i japin përgjigje kësaj pyetjeje”, theksoi Wollfarth.

Por derisa qytetareve t’u vije radha të shprehen me votë në zgjedhje, demokratët dhe socialistët kanë marrë përsipër të reformojnë Kodin Elektoral. Kur kanë mbetur vetëm 10 ditë kohe nga mandati i ri, Komisioni për Reformën Zgjedhore nuk ka dhënë asnjë shenjë kompromisi.  (T.Ch)

 
Lajme Shqip Sunday, 24 June 2012 12:38

Tiranë – OSBE u kërkon dy forcave politike kryesore në vend të vijojnë me shpejtësi reformën zgjedhore.

Përmes një letre dërguar dy bashkëkryetarëve të Komisionit të Reformës Zgjedhore, Damian Gjiknuri dhe Ilir Rusmali, OSBE shpreh shqetësimin e saj për vonesat që po vihen re në punën e komisionit, sidomos pas deklarimit të PS-së se do të punojë me amendamentet e ODIHR-it kur ato të vijnë të plota, për rishikimin e kapitullit për përdorimin e teknologjisë në zgjedhje.  Letra konfirmon se rekomandimet me shkrim do të vijnë brenda një javë.

Por, për OSBE-në kjo nuk do të thotë që komisioni të stopojë punën, duke lënë të digjet 1/3 e afatit të mandatit të komisionit. Në letrën për bashkëkryetarët Rusmali dhe Gjiknuri, zëvendësambasadori i OSBE-së thekson edhe një pikë tjetër të rëndësishme, kur thotë se “në komentet e shkruara që do t’ju dërgohen, ato nuk do të ndryshojnë në formë apo në përmbajtje nga bisedat shumë të detajuara që u zhvilluan me ju gjatë vizitës së fundit të ekspertëve”. Këto biseda, siç i konfirmuan të dyja palët në mesin e muajit maj, rrëzuan konsensusin mes demokratëve për përdorimin e teknologjisë në zgjedhje menjëherë në të gjithë vendin, si për përdorimin e pajisjes lexuese të kartës së identitetit, ashtu edhe për numërimin elektronik.

Propozimi i PS-së për përdorimin e teknologjive u refuzua nga ekspertët e ODIHR-it si i nxituar, i pasigurtë dhe i paqëndrueshëm dhe si i tillë u konsiderua si proces i parealizueshëm për zgjedhjet e vitit 2013-të. ODIHR-i rekomandoi të paktën 3 vjet kohë përgatitore për futjen e teknologjive në zgjedhje dhe pranoi përdorimin e tyre vetëm nëpërmjet projekteve-pilote në shkallë të ulët dhe në mënyrë graduale. Ky qëndrim i ekspertëve të ODIHR-it përsëritet edhe në letrën drejtuar bashkëkryetarëve të Komisionit për Reformën Zgjedhore. Duke i inkurajuar të vazhdojnë punën me çështjet e tjera, zëvendësambasadori i OSBE-së, Dan Redford i thotë zotit Rusmali dhe zotit Gjiknuri, se “duke qenë se ata janë në dijeni të këtyre fakteve, do të ishte shumë zhgënjyese dhe fare e panevojshme që çështja e marrjes me shkrim të këtyre komenteve të rezultonte në një vonesë për punën e komisionit”.

Palët nuk e kanë mbledhur dje, Komisionin e Reformës, duke bërë kështu që të kalohet edhe një ditë nga afati i mbylljes së punës së tij, deri në 12 korrik. (LjmeShqip.com)