Lajme Shqip Monday, 02 April 2012 11:51

Prishtinë-Qeveria e Kosovës do ta presë edhe sot Shqipërinë, për të hequr çmimin referent për pataten. Në të kundërtën, pritet të vendosen çmime referente edhe për produktet e Shqipërisë. Ministria e Tregtisë dhe e Industrisë nuk do t’i japë më afat Shqipërisë, për heqjen e çmimit referent për pataten. Nëse ky shtet edhe sot do të vazhdojë të aplikojë këtë çmim, atëherë MTI’ja do të fillojë të zbatojë reciprocitet edhe me këtë shtet.

Ministrja e Tregtisë, Mimoza Kusari – Lila, thotë se edhe Kosova do të fillojë të zbatojë reciprocitet me Shqipërinë, nëse edhe të hënën ky shtet do të vazhdojë të aplikojë çmimin referent për pataten. “Nëse edhe nesër nuk hiqen çmimet referente për pataten, atëherë do të fillojmë edhe ne të aplikojmë të njëjtën gjë në produktet e tyre, vetëm se jo në patatet, pasi ne nuk importojmë patate”, thotë ministrja Kusari – Lila.

Ajo njëherë thotë se nuk mund të tregojë se cilat janë ato produkte në të cilat do të fillohet të aplikohet çmimi referent. Ajo pohon se vetëm do të sigurohen që çmimi referent të gjejë zbatim në ato produkte, të cilat nuk mund të rrisin koston për konsumatorin. Kusari – Lila thekson se kjo nuk është aspak situatë e favorshme, pasi këtë çështje kanë pritur ta zgjedhin me dialog të mirëfilltë, e jo me këto masa.

“Ne jemi munduar tërë kohën të jemi në kontakt me Qeverinë shqiptare, por prej tyre nuk kemi marrë përgjigje zyrtare”, thotë ajo, duke shtuar se kanë pasur vetëm përgjigje që nuk kanë qenë të informuar për këtë problem. Kusari – Lila tregon se atyre ua kanë bërë me dije se do t’i presin deri të hënën, në të kundërtën, ajo pohon se do të vendosin procedurën e aplikimit të çmimeve referente për produktet e tjera. Shqipëria ka kohë që ka filluar aplikimin e çmimit referent prej 24 centësh për papatet e Kosovës.

Në anën tjetër, kur Shqipëria mori kryesimin e CEFTA-s këtë vit, komuniteti i biznesit kishte pritje shumë më të mëdha, ngase Kosova ka nevojë për zhvillim ekonomik, me mbështetje të shteteve të tjera, e veçanërisht Shqipërisë. Edhe udhëheqësit e Odës Ekonomike të Kosovës ishin shprehur të shqetësuar për aplikimin e këtij çmimi për pataten kosovare. Zyrtarë të OEK’ut kishin thënë se Shqipëria viteve të fundit është duke e shkelur biznesin kosovar.

Një javë më parë, zyrtarë të Ministria së Tregtisë dhe të Industrisë i kishin dhënë një javë afat Shqipërisë, për heqjen e çmimit referent për pataten. E nëse Shqipëria nuk merr masa, nuk i kthen çmimet referente në nivelin ku kanë qenë, atëherë kjo ministri kishte paralajmëruar masa adekuate, jo në patate, por në ngritjen e çmimeve referente për produktet e tjera.

Ndryshe, Kosova ka të drejtën që të mbledhë lëndën trevjeçare me Shqipërinë, duke ofruar fakte se si vazhdimisht Shqipëria i ka ngritur çmimet e referencës, duke i shkelur kështu rregullat e CEFTA’s dhe ta dërgojë si padi te kjo e fundit. (Express)

 
Lajme Shqip Friday, 23 March 2012 14:25

Tiranë- Kreu i Dhomës së Tregtisë dhe Industrisë së Tiranës, Nikolin Jaka mbështeti sot në një konferencë për shtyp kërkesën e biznesit kosovar për heqjen e çmimit të referencës së prodhimit  bujqësor dhe veçanërisht, patates nga Dogana shqiptare, si një pengesë e eksporteve nga Kosova.

Jaka kërkoi nga ministri i Financave dhe Doganat heqjen e barrierave fiskale për prodhimet nga Kosova. “Ne pretendojmë të arrijmë unifikimin fiskal mes dy vendeve, ndërsa po hasim pengesa për qarkullimin e mallrave”, tha Jaka.

“Nëse me Serbinë çmimi i referencës së patates është 0, 08 cent, me Malin e Zi, 0.10 cent, apo me Maqedoninë 0.14 cent, me Shqipërinë ky produkt eksportohet me çmim reference 0.24 cent. Ky është një problem shqetësues dhe që kërkon zgjidhje të shpejtë”, tha Jaka.

Ai bëri të ditur organizimin shumë shpejt në Tiranë të një forumi të përbashkët mes biznesit të Shqipërisë dhe Kosovës për të diskutuar rreth shqetësimeve që kanë krijuar çmimet e referencës për mallra, të cilat frenojnë rritjen e shkëmbimeve tregtare mes dy vendeve.

“Do të organizojmë një forum me biznesin për t’i dhënë zgjidhje këtyre barrierave që krijojnë probleme artificiale mes nesh. Si partnerë, ne e shohim me optimizëm zgjerimin e marrëdhënieve tregtare dhe do të kërkojmë që politika në dy shtetet të reagojë në këtë drejtim”, tha Jaka.

Kreu i Odës Ekonomike të Kosovës, Behxhet Nuri theksoi dëshirën e biznesit kosovar për zgjerimin e shkëmbimeve tregtare mes dy shteteve. “Ne duam të thellojmë bashkëpunimin ekonomik, që deri tani ka mbetur pas, ndaj duhet të largojmë barrierat që nuk na ndihmojnë. Duhet të eleminohen barrierat fiskale për mallrat kosovare, ndërsa barriera ndaj patates nuk i bën nder as Shqipërisë, as Kosovës”, tha ai.

Prodhimi i patates në Kosovë përbën një ndër prodhimet më kryesorë, pasi një numër shumë i madh fermerësh janë subvencionuar nga fonde hollandeze. Sot ky prodhim e rendit Kosovën si ndër prodhuesit e mëdhenj në rajon, e ku janë kryer investime të mëdha. Pak kohë më parë, ministrja kosovare Lila deklaroi se Kosova do të vendosë masa kundër mungesës së reciproritetit për mallrat kosovare me të gjitha vendet që nuk e zbatojnë këtë parim. (LajmeShqip.com)